.jpg)
ជំនួបពិភាក្សារវាងភាគីកម្ពុជានិងអ៊ីស្រាអែល នៅថ្ងៃទី២៧ មីនា ។ រូបថត ក្រសួងការងារ
ភ្នំពេញៈ កម្ពុជា និងអ៊ីស្រាអែល បន្តជួបពិភាក្សាស្តីពីកិច្ចសហប្រតិបត្តិការលើវិស័យការងារដើម្បីផ្តល់ឱកាសថ្មីបន្ថែមដល់ពលរដ្ឋកម្ពុជាក្នុងការពង្រីកសមត្ថភាពជំនាញបច្ចេកទេស។ កិច្ចពិភាក្សានេះធ្វើឡើងក្នុងជំនួបរវាងលោក ហេង សួរ រដ្ឋមន្ត្រីក្រសួងការងារជាមួយនឹងលោក Eli Eliyahu Sneh អគ្គទីប្រឹក្សានៃស្ថានទូតអ៊ីស្រាអែលប្រចាំកម្ពុជា និងថៃនៅថ្ងៃទី ២៧ ខែមីនា ២០២៤ នៅទីស្តីការក្រសួងការងារនិងបណ្តុះបណ្តាលវិជ្ជាជីវៈ។
ក្នុងឱកាសនោះលោក ហេង សួរ បានគូសបញ្ជាក់ពីវឌ្ឍនភាពនៃកិច្ចពិភាក្សាដែលក្រុមការងារបច្ចេកទេសនៃភាគីទាំង ២ បានសម្រេចកន្លងមក ដើម្បីឈានដល់កិច្ចសហប្រតិបត្តិការមួយដែលនឹងផ្តល់ប្រយោជន៍ទៅកាន់ប្រជាជាតិទាំង ២ តាមរយៈការពង្រឹងសមត្ថភាពជំនាញបច្ចេកទេស ពង្រីកសមត្ថភាពបទពិសោធន៍ការងារនៅទីតាំងជាក់ស្តែង ក៏ដូចជាការបង្កើនកម្រិតជីវភាព។
បន្ថែមពីនេះលោករដ្ឋមន្ត្រី ក៏បានគូសបញ្ជាក់ពីគោលជំហររបស់រាជរដ្ឋាភិបាលអាណត្តិទី៧នេះលើវិស័យការងារដែលមានក្រសួងជាសេនាធិការក្នុងការបន្តជំរុញកំណែទម្រង់មុតស្រួចដើម្បីឱ្យប្រជាពលរដ្ឋកម្ពុជាទទួលបានផលភាគកាន់តែច្រើនបន្ថែមទៀតប្រកបដោយតម្លាភាពដែលហូរចេញពីកិច្ចសហការនេះ។
ត្រង់ចំណុចនេះ លោក Eli Eliyahu Sneh ក៏បានឯកភាពដែរថា មានតែការខិតខំប្រឹងប្រែងឱ្យកិច្ចសហការនេះជោគជ័យនិងរលូនទេ ទើបអាចឱ្យពលរដ្ឋទាំងសងខាងទទួលបានអត្ថប្រយោជន៍ជាអតិបរមាដែលនឹងជួយពូនជ្រំបន្ថែមដល់កំណើនសេដ្ឋកិច្ចនិងទំនាក់ទំនងរវាងប្រទេសជាមិត្ត។
ឆ្លៀតក្នុងឱកាសនោះលោករដ្ឋមន្ត្រី ក៏បានជម្រាបសមភាគីអំពីបទពិសោធន៍របស់កម្ពុជាដែលធ្លាប់សហការជាមួយប្រទេសជប៉ុន និងកូរ៉េខាងត្បូង និងបណ្តាប្រទេសផ្សេងៗទៀតលើវិស័យការងារនេះ ហើយពលរដ្ឋកម្ពុជាក៏កំពុងបន្តទទួលបានផលផ្លែផ្កាទាំងលើសមត្ថភាពជំនាញ និងកម្រិតជីវភាព។
ទន្ទឹមនឹងនេះលោករដ្ឋមន្ត្រី ក៏បានណែនាំឱ្យក្រុមការងារបច្ចេកទេសរវាងប្រទេសទាំង ២ បន្តពិភាក្សាលើចំណុចគោលៗបន្ថែម ដើម្បីធ្វើឱ្យពលរដ្ឋកម្ពុជា និងអ៊ីស្រាអែលអាចទទួលផលភាគជាអតិបរមាចេញកិច្ចសហការនេះ។
លោកបណ្ឌិត យង់ ពៅ អគ្គលេខាធិការនៃរាជបណ្ឌិត្យសភាកម្ពុជា លើកឡើងថាកិច្ចសហប្រតិបត្តិការរវាងកម្ពុជា និងអ៊ីស្រាអែលលើវិស័យការងារ ជាពិសេសលើការបញ្ជូនពលករកម្ពុជានេះគឺជារឿងមួយល្អណាស់សម្រាប់កម្ពុជា ពីព្រោះអ៊ីស្រាអែលជាប្រទេសដែលមានការរីកចម្រើនលើគ្រប់វិស័យមិនថាវិស័យការងារ បច្ចេកវិទ្យា កសិកម្ម ឬក៏អ្វីផ្សេងឡើយ។
លោកបន្តថា៖ «កាលណាកម្ពុជាមានពលករទៅបម្រើការងារនៅទីនោះ (អ៊ីស្រាអែល) នោះយើងនឹងអាចក្រេបយកចំណេះដឹង ជំនាញ បន្ថែមពីប្រទេសដែលមានការរីកចម្រើនមួយនេះ។ យើងមិនត្រឹមតែទទួលបានប្រាក់ចំណូលជួយសេដ្ឋកិច្ចជាតិ និងគ្រួសារប៉ុណ្ណោះទេ តែថែមទាំងនាំមកនៅសមត្ថភាពជំនាញសម្រាប់ខ្លួនឯងពេលត្រឡប់មកកម្ពុជាវិញទៀតផង»។
ទន្ទឹមនឹងនេះលោកគាំទ្រឱ្យមានការបញ្ជូនពលករកម្ពុជាទៅបណ្តាប្រទេសផ្សេងៗទៀត ដូចទៅនឹងយន្តការជាមួយប្រទេសអ៊ីស្រាអែលនេះដែរ ពោលគឺពលករជំនាញ ហើយបញ្ជូនទៅប្រទេសដែលមានការរីកចម្រើនផ្នែកបច្ចេកវិទ្យា៕
