.jpg)
មន្ត្រីធ្វើការចុះបញ្ជីរបណ្ណក្រីក្រជូនលោកតាម្នាក់។ ក្រសួងសង្គមកិច្ច
ភ្នំពេញៈ លោកនាយករដ្ឋមន្ត្រី ហ៊ុន ម៉ាណែត បានជំរុញឱ្យក្រសួងសង្គមកិច្ចពង្រីកសេវាសុខុមាលភាពសង្គមសម្រាប់ជនក្រីក្រងាយរងគ្រោះ និងបង្កលក្ខណសម្បត្តិល្អប្រសើរដល់គ្រួសារក្នុងការកសាងជីវភាពរស់នៅឱ្យកាន់តែប្រសើរឡើងថែមទៀត។
ក្នុងសារលិខិតអបអរសាទរទិវាអន្តរជាតិស្ដីពីគ្រួសារ ១៥ ឧសភា លោកថ្លែងថា៖ «ក្រសួងសង្គមកិច្ច អតីតយុទ្ធជន និងយុវនីតិសម្បទា ត្រូវបន្តជំរុញការអនុវត្តគោលនយោបាយជាតិនានាតាមរយៈការពង្រឹង និងពង្រីកសេវាសុខុមាលភាពសង្គមសម្រាប់ជនក្រីក្រងាយរងគ្រោះ និងបង្កលក្ខណសម្បត្តិល្អប្រសើរជូនគ្រួសារក្នុងការកសាងជីវភាពរស់នៅឱ្យកាន់តែប្រសើរឡើងបន្ថែមទៀតស្របតាមការអភិវឌ្ឍសង្គមជាតិ»។
លោក ហ៊ុន ម៉ាណែត ជំរុញក្រសួងឱ្យសិក្សារៀបចំកម្មវិធីស្ពានចម្លងសេវាសង្គមដល់គ្រួសារក្រីក្រ ជាពិសេសគ្រួសារ ដែលមានកុមារកំព្រា កុមារដែលត្រូវបានបោះបង់ចោល មនុស្សវ័យចាស់គ្មានទីពឹង ជនមានពិការភាព ជនអនាថា និងអ្នកញៀនគ្រឿងញៀន។
លោកក៏បានអំពាវនាវឱ្យក្រសួងបន្តរៀបចំកម្មវិធីគាំទ្រការអភិវឌ្ឍគ្រួសារ និងសហគមន៍ ដើម្បីលើកស្ទួយកម្រិតជីវភាពរស់នៅរបស់ប្រជាជនគ្រប់រូប។
ក្រៅពីនេះ លោកបានអំពាវនាវដល់ដៃគូអភិវឌ្ឍន៍ អង្គការមិនមែនរដ្ឋាភិបាលទាំងជាតិ និងអន្តរជាតិបន្តចូលរួមឱ្យបានកាន់តែសកម្មបន្ថែមទៀតក្នុងការជួយគាំទ្រដល់សកម្មភាព កម្មវិធីអភិវឌ្ឍន៍គ្រួសារ ទាំងថវិកា និងធនធានមនុស្ស ដើម្បីធានាឱ្យបាននូវការលើកកម្ពស់ដល់ភាពរឹងមាំរបស់គ្រួសារទាំងអស់នៅកម្ពុជា ទោះបីក្នុងដំណាក់កាលដែលពិភពលោកកំពុងជួបប្រទះបញ្ហាសេដ្ឋកិច្ច និងភូមិសាស្ត្រនយោបាយក៏ដោយ។
លោកនាយករដ្ឋមន្ត្រីថ្លែងក្នុងសារលិខិតដែលផ្សព្វផ្សាយនាថ្ងៃទី១០ ឧសភា ថា៖ «ក្រសួង ស្ថាប័នពាក់ព័ន្ធទាំងអស់ អាជ្ញាធរមូលដ្ឋានគ្រប់លំដាប់ថ្នាក់ កាកបាទក្រហមកម្ពុជា សប្បុរសជននានា សូមបន្តជំរុញចលនាលើកកម្ពស់ដល់សុខុមាលភាពគ្រួសារ និងបន្តបង្កើនសកម្មភាពមនុស្សធម៌ឱ្យកាន់តែខ្លាំងក្លាថែមទៀត តាមគ្រប់រូបភាពដែលអាចធ្វើទៅបាន ទាំងការជំរុញចលនានិងសកម្មភាព ទោះធ្វើដោយផ្ទាល់ក្តី ឬដោយប្រយោលក្តី»។
លោក យង់ គិមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍ និងសន្តិភាព ប្រាប់ភ្នំពេញប៉ុស្តិ៍ថា ការលើកឡើងរបស់លោក ហ៊ុន ណែត គឺជារឿងមួយសំខាន់ និងល្អ ដែលឱ្យក្រសួងសង្គមកិច្ច ត្រូវយកទុកដាក់នៅក្នុងការពង្រឹងសុខុមាលភាពសង្គម ជាពិសេសពាក់ព័ន្ធនឹងសុខភាព សន្តិសុខសង្គម និងសេវាសង្គមផ្សេងៗដើម្បីជួយដល់ជនក្រីក្រ ជនងាយរងគ្រោះ។
លោកថ្លែងថា៖ «ទាំងអស់ហ្នឹងគឺសុទ្ធតែជាកត្តាចាំបាច់ហើយជួយឱ្យពួកគាត់អាចរស់នៅបាន មានការងារធ្វើ រស់នៅជួបជុំក្រុមគ្រួសារ កុំឱ្យមានចំណាកស្រុកអីហូរហែ។ រឿងទាំងអស់ហ្នឹងសំខាន់ ប៉ុន្តែរឿងដែលសំខាន់បំផុតគឺទាល់តែមានកម្មវិធី មានផែនការសកម្មភាពជាក់លាក់ដើម្បីធ្វើឱ្យប្រសើរឡើងនូវរឿងទាំងអស់ហ្នឹង ថាតើកម្មវិធីជាក់លាក់ស្អីខ្លះ មានសូចនាករសម្រាប់វាស់វែងអីខ្លះ ដើម្បីឱ្យឃើញអំពីការរីកចម្រើននៃផែនការ ឬក៏យុទ្ធសាស្ត្ររបស់ក្រសួង។ បើពុំនោះទេគឺការលើកឡើងគឺនឹងមិនក្លាយជាការពិតឡើយ»។
ចំណែក លោក យង់ ពៅ អគ្គលេខាធិការនៃរាជបណ្ឌិត្យសភាកម្ពុជា ថ្លែងសាទរចំពោះការជំរុញបែបនេះរបស់លោកនាយករដ្ឋមន្ត្រី ប៉ុន្តែត្រូវធ្វើឱ្យចេញជាលទ្ធផលពិតប្រាកដ កុំឱ្យគ្រាន់តែជាសារនយោបាយ ដោយប្រជាពលរដ្ឋខ្មែរត្រូវទទួលបានឱកាសសមធម៌ទាំងសុខុមាលភាព សេវាអប់រំ មុខរបរ យុត្តិធម៌សង្គម និងសេវាសង្គមផ្សេងៗទៀត។
លោកថ្លែងថា៖ «នេះជាការសំខាន់ដែលឈានឆ្ពោះទៅរស់នៅក្នុងសន្តិភាពប្រកបដោយភាពសុខដុមជាមួយគ្នាបាន។ ប្រសិនបើទាំងអស់នោះយើងមិនបានផ្ដល់សមធម៌ទៅដល់គ្រប់គ្រួសារទេ គឺវានឹងមិនមានភាពសុខដុមទេ។ សន្តិភាព ក៏ប៉ុន្តែខ្វះភាពសុខដុម ហើយបើខ្វះភាពសុខដុម វាអាចរុញទៅមានបញ្ហាវិសមភាពសង្គមកាន់តែខ្លាំង។ វានាំដល់បញ្ហាផ្សេងទៀត»។
នាថ្ងៃទី១០ ខែឧសភា នេះ ក្រសួងសង្គមកិច្ចបានចេញសារាចរណែនាំ ដែលក្នុងនោះក៏បានឱ្យអង្គភាពក្រោមឱវាទកៀរគរប្រភពធនធានពីអង្គការជាតិ ដៃគូអភិវឌ្ឍន៍ សប្បុរសជន ជួយអភិវឌ្ឍគ្រួសារក្រីក្រងាយរងគ្រោះតាមសហគមន៍៕
