ភ្នំពេញ៖ លោកនាយករដ្ឋមន្ត្រី ហ៊ុន ម៉ាណែត ស្នើអង្គការអន្តរជាតិខាងការងារ (ILO) បន្តកសាងមូលធនមនុស្សនៅកម្ពុជាដើម្បីឱ្យឆ្លើយតបតម្រូវការទីផ្សារ ដោយកសាងសមត្ថភាពឱ្យមានជំនាញខ្ពស់ដើម្បីឱ្យកម្ពុជាសម្រេចបានគោលដៅក្លាយជាប្រទេសដែលមានចំណូលខ្ពស់នៅឆ្នាំ២០៥០។
លោកស្នើដូច្នេះក្នុងជំនួបជាមួយលោកស្រី Chihoko Asada Miyakawa ឧបការីអគ្គនាយក និងជានាយិកាប្រចាំតំបន់អាស៊ី-ប៉ាស៊ីហ្វិក នៃអង្គការ ILO នាថ្ងៃទី១០ ខែឧសភា នៅវិមានសន្តិភាព។
ក្នុងជំនួបនេះ លោក ហ៊ុន ម៉ាណែត បានកោតសរសើរចំពោះការប្ដេជ្ញាចិត្តរបស់លោកស្រី Miyakawa ក្នុងការបន្តគាំទ្រ និងចូលរួមចំណែកអភិវឌ្ឍសង្គម-សេដ្ឋកិច្ចកម្ពុជា ខណៈលោកនាយករដ្ឋមន្ត្រីបានគាំទ្រកម្មវិធីដែលមានស្រាប់របស់ ILO នៅកម្ពុជា។
សេចក្ដីប្រកាសព័ត៌មានខុទ្ទកាល័យនាយករដ្ឋមន្ត្រីបញ្ជាក់ថា៖ «សម្ដេចធិបតីលើកទឹកចិត្តឱ្យ ILO បន្តគាំទ្រដល់វិស័យការងារនៅកម្ពុជាបន្ថែមទៀត ជាពិសេសការកសាងមូលធនមនុស្សឱ្យឆ្លើយតបទៅនឹងតម្រូវការជាក់ស្ដែងរបស់ទីផ្សារតាមរយៈការកសាងសមត្ថភាពឱ្យមានជំនាញខ្ពស់ និងជំនាញប្រកបដោយភាពបត់បែន ដើម្បីចូលរួមចំណែកក្នុងការសម្រេចបាននូវគោលដៅរបស់កម្ពុជាក្នុងឆ្នាំ២០៥០ ក្លាយជាប្រទេសដែលមានចំណូលខ្ពស់»។
លោក ហ៊ុន ម៉ាណែត បានបញ្ជាក់អំពីកិច្ចសហប្រតិបត្តិការដ៏យូរអង្វែងរវាងអង្គការ ILO និងកម្ពុជា និងបានប្រកាសការប្តេជ្ញាចិត្តបន្តពង្រឹងកិច្ចសហប្រតិបត្តិការរវាងភាគីទាំង២បន្ថែមទៀត។
លោកបញ្ជាក់ប្រាប់លោកស្រី Miyakawa ថា រាជរដ្ឋាភិបាលបានយកចិត្តទុកដាក់ជាអាទិភាពលើការកសាងសុខដុមនីយកម្មនៅតាមរោងចក្រ និងសហគ្រាស ដើម្បីធ្វើយ៉ាងណាធានាឱ្យបានបរិយាកាសការងារដ៏ល្អសម្រាប់និយោជិត និងនិយោជក និងពង្រឹងលក្ខខណ្ឌការងារឱ្យកាន់តែប្រសើរឡើងសម្រាប់កម្មករនិយោជិត។
លោកបន្ថែមថា រាជរដ្ឋាភិបាល ក៏តែងតែយកចិត្តទុកដាក់ខ្ពស់ក្នុងការដាក់ចេញនូវវិធានការដោះស្រាយឱ្យបានទាន់ពេល និងប្រកបដោយប្រសិទ្ធភាពនៅពេលមានវិវាទការងារកើតឡើង តាមរយៈក្រសួងការងារ និងបណ្ដុះបណ្ដាលវិជ្ជាជីវៈ។
សេចក្ដីប្រកាសព័ត៌មានដដែលបញ្ជាក់ថា ក្នុងជំនួបនោះ លោកស្រី Miyakawa បានបញ្ជាក់ពីការបន្តជួយគាំទ្ររបស់ ILO ដល់រាជរដ្ឋាភិបាលកម្ពុជាក្នុងក្របខ័ណ្ឌគោលនយោបាយ និងក្របខ័ណ្ឌយុទ្ធសាស្ត្ររបស់រាជរដ្ឋាភិបាល។
រាជរដ្ឋាភិបាលកម្ពុជាកន្លងមកបានដាក់ចេញគោលនយោបាយគាំពារសង្គមសម្រាប់គ្រួសារក្រីក្រ ក្រុមជនងាយរងគ្រោះ និងកម្មករនិយោជិត ក្នុងគ្រាលំបាកនៃវិបត្តិជំងឺកូវីដ ១៩។
រាជរដ្ឋាភិបាលកម្ពុជាក៏បានដាក់ចេញកម្មវិធីនយោបាយដែលមានគោលបំណងរួមចំណែក និងគាំទ្រដល់វិស័យការងារ និងបណ្ដុះបណ្ដាលវិជ្ជាជីវៈ និងជាពិសេសគាំទ្រដល់សមាគមនានាក្នុងការលើកកម្ពស់ទំនាក់ទំនងវិជ្ជាជីវៈប្រកបដោយសុខដុមនីយកម្មក្នុងរោងចក្រ និងសហគ្រាស។
រាជរដ្ឋាភិបាលអាណត្តិទីទី៧ នេះបានប្ដេជ្ញាចិត្តបន្តយកចិត្តទុកដាក់ និងលើកកម្ពស់ជីវភាពរបស់ប្រជាពលរដ្ឋ ដោយបានដាក់ចេញគោលនយោបាយអាទិភាពទាំង៦ ដើម្បីធ្វើឱ្យប្រសើរឡើងនូវប្រព័ន្ធសុខាភិបាល ការកែទម្រង់ប្រព័ន្ធអប់រំ និងកិច្ចគាំពារសង្គម។
ប្រទេសកម្ពុជាកំពុងត្រៀមខ្លួនចាកចេញពីចំណាត់ថ្នាក់ក្រុមប្រទេសអភិវឌ្ឍន៍តិចតួច (LDC) នៅឆ្នាំ ២០២៩៕