ភ្នំពេញៈ លោក ហ៊ុន សែន ប្រធានក្រុម ឧត្តមប្រឹក្សាផ្ទាល់ព្រះមហាក្សត្រ បានដឹកនាំគណៈប្រតិភូជាន់ខ្ពស់កម្ពុជា ទៅដល់សាធារណរដ្ឋប្រជាមានិតចិនប្រកបដោយសុវត្ថិភាព នៅព្រឹកថ្ងៃទី ២៧ ខែមីនានេះ។ លោកត្រូវបានទទួលស្វាគមន៍យ៉ាងកក់ក្តៅ ពីសំណាក់មន្ត្រីថ្នាក់ដឹកនាំ នៃសាធារណរដ្ឋប្រជាមានិតចិន ឯកអគ្គរដ្ឋទូតកម្ពុជា ប្រចាំនៅសាធារណរដ្ឋប្រជាមានិតចិន និងថ្នាក់ដឹកនាំសំខាន់ៗជាច្រើនទៀត។
ការធ្វើដំណើរទៅកាន់សាធារណរដ្ឋប្រជាមានិតចិន របស់លោកហ៊ុន សែន ធ្វើឡើង តបតាមការអញ្ជើញរបស់លោក លី ប៉ោទុង អគ្គលេខាធិការ នៃវេទិកាបូអាវសម្រាប់អាស៊ី ដើម្បីចូលរួមក្នុងកិច្ចប្រជុំប្រចាំឆ្នាំនៃវេទិកាបូអាវ ដែលនឹងរៀបចំឡើងចាប់ពីថ្ងៃទី ២៧ ដល់ថ្ងៃទី ២៩ ខែមីនា ឆ្នាំ ២០២៤ នៅខេត្តហៃណាន ប្រទេសចិន។ នេះបើតាមហ្វេសប៊ុក លោកហ៊ុន សែន។
ប្រភពដដែលបានឱ្យដឹងថា វេទិកាបូអាវសម្រាប់អាស៊ី (BFA) ជាអង្គការក្រៅរដ្ឋាភិបាលអន្ដរជាតិ ដែលមិនស្វែងរកប្រាក់ចំណេញ។ បូអាវ បានក្លាយជាវេទិកាលំដាប់ខ្ពស់មួយសម្រាប់កិច្ចសន្ទនាគ្នា ក្នុងចំណោមថ្នាក់ដឹកនាំរដ្ឋាភិបាលកម្រិតជាតិ ក្នុងរង្វង់ថ្នាក់ដឹកនាំវិស័យឧស្សាហកម្ម និងធុរកិច្ច រួមទាំងបញ្ញវន្តនៃបណ្តាប្រទេសនៅទ្វីបអាស៊ី និងទ្វីបដទៃទៀត ដែលធ្វើការសន្ទនាគ្នាអំពីបញ្ហាសំខាន់ៗ ក្នុងតំបន់អាស៊ី និងពិភពលោកទាំងមូល។
តាមរយៈហ្វេសប៊ុក លោក ហ៊ុន សែន បញ្ជាក់ថា៖ «វេទិកាបូអាវសម្រាប់អាស៊ី មានគោលដៅលើកកម្ពស់ និងធ្វើឱ្យកិច្ចសហប្រតិបត្តិការដោះដូរ សេដ្ឋកិច្ច កិច្ចសម្របសម្រួល និងកិច្ចសហប្រតិបត្តិការកាន់តែស៊ីជម្រៅ នៅក្នុងតំបន់អាស៊ី និងរវាងអាស៊ី និងតំបន់ផ្សេងទៀតនៅជុំវិញ ពិភពលោក»។
សេចក្តីប្រកាសព័ត៌មានរបស់ក្រសួងការបរទេសបានឱ្យដឹងថា ប្រតិភូអមដំណើរលោក ហ៊ុន សែន ក្នុងដំណើរទៅកាន់ប្រទេសចិនលើកនេះ រួមមាន សមាជិកឧត្តមប្រឹក្សាផ្ទាល់ព្រះមហាក្សត្រ និងឥស្សរជនជាន់ខ្ពស់នៃរាជរដ្ឋាភិបាលជាច្រើនរូប ព្រមទាំងថ្នាក់ដឹកនាំធុរកិច្ចនៃសភាពាណិជ្ជកម្មកម្ពុជា ផងដែរ។
ក្រសួងការបរទេសបានឱ្យដឹងថា៖ «សម្តេចតេជោ នឹងអញ្ជើញថ្លែងសុន្ទរកថា ក្នុងពិធីបើកសន្និសីទក្រោមមូលបទ «អាស៊ីនិងពិភពលោក៖ បញ្ហាប្រឈម និងការទទួលខុសត្រូវរួម»។ វេទិកានេះនឹងមានការចូលរួមពីថ្នាក់ដឹកនាំរដ្ឋាភិបាល ធុរកិច្ច ស្ថាប័នសិក្សាស្រាវជ្រាវ អង្គការអន្តរជាតិ និងអង្គការតំបន់នានា ដើម្បីពិភាក្សាអំពីបញ្ហាសំខាន់ៗដែលកំពុងប្រឈម និងជំរុញកិច្ចសហប្រតិបត្តិការអន្តរជាតិ»។
ប្រភពដដែលបានឱ្យដឹងទៀតថា អំឡុងពេលចូលរួមវេទិកាខាងលើនេះ លោក ហ៊ុន សែន នឹងជួបសម្តែងការគួរសមជាមួយថ្នាក់ដឹកនាំជាន់ខ្ពស់ចិនជាច្រើនរូបរួមមាន លោក ចាវ ឡឺជី ប្រធានគណៈកម្មាធិការអចិន្រៃ្តយ៍នៃសភាតំណាងប្រជាជនចិន និង លោក ហឺ វ័យទុង សមាជិកការិយាល័យនយោបាយមជ្ឈិមបក្ស និងជាអនុប្រធានទី២ នៃគណៈកម្មាធិការយោធាមជ្ឈិមបក្ស និងលោក ហ្វឹង ហ្វី លេខាធិការ នៃគណៈកម្មាធិការបក្សកុម្មុយនីស្តចិន ខេត្តហៃណាន។
មិនតែប៉ុណ្ណោះ លោក ហ៊ុន សែន ក៏នឹងអញ្ជើញបំពេញ ទស្សនកិច្ចនៅបណ្ឌិត្យសភាវិទ្យាសាស្ត្រ កសិកម្មត្រូពិកចិន (CATAS) និងទីក្រុងអវកាសអន្តរជាតិ វិនឆាង ក្នុងគោលបំណង ជំរុញកិច្ចសហប្រតិបត្តិការកម្ពុជា-ចិន លើការអភិវឌ្ឍវិស័យកសិកម្ម និងបច្ចេកវិទ្យា ផងដែរ។
ដោយឡែកនៅថ្ងៃជាមួយគ្នានោះ លោកនាយករដ្ឋមន្ត្រី ហ៊ុន ម៉ាណែត បានអនុញ្ញាតឱ្យ លោក ស៊ិន មីងរ៉ុង (Shen Mingrong) ប្រធានក្រុមហ៊ុន Zhenjiang ZhoungChao New Material Co,Ltd. និងប្រតិភូសហគ្រាសឧស្សាហកម្មធំៗចំនួន ១៧ របស់ប្រទេសចិន ចូលជួបសម្ដែងការគួរសម និងពិភាក្សាការងារនៅវិមានសន្តិភាព។
ក្នុងជំនួបនេះ លោក ស៊ិន មីងរ៉ុង បានបង្ហាញពីការប្តេជ្ញាចិត្ត ក្នុងការជំរុញ និងពង្រីកការវិនិយោគ ក៏ដូចជាការទាក់ទាញនូវវិនិយោគិនថ្មីៗបន្ថែមទៀត មកកម្ពុជា សំដៅរួមចំណែកក្នុងការអភិវឌ្ឍសង្គមសេដ្ឋកិច្ចកម្ពុជា ស្របតាមគោលនយោបាយ និងយុទ្ធសាស្ត្រដែលរាជរដ្ឋាភិបាលបានដាក់ចេញ ជាពិសេស គឺសំដៅប្រែក្លាយខេត្តព្រះសីហនុទៅជា “តំបន់សេដ្ឋកិច្ចពិសេសគំរូពហុបំណង” ស្របតាមចក្ខុវិស័យរបស់រាជរដ្ឋាភិបាល។ នេះបើតាមតេឡេក្រាមលោក ហ៊ុន ម៉ាណែត។
ប្រភពដដែលបានឱ្យដឹងថា ក្នុងជំនួបនោះដែរ ប្រធានក្រុមហ៊ុន Zhenjiang បានបញ្ជាក់ថា ក្រុមហ៊ុនទាំង ១៧ ដែលបានចូលរួមក្នុងដំណើរទស្សនកិច្ចនេះ រួមមានវិស័យវាយនភណ្ឌ បច្ចេកវិទ្យាព័ត៌មាន ឧស្សាហកម្ម ហិរញ្ញវត្ថុ និងធនាគារ ថាមពល ការគ្រប់គ្រងសំណល់ និងទឹកស្អាត អចលនទ្រព្យ គម្រោងអភិវឌ្ឍន៍ជនបទ,ធានារ៉ាប់រង បរិស្ថាន និង ក្រុមហ៊ុនវិនិយោគដែលផលិតនូវផលិតផលផ្សេងៗ ដូចជា ក្រដាស និងដែក ជាដើម។
លោកប្រធានក្រុមហ៊ុន ក៏បានគោរពស្នើសុំការស្វែងយល់បន្ថែមអំពីគោលនយោបាយ និងយុទ្ធសាស្ត្រក្នុងការទាក់ទាញការវិនិយោគរបស់រាជរដ្ឋាភិបាល គោលនយោបាយក្នុងការគ្រប់គ្រង និងការបង្វិលប្រាក់វិនិយោគ គោលនយោបាយ នៃការគ្រប់គ្រងកម្លាំងពលកម្មទាំងក្នុងស្រុក និងពលករជំនាញបរទេស និងគោលនយោបាយផ្នែកថាមពលបៃតង និងហេដ្ឋារចនាសម្ព័ន្ធតភ្ជាប់។
លោកនាយករដ្ឋមន្ត្រី ហ៊ុន ម៉ាណែត បញ្ជាក់ថា កម្ពុជាតែងតែប្រកាន់ភ្ជាប់នូវគោលនយោបាយបើកទូលាយ ប្រកបដោយភាពបត់បែន និងជាក់ស្តែងនិយម ដោយរក្សាភ្ជាប់នូវទំនាក់ទំនង និងកិច្ចសហប្រតិបត្តិការជាមួយគ្រប់បណ្ដាប្រទេសទាំងអស់ នៅក្នុងតំបន់ និងពិភពលោក។
លោកថា៖ «ការបើកទូលាយនេះ ដើម្បីធានាបាននូវការប្រកួតប្រជែង និងការផ្ដល់នូវបរិយាកាសវិនិយោគល្អប្រសើរ»។
លោកបានប្រាប់ទៅប្រធានក្រុមហ៊ុន Zhenjiang ថា រាជរដ្ឋាភិបាល បាននិងកំពុងតែដាក់ចេញនូវគោលនយោបាយអាទិភាពលើការបណ្ដុះបណ្ដាលធនធានមនុស្ស តាមរយៈការធ្វើការកែទម្រង់វិស័យអប់រំ និងការលើកកម្ពស់ការបណ្តុះបណ្តាលវិជ្ជាជីវៈ និងបច្ចេកទេស ក៏ដូចជាបន្តពង្រឹងកម្មវិធីការបង្កើនជំនាញ និងការផ្លាស់ប្តូរជំនាញ ដើម្បីធានាបាននូវធនធានមនុស្ស ជាពិសេសកម្លាំងពលកម្មជំនាញ ដែលអាចឆ្លើយតបទៅតាមតម្រូវការទីផ្សារការងារ។ លោកក៏បានបញ្ជាក់អំពីការបន្តយកចិត្តទុកដាក់របស់រាជរដ្ឋាភិបាលក្នុងការវិនិយោគទៅលើការអភិវឌ្ឍហេដ្ឋារចនាសម្ព័ន្ធតភ្ជាប់សំខាន់ៗ៕