.jpg)
រថយន្តដឹកទំនិញដែលកែច្នៃដឹកកម្មករនាពេលកន្លងមក។ ភ្នំំពេញ ប៉ុស្តិ៍
កណ្តាលៈ មន្ត្រីបានឱ្យដឹងថា រថយន្តដឹកទំនិញដែលកែច្នៃដឹកកម្មករពេលបច្ចុប្បន្ននឹងត្រូវបានផ្លាស់ប្ដូរទៅជារថយន្តដឹកអ្នកដំណើរសម្រាប់ដឹកកម្មករយ៉ាងយូរត្រឹមឆ្នាំ២០២៧ ដែលមានរយៈពេលប្រមាណ៣ឆ្នាំទៀតដើម្បីកាត់បន្ថយអត្រាគ្រោះថ្នាក់ចរាចរណ៍ឱ្យនៅកម្រិតទាបបំផុត។
លោក ហេង សុផាន់ណារិទ្ធ អគ្គនាយករងនៃបេឡាជាតិសន្តិសុខសង្គម (ប.ស.ស.) នៃក្រសួងការងារ និងបណ្ដុះបណ្ដាលវិជ្ជាជីវៈ បានថ្លែងថា ការពង្រឹងការអប់រំ និងការផ្សព្វផ្សាយលើកកម្ពស់សុខុមាលភាព ក៏ដូចជាការបង្ការហានិភ័យការងារ គឺជារឿងចាំបាច់បំផុតដែលត្រូវយកចិត្តទុកដាក់ខ្ពស់ក្នុងការធ្វើឱ្យប្រសើរឡើងនូវសុខុមាលភាព និងសុខសុវត្ថិភាពរបស់កម្មករនិយោជិតក្នុងពេលបំពេញការងារ។
លោកថ្លែងបន្តថា ដើម្បីធ្វើឱ្យប្រសើរឡើងនូវសុខុមាលភាព និងសុខសុវត្ថិភាពរបស់កម្មករនិយោជិតក្នុងពេលបំពេញការងារ ប.ស.ស. បានកំណត់សកម្មភាពផ្សព្វផ្សាយស្ដីពីសុវត្ថិភាពចរាចរណ៍ពេលធ្វើដំណើរ និងលក្ខខណ្ឌអនាម័យ សុវត្ថិភាពការងារ លក្ខខណ្ឌការងារ អត្ថប្រយោជន៍របបសន្តិសុខសង្គម ជាពិសេសការរៀបចំមធ្យោបាយធ្វើដំណើរសមរម្យសម្រាប់កម្មករនិយោជិត សំដៅលើកកម្ពស់កម្មវិធីបង្ការហានិភ័យការងារ។
លោក ហេង សុផាន់ណារិទ្ធ ថ្លែងដូច្នេះក្នុងពិធីអប់រំផ្សព្វផ្សាយច្បាប់ស្តីពីសុវត្ថិភាពចរាចរណ៍ផ្លូវគោកដល់កម្មករនិយោជិត នាថ្ងៃទី៩ ខែឧសភា នៅរោងចក្រ Bowker Garment Factory (CAMBODIA) នៅស្រុកអង្គស្នួល ខេត្តកណ្ដាល ។
លោកថ្លែងថា៖ «[ប.ស.ស.] ត្រូវធ្វើបញ្ជីបច្ចុប្បន្នភាពអ្នកបើកបរយានយន្តដឹកកម្មករនិយោជិតជាប្រចាំ និងត្រូវធ្វើការសិក្សាសមិទ្ធិលទ្ធភាពអំពីជម្រើសក្នុងការជំរុញការផ្លាស់ប្ដូររថយន្តដឹកទំនិញដែលកែច្នៃដឹកកម្មករនិយោជិតពេលបច្ចុប្បន្នទៅជារថយន្តដឹកអ្នកដំណើរសម្រាប់ដឹកបងប្អូនកម្មករនិយោជិត ដែលអាចស្ថិតនៅក្រោមការគ្រប់គ្រងរបស់ក្រុមហ៊ុន ឬអង្គភាពណាមួយច្បាស់លាស់យ៉ាងយូរត្រឹមឆ្នាំ២០២៧»។
លោកអគ្គនាយករងបន្តថា ការជំរុញឱ្យមានការផ្លាស់ប្ដូររថយន្តនេះ មានគោលបំណង «ធ្វើឱ្យប្រសើរឡើងនូវសុខុមាលភាព និងអាចកាត់បន្ថយអត្រាគ្រោះថ្នាក់ចរាចរណ៍ផ្លូវគោកឱ្យនៅកម្រិតទាបបំផុត ដែលអាចរក្សាបាននូវសុខសុវត្ថិភាពក្នុងពេលធ្វើដំណើររបស់បងប្អូនកម្មករនិយោជិត»។
ក្រសួងការងារបានដាក់ចេញផែនការយុទ្ធសាស្ត្រអភិវឌ្ឍន៍វិស័យការងារសន្តិសុខសង្គម និងបណ្ដុះបណ្ដាលវិជ្ជាជីវៈឆ្នាំ២០២៤-២០២៨ ដើម្បីលើកកម្ពស់ការយល់ដឹង និងពង្រឹងការអនុវត្តច្បាប់ស្ដីពីរបបសន្តិសុខសង្គម និងដើម្បីកាត់បន្ថយអត្រាគ្រោះថ្នាក់ការងារឱ្យបានជាអតិបរមា។
នៅក្នុងពិធីនេះ លោក ចេវ ហាក់ អគ្គស្នងការរងនគរបាលជាតិ នៃក្រសួងមហាផ្ទៃបានអំពាវនាវដល់កម្មករនិយោជិតបង្កើនការប្រុងប្រយ័ត្នឱ្យបានខ្ពស់ក្នុងការធ្វើដំណើរ និងជំរុញដល់អ្នកធ្វើដំណើរដោយម៉ូតូ និងអ្នកធ្វើដំណើរដោយរថយន្តដឹកកម្មករនិយោជិតត្រូវគោរពច្បាប់ចរាចរណ៍ឱ្យបានត្រឹមត្រូវ ដើម្បីចៀសវាងករណីគ្រោះថ្នាក់។
លោកអំពាវនាវដល់អ្នកបើកបររថយន្តដឹកកម្មករនិយោជិតត្រូវមានស្មារតីទទួលខុសត្រូវ និងយកចិត្តទុកដាក់រាល់ពេលបើកបរ ដោយត្រូវគោរពច្បាប់ចរាចរណ៍ផ្លូវគោកឱ្យបានខ្ជាប់ខ្ជួន ចៀសវាងបង្កជាហានិភ័យគ្រោះថ្នាក់ណាមួយកើតឡើង ព្រោះកម្មករនិយោជិតរាប់សិបនាក់បានផ្ញើជីវិតនៅលើរថយន្តរបស់អ្នកបើកបរតែម្នាក់គត់។
លោក ហាក់ សុខមករា អភិបាលរងខេត្តកណ្ដាលស្នើដល់ម្ចាស់រោងចក្រ សហគ្រាស ទាំងអស់ក្នុងទឹកដីខេត្តកណ្តាលត្រូវជំរុញ លើកទឹកចិត្ត និងផ្ដល់ពេលវេលាគ្រប់គ្រាន់ដល់កម្មករនិយោជិតទាំងអស់ដែលកំពុងបំពេញការងារនៅតាមរោងចក្រ សហគ្រាស របស់ខ្លួនឱ្យចូលរួមពិធីអប់រំផ្សព្វផ្សាយនានាពាក់ព័ន្ធនឹងច្បាប់ស្ដីពីសុវត្ថិភាពចរាចរណ៍ផ្លូកគោក៕
