សៀមរាបៈ ជនត្រូវចោទចំនួន ៣នាក់បន្ថែមទៀត ត្រូវបានតុលាការសាលាដំបូងខេត្តសៀមរាប សម្រេចឃុំខ្លួនបណ្តោះអាសន្ន ដែលធ្វើឱ្យចំនួនអ្នកជាប់ឃុំខ្លួនសរុបឡើងដល់ ៨នាក់ គិតត្រឹមថ្ងៃទី៩ ខែឧសភា ពាក់ព័ន្ធទៅនឹងករណីរំលោភបូកមានគ្នាជាង១០នាក់ទៅលើក្មេងស្រីអាយុ ១៥ឆ្នាំ កាលពីខែមេសា កន្លងមកក្នុងខេត្តសៀមរាប។
មន្ត្រីនគរបាលយុត្តិធម៌បាននាំខ្លួនជនត្រូវចោទចំនួន ៣នាក់បន្ថែមទៀតទៅបង្ហាញខ្លួនចំពោះមុខចៅក្រមស៊ើបសួរនាថ្ងៃទី៧ ខែឧសភា ឆ្នាំ២០២៤ ពាក់ព័ន្ធនឹង សំណុំរឿង "រំលោភសេពសន្ថវៈមានស្ថានទម្ងន់ទោស”នេះ។ នេះបើយោងតាមសេចក្តីប្រកាសព័ត៌មានរបស់សាលាដំបូងខេត្តសៀមរាប ចុះថ្ងៃទី៨ ខែឧសភា។
តុលាការបានបញ្ជាក់ថា៖ «ក្រោយពីបានសួរចម្លើយជនត្រូវចោទទាំងបីនាក់រួចមក និង បានពិនិត្យភស្តុតាងក្នុងសំណុំរឿង ព្រមទាំងពិចារណាអង្គហេតុ និង អង្គច្បាប់ ចៅក្រមស៊ើបសួរបានសម្រេចឃុំខ្លួនជនត្រូវចោទខាងលើជាបណ្តោះអាសន្ននិងបានបញ្ជូនទៅពន្ធនាគារខេត្តសៀមរាប ដើម្បីបន្តការស៊ើបសួរតាមនីតិវិធីច្បាប់»។
សាលាដំបូងខេត្តសៀមរាបនឹងបន្តចាត់ការ សំណុំរឿងនេះឱ្យបានឆាប់រហ័ស និង ត្រឹមត្រូវតាមនីតិវិធីច្បាប់ជាធរមាន ដើម្បីរកយុត្តិធម៌ជូនអ្នកពាក់ព័ន្ធទាំងអស់។ ទោះយ៉ាងណារហូតមកដល់នឹងថ្ងៃទី៩ ខែឧសភានេះ មិនទាន់មានជនសង្ស័យបន្ថែមទៀតត្រូវបានចោទប្រកាន់ រឺឃុំខ្លួននោះទេ។ នេះបើយោងតាមលោក យិន ស្រាង ប្រធានលេខាធិការដ្ឋាននៃសាលាដំបូងខេត្តសៀមរាប។
លោកបានបញ្ជាក់ថា៖«ចៅក្រមស៊ើបសួរកំពុងតែមានចំណាត់ការជាបន្តបន្ទាប់ហើយ...បើមានអីថ្មីបន្ថែមទៀត និងមានសេចក្តីប្រកាសព័ត៌មានថែមទៀតហើយ សូមរងចាំទៅ»។
លោកក៏បានបញ្ជាក់ផងដែរថា តាមដីកាសន្និដ្ឋានរបស់ព្រះរាជអាជ្ញា សំណុំរឿងនេះមានជនសង្ស័យជាង ១០នាក់។ ប៉ុន្តែភាគីខាងដើមបណ្តឹងបានអះអាងថា មានរហូតដល់ទៅ ២០នាក់ឯនោះ។
ករណីរំលោភសេពសន្ថវៈមានស្ថានទម្ងន់ទោសនេះបានប្រព្រឹត្តនៅទីកន្លែង ៣ផ្សេងៗគ្នា។
ក្នុងនោះរួមមាននៅផ្ទះរបស់ឈ្មោះ និត ស្ថិតនៅភូមិវត្តបូព៌ សង្កាត់សាលាកំរើក ក្រុងសៀមរាប កាលពីថ្ងៃទី១៥ ខែមេសា កន្លងមក និងនៅផ្ទះរបស់ឈ្មោះ ត្រា ស្ថិតនៅភូមិអញ្ចាញ សង្កាត់នគរធំ ក្រុងសៀមរាបកាលពីថ្ងៃទី១៦ ខែមេសា និងចុងក្រោយនៅផ្ទះរបស់ឈ្មោះ វណ្ណា នៅភូមិព្រះដាក់ ឃុំព្រះដាក់ ស្រុកបន្ទាយស្រី ខេត្តសៀមរាប កាលពីថ្ងៃទី១៧ ខែមេសា ឆ្នាំ២០២៤នេះ។
ជនសង្ស័យចំនួន ១៥នាក់ត្រូវបានចាប់ខ្លួនក្នុងសំណុំរឿងរំលោភសេពសន្ថវៈមានស្ថានទម្ងន់ទោសនេះ។ ក្រោយពីបានពិនិត្យសំណុំរឿង ចម្លើយជនសង្ស័យ ចម្លើយជនរងគ្រោះ ព្រមទាំងបានពិនិត្យភស្តុតាងនានារួចមក តំណាងអយ្យការបានសម្រេចចោទប្រកាន់ជនសង្ស័យចំនួន ១៤នាក់ តែត្រូវបានចៅក្រមស៊ើបសួរសម្រេចឃុំខ្លួនជនត្រូវចោទទាំង ៥នាក់។
ដោយឡែក ចំពោះជនសង្ស័យចំនួនម្នាក់អាយុ ១៥ឆ្នាំ ដែលរកឃើញថាមិនមានភស្តុតាង ដើម្បីចោទប្រកាន់នោះ ត្រូវបានតំណាងអយ្យការអនុញ្ញាតឱ្យត្រលប់ទៅគេហឋានវិញជាបណ្ដោះអាសន្ន ទៅតាមពាក្យស្នើសុំរបស់មេធាវី និងអាណាព្យាបាលរបស់ជននេះ។
ឪពុកក្មេងស្រីក្នុងបទល្មើសរំលោភសេពសន្ថវៈ ឈ្មោះពេជ្រ សុវ័ន្ត ត្រូវបានចោទប្រកាន់ពីបទ ហិង្សាដោយចេតនា ប្រព្រឹត្តនៅបញ្ជាការដ្ឋានកងរាជអាវុធហត្ថខេត្តសៀមរាប កាលពីថ្ងៃទី១៩ ខែមេសា ក្រោយពីបានប្រើអំពើហិង្សា ដោយទាត់ លើជនសង្ស័យដែលរំលោភកូនគាត់ ឈ្មោះ ឡុង សេងឡាយ ១៥ឆ្នាំចំផ្ទៃមុខបណ្តាលឱ្យរបួសត្រង់ភ្នែកខាងស្តាំ និងហូរឈាមច្រមុះ នៅពេលដែលមន្ត្រីកងរាជអាវុធហត្ថកំពុងរៀបចំបញ្ជូនឈ្មោះ ឡុង សេងឡាយទៅសាលាដំបូងខេត្តសៀមរាប។
បន្ទាប់ពីទទួលបានពាក្យបណ្ដឹងពីម្តាយរបស់ឈ្មោះ ឡុង សេងឡាយ មន្ត្រីកងរាជអាវុធហត្ថបានកសាងសំណុំរឿងបញ្ជូនមកអយ្យការអមសាលាដំបូងខេត្តសៀមរាប។ ក្រោយពីពិនិត្យសំណុំរឿង និងសួរចម្លើយជនសង្ស័យ តំណាងអយ្យការបានសម្រេចចោទប្រកាន់ជនសង្ស័យឈ្មោះ ពេជ្រ សុវ័ន្ត ពីបទហិង្សាដោយចេតនា រួចបានបញ្ជូនទៅចៅក្រមស៊ើបសួរ ហើយចៅក្រមបានសម្រេចឃុំខ្លួនជាបណ្តោះអាសន្ន។
ប៉ុន្តែក្រោយពី ក្រសួងយុត្តិធម៌ កាលពីថ្ងៃទី៣ ខែឧសភាបានស្នើសុំឱ្យសាលាដំបូងខេត្តពិចារណាឡើងវិញលើទិដ្ឋភាពច្បាប់ និងពិនិត្យលទ្ធភាពតាមផ្លូវច្បាប់លើករណីហិង្សានេះ ចៅក្រមស៊ើបសួរបានសម្រេចដោះលែង ជនត្រូវចោទ ឈ្មោះ ពេជ្រ សុវ័ន្ត ឱ្យនៅក្រៅឃុំជាបណ្តោះអាសន្ន និងបន្តការស៊ើបសួរលើសំណុំរឿងនេះតាមនីតិវិធីច្បាប់។
ក្មេងស្រីរងគ្រោះត្រូវបានអង្គការអាហ្វេស៊ីបកម្ពុជា (AFESIP Cambodia) យកទៅឱ្យស្នាក់នៅ និង ព្យាបាល៕