.jpg)
អង្គភាពប្រឆាំងអំពើពុករលួយ។ ភ្នំំពេញ ប៉ុស្តិ៍
ទោះបីជារាជរដ្ឋាភិបាលបញ្ជាក់យ៉ាងច្បាស់ថា អ្នកចេះទើបជាប់ក្នុងការប្រឡងចូលក្របខណ្ឌរដ្ឋក៏ដោយ ក៏អំពើឆបោកយកប្រាក់ដើម្បីជាថ្នូរនឹងការទទួលបានក្របខណ្ឌនេះនៅតែបន្តកើតឡើង។
នៅថ្ងៃទី៩ ខែឧសភានេះ អង្គភាពប្រឆាំងអំពើពុករលួយបានបញ្ជូនជនសង្ស័យ៣នាក់ រួមមានគ្រូបង្រៀន២នាក់ និងមន្ត្រីថ្នាក់ការិយាល័យនៅក្រសួងផែនការម្នាក់ទៅកាន់អយ្យការអមសាលាដំបូងរាជធានីភ្នំពេញដើម្បីចាត់ការតាមនីតិវិធីច្បាប់។
ការឃាត់ខ្លួននេះធ្វើឡើងក្រោយពេលត្រូវបានរកឃើញថាមានពាក់ព័ន្ធនឹងករណីរត់ការចូលក្របខណ្ឌគ្រូបង្រៀន និងតាមក្រសួងស្ថាប័នផ្សេងទៀត។
បើតាមគ្រុបតេឡេក្រាមរបស់ក្រសួងយុត្តធម៌ ជនសង្ស័យទាំង ៣រូបមានឈ្មោះ រុន ភេទប្រុស អាយុ៣៨ឆ្នាំ ជាគ្រូបង្រៀននៅវិទ្យាល័យសុខអានព្រៃសណ្តែក, ឈ្មោះ ស៊ុន ពេជ្រសុមាលី ភេទស្រី អាយុ ៤៣ឆ្នាំ ជាគ្រូបង្រៀនសាលាបឋមសិក្សាធន់មន់ និងឈ្មោះ ពិសិដ្ឋ ភេទប្រុស អាយុ៣៥ឆ្នាំ ជាអនុប្រធានការិយាល័យអភិវឌ្ឍន៍ជនបទនៃក្រសួងផែនការ។
ព័ត៌មានក្នុងគ្រុបតេឡេក្រាមបញ្ជាក់ថា៖ «ជនសង្ស័យទាំង ៣នាក់ ត្រូវបានអង្គភាពប្រឆាំងអំពើពុករលួយរកឃើញថា បានសហការគ្នារត់ការបញ្ចូលចូលក្របខណ្ឌ ដោយខុសច្បាប់តាំងពីឆ្នាំ ២០២៣ ដល់ដើមខែឧសភា ឆ្នាំ ២០២៤ ក្នុងនោះមានសកម្មភាពដូចជា ការរត់ការចូលក្របខណ្ឌរដ្ឋ ការរត់ការចូលក្របខណ្ឌគ្រូបង្រៀន និង ក្របខណ្ឌក្រសួងផ្សេងៗទៀត ការទទួលធ្វើសញ្ញាបត្រក្លែងគ្រប់ប្រភេទ ដូចជា សញ្ញាបត្របាក់ឌុប សញ្ញាបត្របរិញ្ញាបត្រ និងសញ្ញាបត្របរិញ្ញាបត្រជាន់ខ្ពស់ជាដើម ក្នុងតម្លៃចាប់ពី ៤៥០ដុល្លារអាមេរិក ដល់ ១.៥០០ដុល្លារអាមេរិក។
ប្រភពដដែលបន្តថា៖ «ចំពោះការរត់ការចូលក្របខណ្ឌរដ្ឋវិញ ក៏យកតម្លៃចាប់ពី ១១.០០០ដុល្លារអាមេរិក ដល់ ១៦.០០០ដុល្លារអាមេរិក តាមប្រភេទក្របខណ្ឌផ្សេងៗគ្នា»។
មិនមានការបញ្ជាក់ថា ជនសង្ស័យបានប្រមូលប្រាក់បានប៉ុន្មាន ឬមានមនុស្សប៉ុន្មាននាក់បានផ្ដល់ប្រាក់ឲ្យពួកគេ ចាប់តាំងពីពួកគេចាប់ផ្ដើមធ្វើសកម្មភាពនេះ៕
