.jpg)
អគារក្រសួងពាណិជ្ជកម្ម និងសេចក្តីប្រកាសរបស់ក្រសួង។ ហេង ជីវ័ន
ភ្នំពេញៈ ក្រសួងពាណិជ្ជកម្ម បានលើកទឹកចិត្ត ដល់ជនមានពិការភាពដែលជាម្ចាស់អាជីវកម្មខ្នាតមីក្រូតូច និងមធ្យម ដាក់ពាក្យស្នើសុំការគាំទ្រ ពីគម្រោងពាណិជ្ជកម្មតំបន់សម្រាប់ការអភិវឌ្ឍ (RT4D) ក្រោមជំនួយបច្ចេកទេសរបស់ប្រទេសអូស្ត្រាលី និងនូវែលសេឡង់ ដើម្បីចូលរួមចំណែកក្នុងការអភិវឌ្ឍកំណើនសេដ្ឋកិច្ច ប្រកបដោយបរិយាបន្នរបស់កម្ពុជា។
យោងតាមសេចក្តីជូនដំណឹងរបស់ក្រសួងពាណិជ្ជកម្ម ដែលបានចេញផ្សាយកាលពីថ្ងៃទី២៦ ខែមីនា បានឱ្យដឹងថា ដើម្បីចូលរួមអនុវត្តយុទ្ធសាស្ត្រ បញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧ បញ្ចកោណទី៣ មុំទី៤ ចំណុចទី៤ ស្តីពីការពង្រឹងការការពារកម្មសិទ្ធិបញ្ញា ការលើកកម្ពស់ការបង្កើតផលិតផលនិងសេវាកម្មថ្មីៗ ការច្នៃប្រឌិតនិងនវានុវត្តន៍ ក្រសួងពាណិជ្ជកម្ម កំពុងអនុវត្តគម្រោងពាណិជ្ជកម្មតំបន់សម្រាប់ការអភិវឌ្ឍ (RT4D)។
គម្រោងនេះអនុវត្តក្រោមជំនួយបច្ចេកទេស របស់ប្រទេសអូស្ត្រាលី និងនូវែលសេឡង់ ផ្ដោតលើ «កំណើនប្រកបដោយបរិយាបន្ន៖ ការលើកកម្ពស់សហគ្រិនកម្ពុជាដែលមានពិការភាព តាមរយៈការអប់រំកម្មសិទ្ធិបញ្ញា និងការកសាងកេរ្តិ៍ឈ្មោះម៉ាកសម្រាប់ពាណិជ្ជកម្ម» ដែលគម្រោងនេះចាប់ផ្តើមពីថ្ងៃទី៣០ ខែមេសា ឆ្នាំ២០២៤ រហូតដល់ថ្ងៃទី១៥ ខែឧសភា ឆ្នាំ២០២៤។
ក្នុងសេចក្តីជូនដំណឹងរបស់ក្រសួងពាណិជ្ជកម្ម បានបញ្ជាក់ទៀតថា អត្ថប្រយោជន៍ដែលស្នើសុំទទួលបាន រួមមាន ការបង្កើតឱ្យមានការទទួលស្គាល់ម៉ាក និងការបង្កើតបណ្តាញដើម្បីលើកកម្ពស់កិច្ចសហប្រតិបត្តិការ សម្រាប់គាំទ្រជនមានពិការភាពដែលជាម្ចាស់អាជីវកម្ម។
ចំពោះ លក្ខខណ្ឌក្នុងការចូលរួម ក្រសួងបញ្ជាក់ថា អ្នកចូលរួមត្រូវតែជាជនមានពិការភាពដែលមានអាជីវកម្មខ្នាតមីក្រូ តូច និងមធ្យម និងបានប្រើប្រាស់ម៉ាកសម្រាប់ទំនិញឬសេវា ប៉ុន្តែមិនទាន់បានចុះបញ្ជីម៉ាក ឬមានតែទំនិញឬសេវា ប៉ុន្តែមិនទាន់មានម៉ាក ថែមទាំងមានការប្ដេជ្ញាចិត្តថា នឹងចូលរួមក្នុងសកម្មភាពពេញលេញ ចាប់ពីការសម្ពោធបើកអនុវត្តសកម្មភាព និងវគ្គបណ្តុះបណ្តាលស្តីពីកម្មសិទ្ធិបញ្ញា(៥ថ្ងៃ) ការបង្កើតម៉ាកពាណិជ្ជកម្ម(៥ថ្ងៃ) ការបណ្តុះបណ្តាល ស្តីពីម៉ាកពាណិជ្ជកម្មនិងការចុះបញ្ជី(៣ថ្ងៃ) និងការចូលរួមប្រកាសបិទសកម្មភាព និងទទួលវិញ្ញាបនបត្រ។
ក្រសួងបញ្ជាក់ថា អ្នកដាក់ពាក្យជាស្ត្រីមានពិការភាពដែលជាម្ចាស់អាជីវកម្មខ្នាតមីក្រូ តូច និងមធ្យម ត្រូវបានផ្ដល់អាទិភាព។
លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្ម បានប្រាប់ឱ្យដឹងបន្ថែមនៅថ្ងៃទី២៧ ខែមីនាថា នេះជាឱកាសល្អសម្រាប់ជនមានពិការភាពដែលជាម្ចាស់អាជីវកម្មខ្នាតមីក្រូតូច និងមធ្យម ក្នុងការដាក់ពាក្យស្នើសុំឱ្យបានទាន់ពេលវេលា។
លោកបានបញ្ជាក់ថា៖«អ្នកចូលរួមនឹងទទួលបានចំណេះដឹង និងការយល់ដឹងអំពីគោលគំនិតមូលដ្ឋាននៃកម្មសិទ្ធិបញ្ញា សារប្រយោជន៍នៃកម្មសិទ្ធិបញ្ញា និងការធ្វើពាណិជ្ជូបនីយកម្មកម្មសិទ្ធិបញ្ញា, ការយល់ដឹងពីការបង្កើតម៉ាក និងការចុះបញ្ជីម៉ាកសម្រាប់ទំនិញឬសេវារបស់ខ្លួនផងដែរ»។
លោកបានបន្ថែមថា ក្រៅពីនេះ ពួកគាត់ក៏នឹងទទួលបានចំណេះដឹង និងការអនុវត្តជាក់ស្ដែងជាមួយជំនាញការទាក់ទងទៅនឹងការរចនាម៉ាកសម្រាប់ទំនិញឬសេវារបស់ខ្លួន និងការអភិវឌ្ឍកេរ្តិ៍ឈ្មោះម៉ាក,ការយល់ដឹងពីសារៈសំខាន់នៃការចុះបញ្ជីម៉ាក និងជំរុញការប្រើប្រាស់ម៉ាកដើម្បីអភិវឌ្ឍអាជីវកម្ម,ការចូលរួមដាក់បង្ហាញផលិតផលរបស់ខ្លួននៅក្នុងទិវាកម្មសិទ្ធិបញ្ញាពិភពលោកឆ្នាំ២០២៤ និងកម្មវិធីតាំងពិព័រណ៍ផ្សេងៗទៀត។
លោកស្រី កែវ មុំ ប្រធានសមាគមសហគ្រិនស្ត្រីបានលើកទឹកចិត្តបន្ថែមដល់ម្ចាស់សហគ្រាសដែលមានពិការភាពទាំងអស់ គួរចូលរួមស្នើសុំក្នុងគម្រោងនេះ ព្រោះជាគម្រោងល្អមួយ ដើម្បីទទួលបានចំណេះដឹងបន្ថែម លើបញ្ហាកម្មសិទ្ធិបញ្ញា ការបង្កើតផលិតផលនិងសេវាកម្មថ្មីៗ ឱ្យទាន់ការវិវត្តរបស់សម័យកាល។
លោកស្រីបញ្ជាក់ថា ៖«ខ្ញុំយល់ថា នេះជាគម្រោងល្អមួយ សម្រាប់អ្នកដែលគាត់ជាសហគ្រិន ជាពិសេសអ្នកមានពិការភាព ដែលគាត់អាចយកឱកាសនេះ អភិវឌ្ឍសមត្ថភាព និងចំណេះដឹងរបស់ខ្លួនបន្ថែមទៀត ជាពិសេស ជួយឱ្យគាត់មានគំនិតថ្មីៗ ក្នុងការបង្កើតផលិតផល ឬម៉ាកផ្ទាល់ខ្លួន ដែលវានឹងជំរុញដល់ការអភិវឌ្ឍបន្ថែម ក្នុងវិស័យសហគ្រាសធុនតូចនិងមធ្យម»។
សូមជម្រាបថា បើសិនសហគ្រិនកម្ពុជាដែលមានពិការភាព ចាប់អារម្មណ៍ និងចង់ដាក់ពាក្យស្នើសុំក្នុងគម្រោងនេះ គឺអាចបំពេញពាក្យស្នើសុំដែលអាចទាញយកពី QR Code ខាងក្រោម ហើយដាក់ពាក្យ នៅនាយកដ្ឋានកម្មសិទ្ធិបញ្ញា នៃក្រសួងពាណិជ្ជកម្ម ឬតាមរយៈអ៊ីមែល dipdwes@gmail.com ឬ តាមតេឡេក្រាមលេខ ០៩៦ ៩ ២០០ ៦០០។
កាលបរិច្ឆេទទទួលពាក្យស្នើសុំចាប់ផ្តើមពីថ្ងៃទី២៦ ខែមីនា រហូតដល់ ថ្ងៃទី១៧ ខែមេសា ឆ្នាំ២០២៤ បេក្ខជនចំនួន ២៥រូប ដែលមានលក្ខណសម្បត្តិគ្រប់គ្រាន់នឹងត្រូវបានជ្រើសរើស ហើយត្រូវប្រកាសឈ្មោះជាផ្លូវការ៕
