.jpg)
ភ្នំពេញៈ ការព្យាករណ៍សម្រាប់ឆ្នាំ ២០២៤នេះបង្ហាញថា ករណីផ្គរន្ទះ គឺនឹងអាចកើតឡើងច្រើនជាងឆ្នាំមុន ដែលទាមទារឱ្យបន្តការផ្សព្វផ្សាយ និងស្វែងយល់ឱ្យបានច្បាស់លាស់ពីវិធានការការពារបាតុភូតរន្ទះបាញ់នេះ ដើម្បីកាត់បន្ថយគ្រោះថ្នាក់បាត់បង់ជីវិត។ នេះបើយោងតាមគណៈកម្មាធិការជាតិគ្រប់គ្រងគ្រោះមហន្តរាយ។
លោក សុទ្ធ គឹមកុលមុន្នី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយបានប្រាប់ភ្នំពេញប៉ុស្តិ៍ថា រដូវវស្សាបានចូលមកដល់ក្នុងរង្វង់ ១សប្តាហ៍នេះ ហើយមានភ្លៀងធ្លាក់ លាយឡំនិងផ្គររន្ទះ ខ្យល់កន្រ្ទាក់ ដែលបង្កឱ្យមានផលប៉ះផលច្រើនផងដែរ។ ក្នុងនោះ មានបាតុភូតរន្ទះបាញ់ ប្រមាណជា ៣ ទៅ ៤ ករណី ដែលបណ្តាលឱ្យមានមនុស្សស្លាប់ និងឆេះផ្ទះពលរដ្ឋ និង ងាប់សត្វពាហនៈផងដែរ។
លោកបានបញ្ជាក់ថា៖«ចំពោះករណីរន្ទះបាញ់នេះ ពីមួយឆ្នាំទៅមួយឆ្នាំ គឺមានការកើនឡើង បើយើងធ្វើការប្រៀបធៀបឆ្នាំនីមួយៗ។ [បើធៀប] ឆ្នាំ ២០២២ និង ២០២៣ មានការកើនឡើង។ ការព្យាករណ៍សម្រាប់ឆ្នាំ ២០២៤ នេះ ករណីផ្គរន្ទះគឺនឹងអាចកើតឡើងច្រើនជាងឆ្នាំមុន បើតាមយើងសង្កេតទៅលើបាតុភូតអាកាសធាតុ ដែលកើតមាន»។
កាលពីឆ្នាំ២០២៣ រន្ទះបាញ់បានកើតឡើងចំនួន១៤៣លើក ដែលក្នុងនោះបណ្តាលឱ្យខូចខាតផ្ទះចំនួន ១៦ខ្នង ងាប់គោក្របីចំនួន ១០៧ក្បាល ស្លាប់មនុស្ស ៨៤នាក់ និងរបួស ៥៩នាក់។ រីឯកាលពីឆ្នាំ២០២២ រន្ទះបាញ់បានកើតឡើងចំនួន ១១០ លើកដែលបណ្ដាលឱ្យខូចខាតផ្ទះពលរដ្ឋ ចំនួន ២៣ខ្នង ងាប់គោក្របី ៩០ក្បាល ស្លាប់មនុស្ស ៦៣ នាក់ និងរងរបួស ៥៨នាក់ផងដែរ។
លោកបានថ្លែងបន្តថា ឆ្នាំ ២០២៤ នេះ មានបាតុភូតអ៊ែលនីណូ (El Nino) ដែលជាកត្តាមួយ ដែលនាំឱ្យកើតមានកំដៅ ហើយចូលដល់រដូវវស្សានឹងមានបាតុភូតករណីផ្គរន្ទះនេះច្រើន ដែលនេះជាបញ្ហាហានិភ័យមួយ ត្រូវយកចិត្តទុកដាក់ ដើម្បីកាត់បន្ថយនូវផលប៉ះពាល់ពីរន្ទះបាញ់។
លោកបញ្ជាក់ថា៖«ទោះបីយើងមិនអាចថា លុបបំបាត់ រឺទប់ស្កាត់បានខ្លាំងទៅលើករណីនេះ តែយើងអាចកាត់បន្ថយបានពីផលប៉ះពាល់ពីរន្ទះបាញ់។ ជាបច្ចេកទេស គឺយើងអាចដំឡើង ប្រព័ន្ធការពាររន្ទះ ដែលអាចស្រូបរន្ទះកុំឱ្យបាញ់នៅក្នុងតំបន់ដែលអាចនឹងកើតមាន»។
លោកបន្ថែមថា រដ្ឋាភិបាល ក៏ដូចជាក្រុមការងារពាក់ព័ន្ធបានដំឡើងប្រព័ន្ធការពាររន្ទះនេះរួចខ្លះមកហើយ និងក៏ទទួលបានជោគជ័យហើយផងដែរ ដោយវាអាចកាត់បន្ថយនូវរន្ទះបាញ់បាន ដូចជា នៅក្នុងខេត្តសៀមរាបជាដើម។
លោកបានឱ្យដឹងថា ក្រសួងធនធានទឹក និង ឧតុនិយម កាកបាតក្រហមកម្ពុជា គណៈកម្មាធិការជាតិគ្រប់គ្រងគ្រោះមហន្តរាយ អាជ្ញាធរមូលដ្ឋាន និងភាគីពាក់ព័ន្ធផ្សេងៗទៀតបានធ្វើការផ្សព្វផ្សាយ ចេញជាខិត្តប័ណ្ណ ឬសារណែនាំជាច្រើន ទាក់ទងទៅនឹងវិធានការការពាររន្ទះបាញ់នេះ ដល់ប្រជាពលរដ្ឋ។ ហេតុនេះ ដើម្បីកាត់បន្ថែមករណីរន្ទះបាញ់នេះ គឺសុំឱ្យពលរដ្ឋម្នាក់ៗធ្វើការស្វែងយល់អំពីករណីរន្ទះបាញ់នេះឱ្យបានច្បាស់លាស់ ថាតើវាជាបាតុភូតយ៉ាងម៉េច ហើយកើតឡើងនៅពេលណា និងរកវិធានការណ៍ការពារអាយុជីវិត។
លោកបានពន្យល់ថា បាតុភូតរន្ទះបាញ់កើតឡើងនៅមុនពេលភ្លៀងមកដល់ ពោលគឺពេលជិតចាប់ផ្តើមភ្លៀងធ្លាក់ គឺចាប់ផ្តើមមានផ្គររន្ទះហើយ ដែលទាមទារឱ្យមានការប្រុងប្រយ័ត្នក្នុងអំឡុងពេលនោះ។
លោក គឹមកុលមុន្នី បានគូសបញ្ជាក់ថា៖«សម្រាប់ឆ្នាំនេះ គឺអាចនឹងមានផ្គររន្ទះច្រើន អញ្ជឹងពលរដ្ឋយើងម្នាក់ៗគួរតែត្រៀមលក្ខណៈ ចាត់វិធានការយ៉ាងម៉េចកុំទៅតំបន់ដែលមានរន្ទះបាញ់ ឬជ្រកកោនកន្លែងណាដែលអាចឱ្យមានរន្ទះបាញ់។ ចឹងត្រូវមើលសារណែនាំរបស់ជំនាញដែលបានធ្វើយូរមកហើយឱ្យបានច្រើន ដើម្បីកាត់បន្ថយផលប៉ះពាល់នេះ។ ក្នុងរដូវនេះគួរជំរុញការផ្សព្វផ្សាយបន្ថែមទៀត»។
លោក លីវ សុខុន អ្នកនាំពាក្យសាលាខេត្ត និងជាប្រធានមន្ទីរព័ត៌មានខេត្តសៀមរាប បានកត់សម្គាល់ថា នាពេលបច្ចុប្បនេះ ក្រសួងធនធានទឹក និង ឧតុនិយម តែងតែចេញសេចក្តីជូនដំណឹងពីស្ថានភាពអាកាស ឬ ឧតុនិយម ជារៀងរាល់ថ្ងៃ ហើយអាជ្ញាធរខេត្តក៏បានយកទៅផ្សព្វផ្សាយបន្តដល់ប្រជាពលរដ្ឋ ដូចជាតាមបណ្តេញសង្គមហ្វេសប៊ុក តេលេក្រាម និងតាមកម្មវិធីផ្សេងៗជាដើម។
លោកបានថ្លែងថា៖«សេចក្តីជូនដំណឹងនោះមានរៀបរាប់ថ្ងៃណាមានបញ្ហាយ៉ាងម៉េច មានអាកាសធាតុយ៉ាងម៉េច ហើយមានប្រាប់ពីផ្គររន្ទះ ខ្យល់កន្រ្ទាក់ជាដើម។ យើងផ្សព្វផ្សាយទៅដល់ប្រជាពលរដ្ឋតាមគ្រប់រូបភាពហ្នឹង ដើម្បីបញ្ជ្រាបឱ្យពលរដ្ឋបានដឹង»៕
