មណ្ឌលគិរីៈ ដំរីញីមួយក្បាល ដែលត្រូវបានសង្រ្គោះពីល្បាប់ភក់ក្នុងដែនជម្រកសត្វព្រៃភ្នំព្រេច កាលពីសប្តាហ៍មុននោះបានស្លាប់ហើយនាព្រឹកថ្ងៃទី១០ ខែឧសភានេះ ដោយសារតែរបួសជើងធ្ងន់ធ្ងរ និង ដាច់ចំណីយូរ។ នេះបើយោងតាមមន្ទីរបរិស្ថានខេត្តមណ្ឌលគិរី។
មន្ទីរបរិស្ថានបានបញ្ជាក់ថា៖ «ដោយសុខភាព សត្វដំរីព្រៃញីមួយក្បាលនេះមានសភាពខ្សោយពីមួយថ្ងៃទៅមួយថ្ងៃ នាថ្ងៃទី១០ ខែឧសភា ឆ្នាំ២០២៤ នៅវេលាម៉ោង ៥:៣៨នាទីព្រឹកក៏បានស្លាប់បាត់បង់ជីវិត។ មន្ទីរបរិស្ថានខេត្តមណ្ឌលគិរីមានការសោកស្តាយជាពន់ពេកចំពោះការបាត់បង់សត្វដំរីព្រៃញី ១ក្បាលដែល មានរបួសធ្ងន់ធ្ងរនៅចំណុចអូរក្រាក់នៃដែនជម្រកសត្វព្រៃភ្នំព្រេច»។
លោក ឆៅ ប៊ុនធឿន ប្រធានមន្ទីរបរិស្ថានខេត្តមណ្ឌលគិរីបានប្រាប់ភ្នំពេញប៉ុស្តិ៍នៅថ្ងៃទី១០ ខែឧសភានេះថា ដំរីនោះមានសភាពស្គម ហើយឃើញមានរបួសដំបៅជើងឆ្វេងមុខធ្ងន់ធ្ងរផងដែរ ដែលគ្រូពេទ្យបច្ចេកទេសជំនាញមកពីសួនសត្វភ្នំតាម៉ៅ ក្នុងខេត្តតាកែវមិនអាចជួយសង្រ្គោះបាន។
លោកបានបញ្ជាក់ថា៖«តាំងពីជាប់ផុងមក វាដាច់ចំណី ដាច់អីមកហ្នឹង ហើយរបួសវាធ្ងន់ធ្ងរ។ វាស្គម ដេកដួលអត់ចំណី។ យើងឱ្យចំណី វាស៊ីអត់កើត។ ជើងវាហើមដំបៅធំ ឃើញមានស្នាមមុត តែមិនដឹងមុតនឹងអី»។
ក្រុមការងារនៃដែនជម្រកសត្វព្រៃភ្នំព្រេច បានប្រទះឃើញសត្វដំរីព្រៃញីមួយក្បាលនោះកំពុងជាប់ក្នុងល្បាប់ភក់ចំណុចអូរក្រាក់ក្នុងបរិវេណក្រុមហ៊ុនដីសម្បទានសេដ្ឋកិច្ច លឹម រ៉ូយ៉ាល់ ស្ថិតក្នុងភូមិជីក្លប់ ឃុំសុខសាន្ត ស្រុកកោះញែក ខេត្តមណ្ឌលគិរី កាលពីថ្ងៃទី៣០ ខែមេសាកន្លងមក។
ក្រុមការងារនៃមន្ទីរបរិស្ថាន ខេត្តមណ្ឌលគិរី រួមសហការជាមួយអង្គការ WWF កម្ពុជា មន្ត្រីជំនាញ និង ក្រុមការងារនៃក្រុមហ៊ុន លឹមរ៉ូយ៉ាល់ បានធ្វើការជួយសង្គ្រោះសត្វដំរីព្រៃញីមួយក្បាលនេះ ដោយយកគ្រឿងចក្រស្ទួចលើកដំរីចេញពីភក់។
ដំរីនោះមានរបួសជើងមុខខាងឆ្វេងនិងផ្នែកពោះអស់រយៈពេលបីថ្ងៃនៅកន្លែងកើតហេតុនោះ។ ក្រុមការងារក៏បានដឹកជញ្ជូនដំរីព្រៃញីមួយក្បាលនេះទៅទីស្នាក់ការកណ្ដាលរយ៉លើ នៃដែនជម្រកសត្វព្រៃលំផាត់មណ្ឌលគិរី។
ពួកគេបានផ្តល់ចំណី និង ទឹកឱ្យដំរីស៊ី និងផឹក ហើយគ្រូពេទ្យមកពីអង្គការសម្ពន្ធ័មិត្តសត្វព្រៃបានធ្វើការព្យាបាលដំរីនោះផងដែរ។
មន្ទីរបរិស្ថានបានបញ្ជាក់ថា ក្រុមការងារបានរៀបចំជីករណ្តៅកប់ខ្មោចដំរីនៅទីស្នាក់ការរយ៉លើដែនជម្រកសត្វព្រៃលំផាត់ ស្ថិតក្នុងភូមិមេមុំ ឃុំរយ៉ ស្រុកកោះញែក ខេត្តមណ្ឌលគិរី។
នេះជាករណីស្លាប់ដំរីលើកទី២ ហើយក្នុងខេត្តមណ្ឌលគិរីក្នុងឆ្នាំ ២០២៤ នេះ។ កាលពីខែមករា កន្លងមក កូនដំរីមួយក្បាលបានស្លាប់ ដោយសារតែត្រូវគ្រាប់កំាំភ្លើង។
លោក ឆៅ ប៊ុនធឿន បានឱ្យដឹងថា មន្ទីរបរិស្ថានខេត្តនៅតែបន្តស្រាវជ្រាវរកជនល្មើសពីការបាញ់សម្លាប់កូនដំរីនោះ ហើយក៏បានបញ្ជូនសំណុំរឿងទៅតុលាការខេត្តរួចរាល់ហើយផងដែរ។
តាមរយៈការសិក្សាស្រាវជ្រាវកន្លងមកបានឱ្យដឹងថា ខេត្តមណ្ឌលគិរី មានសត្វដំរីព្រៃចន្លោះពី ៣៥០ ទៅ ៤០០ក្បាល។ នេះបើយោងតាមលោក ប៊ុនធឿន៕