.jpg)
កម្មករកំពុងធ្វើការក្នុងកន្លែងផលិតទឹកត្រី នាពេលកន្លងទៅ។ រូបថត ហ្វេសប៊ុក
ភ្នំពេញៈ មន្ត្រីជាន់ខ្ពស់នៃក្រសួងពាណិជ្ជកម្មកម្ពុជា ជំរុញឱ្យពាណិជ្ជករប្រទេសប្រេស៊ីល មកវិនិយោគលើឧស្សាហកម្មកែច្នៃចំណីអាហារនៅកម្ពុជា ដើម្បីទទួលបានអត្ថប្រយោជន៍ពីវិស័យកសិកម្មដ៏ធំរបស់កម្ពុជា។
រដ្ឋលេខាធិការក្រសួងពាណិជ្ជកម្មលោក រ័ត្ន សារ៉ាវុធ បានថ្លែងនៅក្នុង៖ «សិក្ខាសាលាជំរុញពាណិជ្ជកម្ម និងវិនិយោគរវាងកម្ពុជា និងប្រេស៊ីល» នៅរាជធានីភ្នំពេញ កាលពីថ្ងៃទី ២៧ ខែមីនា ដោយមានការចូលរួមពីក្រុមហ៊ុនរបស់ប្រទេសប្រេស៊ីលចំនួន ១៤ ដូចជាក្រុមហ៊ុនអាកាសចរណ៍ ឧស្សាហកម្មម្ហូបអាហារ នេសាទ និងស្បែកជើង និងមន្ត្រីរបស់ប្រេស៊ីលជាច្រើនរូបថា កម្ពុជាត្រូវបានគេដាក់ឈ្មោះថា ជាមជ្ឈមណ្ឌលយុទ្ធសាស្ត្រមួយនៅអាស៊ីអាគ្នេយ៍។ រដ្ឋាភិបាលទទួលយកវិធីសាស្ត្រប្រកបដោយភាពឆ្លាតវៃ និងសកម្ម ដើម្បីទាញយកប្រយោជន៍ពីអត្ថប្រយោជន៍ទីតាំងនេះ»។
លោកពន្យល់ថា ឋានៈ LDC របស់កម្ពុជាបានទាក់ទាញការចូលទីផ្សារអនុគ្រោះជាច្រើន រួមទាំងទីផ្សារសហភាពអឺរ៉ុប ចក្រភពអង់គ្លេស អាមេរិក កាណាដា អូស្ត្រាលី និងជាង ២៥ ប្រទេសផ្សេងទៀត។ ការចុះហត្ថលេខាលើកិច្ចព្រមព្រៀងពាណិជ្ជកម្មសេរី (FTAs) ទ្វេភាគីជាមួយប្រទេសចិន កាលពីឆ្នាំ ២០២០ ជាមួយកូរ៉េ ក្នុងឆ្នាំ ២០២១ និងជាមួយប្រទេសអេមីរ៉ាតអារ៉ាប់រួម (UAE) ក្នុងឆ្នាំ ២០២៣ បានក្លាយជាព្រឹត្តិការណ៍ដ៏សំខាន់មួយទៀតនៅក្នុងការផ្សារភ្ជាប់ទីផ្សារនាំចេញប្រកបដោយនិរន្តរភាព និងសុវត្ថិភាព និងបានជំរុញប្រសិទ្ធភាពការកសាងសេដ្ឋកិច្ចរបស់កម្ពុជា។
លោកថ្លែងថា៖ «ភាគីកម្ពុជាចំពោះ FTAs អាស៊ាន+១ និងកិច្ចព្រមព្រៀង RCEP ធ្វើឱ្យវាកាន់តែទទួលបានជោគជ័យ និងទាក់ទាញវិនិយោគិនដែលអាចទទួលបានអត្ថប្រយោជន៍ពីកម្លាំងពលកម្មដែលមានតម្លៃសមរម្យរបស់កម្ពុជា គោលនយោបាយគាំទ្រ និងរបបវិនិយោគដែលជំរុញដោយលើកទឹកចិត្តបើប្រៀបធៀបជាមួយភាគីដទៃទៀត»។
លោកលើកឡើងថា៖ «ជំនាញរបស់ប្រទេសប្រេស៊ីលខាងឧស្សាហកម្មកែច្នៃម្ហូបអាហារ គឺមានលក្ខណៈពាណិជ្ជកម្មដ៏ល្អសម្រាប់ការនាំចេញគ្រាប់ធញ្ញជាតិ គ្រាប់ស្វាយចន្ទី អង្ករ និងទំនិញកសិកម្មផ្សេងទៀតរបស់កម្ពុជា។ ការវិនិយោគនៅកម្ពុជាលើវិស័យកសិធុរកិច្ច និងកែច្នៃស្បៀងអាហារ នឹងក្លាយជាផលចំណេញដោយឧស្សាហកម្មប្រេស៊ីល។ ការណ៍នេះនឹងក្លាយជាហេតុផលមួយក្នុងចំណោមហេតុផលជាច្រើនទៀតដែលយើងគួរតែធ្វើការបន្ថែមទៀតដើម្បីកែលម្អភាពជាដៃគូសេដ្ឋកិច្ចនេះ»។
លោក Alex Giacomelli ឯកអគ្គរដ្ឋទូត នាយកផ្នែកជំរុញពាណិជ្ជកម្ម ការវិនិយោគ និងកសិពាណិជ្ជកម្ម នៃក្រសួងការបរទេសប្រេស៊ីល បានថ្លែងក្នុងសិក្ខាសាលានេះថា ទំនាក់ទំនងទ្វេភាគីកំពុងទទួលបានភាពទាក់ទាញជាលំដាប់។ ឆ្នាំមុនប្រទេសប្រេស៊ីល និងកម្ពុជាបានប្រកាសបើកស្ថានទូតនិវាសនជននៅទីក្រុង Brasilia និងទីក្រុងភ្នំពេញ ដែលជាព្រឹត្តិការណ៍សំខាន់មួយនៅក្នុងរយៈពេល ៣០ ឆ្នាំបន្ទាប់ពីការបង្កើតទំនាក់ទំនងទ្វេភាគីឡើងវិញ។
លោកបញ្ជាក់ថា៖ «ពាណិជ្ជកម្មរបស់យើងជាមួយប្រទេសកម្ពុជានៅតែមានកម្រិតតិចតួច ប៉ុន្តែវត្តមានរបស់អ្នកនៅទីនេះ នៅទីក្រុងភ្នំពេញបញ្ជាក់ពីភាពសាទររបស់សហគមន៍ធុរកិច្ចប្រេស៊ីលក្នុងការស្វែងរកទីផ្សារថ្មីៗ និងបង្កើតទំនាក់ទំនងជុំវិញពិភពលោក។ ការបើកទ្វារចំពោះក្រុមហ៊ុនយើងនៅបរទេស គឺជាគោលដៅដ៏ចម្បងរបស់យើងនៅក្នុងនាយកដ្ឋានជំរុញពាណិជ្ជកម្ម ការវិនិយោគ និងកសិពាណិជ្ជកម្ម»។
លោកបន្ថែមថា៖ «ជាការពិតណាស់ ដំណើរទស្សនកិច្ចកម្រិតខ្ពស់បន្ថែមទៀតនឹងមកដល់ ហើយពួកគេនឹងនាំមកនូវទំនុកចិត្ត និងភាពខ្លាំងបន្ថែមទៀតដល់ទំនាក់ទំនងទ្វេភាគីរបស់យើងដែលវានឹងមានផលប៉ះពាល់ជាវិជ្ជមានទៅលើលំហូរពាណិជ្ជកម្ម និងការវិនិយោគ។ កាលពីឆ្នាំ ២០២៣ ពាណិជ្ជកម្មទ្វេភាគីរបស់យើងបានកើនដល់ ១១៣ លានដុល្លារ។
លោកបានបន្តថា៖ «ចំនួននេះតំណាងឱ្យការកើនឡើង ១៦ ភាគរយធៀបឆ្នាំ ២០២២ ដែលបង្ហាញថា យើងមានឱកាសជាច្រើនដើម្បីបង្កើនពាណិជ្ជកម្ម។ ជាឧទាហរណ៍ យើងអាចធ្វើការងារ ដើម្បីបង្កើនការធ្វើពិពិធកម្ម និងតម្លៃសរុបនៃការផ្លាស់ប្តូរទំនិញ»។
លោកប្រាប់ទៀតថា ទំនាក់ទំនងរវាងប្រេស៊ីល និងកម្ពុជាមានសក្ដានុពលដ៏អស្ចារ្យ ដោយផ្តល់ផលប្រយោជន៍រួមក្នុងវិស័យនានាដូចជា ថាមពលជីវៈ កសិកម្ម អាហារ សន្តិសុខអាហារូបត្ថម្ភ វប្បធម៌ និងទេសចរណ៍។
លោកអះអាងថា៖ «កិច្ចព្រមព្រៀងសហប្រតិបត្តិការបច្ចេកទេសដែលចុះហត្ថលេខាកាលពីឆ្នាំ ២០២១ អាចផ្តល់ជាមូលដ្ឋានច្បាប់សម្រាប់គម្រោងជាក់ស្តែងរវាងប្រទេសយើងលើគ្រប់វិស័យទាំងនេះ»៕
