អង្គការតម្លាភាពអន្តរជាតិអូស្ត្រាលីបានចេញរបាយការណ៍មួយ ដោយសង្ស័យពីប្រភពប្រាក់មានប្រភពពីកម្ពុជាដែលវិនិយោគទៅលើវិស័យអចលនទ្រព្យឬលំនៅដ្ឋាន ក្នុងប្រទេសអូស្ត្រាលី ដោយពួកគេសង្ស័យថាមានជាប់ពាក់ព័ន្ធនឹងការសម្អាតប្រាក់ ឬអំពើខុសច្បាប់។ ប៉ុន្តែអ្នកជំនាញយល់ថា ពលរដ្ឋកម្ពុជាខ្លះមានធនធាន ហើយគួរតែមានសិទ្ធិវិយោគនៅអូស្ត្រាលីស្របទៅតាមច្បាប់វិនិយោគទុនពីបរទេស។
របាយការណ៍មួយចេញផ្សាយដោយក្រុមហ៊ុនប្រឹក្សាយោបល់ KordaMentha និងអង្គការតម្លាភាពអន្តរជាតិអូស្ត្រាលីចេញផ្សាយកាលពីថ្ងៃទី៦ ខែឧសភា បង្ហាញថានៅចន្លោះពីឆ្នាំ២០១៩ដល់ឆ្នាំ២០២៣ អចលនទ្រព្យចំនួន ១១៨កន្លែងមានតម្លៃសរុប ១១០លានដុល្លារ អូស្ត្រាលី (៧២លានដុល្លារអាមេរិក) ត្រូវបានជួញដូរនៅក្នុងប្រទេសអូស្ត្រាលីដោយ «ជនមកពីកម្ពុជា»។
នៅឆ្នាំ២០២០ ទឹកប្រាក់ជាង ៣៣៧លានដុល្លារត្រូវបានផ្ទេរចូលទៅប្រទេសអូស្ត្រាលីពីកម្ពុជា។ ទោះយ៉ាងណាក៏ដោយក៏របាយការណ៍នេះទទួលស្គាល់ថា ភាគច្រើននៃទំហំទឹកប្រាក់នេះស្ថិតនៅក្នុងសកម្មភាពហិរញ្ញវត្ថុ ឬការវិនិយោគស្របច្បាប់។ ប៉ុន្តែពួកគេបានចោទសួរទៅលើសមភាពនៃទំហំទឹកប្រាក់នេះទៅនឹងប្រាក់ចំណូលរបស់ប្រជាពលរដ្ឋកម្ពុជា។
របាយការណ៍ដដែលលើកឡើងថា៖ «នៅក្នុងឆ្នាំសារពើពន្ធ ២០២២-២០២៣ អចលនទ្រព្យលំនៅដ្ឋានរបស់អូស្ត្រាលីដែលមានតម្លៃ ៣៣,៤លានដុល្លារអូស្ត្រាលី (ជិត២២លានដុល្លារអាមេរិក) ត្រូវបានទិញដោយជនបរទេសមកពីកម្ពុជា»។
របាយការណ៍នេះអះអាងថា តួលេខនេះត្រូវបានកត់ត្រាតាមចរន្តផ្ទេរប្រាក់ដែលអាចគ្រប់គ្រងបាន។
របាយការណ៍ដដែលសរសេរថា តាមការយល់ឃើញរបស់ពួកគេ យ៉ាងហោចណាស់មានទឹកប្រាក់មួយភាគដែលចេញពីកម្ពុជាចូលទៅអូស្ត្រាលីចេញពីប្រភពមិនស្របច្បាប់។
កម្ពុជាត្រូវបានដាក់ក្នុងបញ្ជីប្រផេះនៃស្ថាប័នប្រឆាំងនឹងការសម្អាតប្រាក់ FATF នៅឆ្នាំ២០១៩ ប៉ុន្តែត្រូវបានដកចេញវិញកាលពីខែកុម្ភៈឆ្នាំ២០២៣ បន្ទាប់ពីកម្ពុជាបានប្រឹងប្រែងប្រឆាំងនឹងការសម្អាតប្រាក់ និងបានបំពេញលក្ខខណ្ឌនានាដែល FATF បានដាក់ចេញ រួមមានទាំងការបង្កើតច្បាប់ប្រឆាំងការសម្អាតប្រាក់និងនីតិវិធីពាក់ព័ន្ធជាច្រើនទៀត។
ចំពោះរបាយការណ៍ចោទប្រកាន់នេះ ភ្នំពេញប៉ុស្តិ៍បានព្យាយាមទាក់ទងមន្ត្រីដែលពាក់ព័ន្ធនឹងបញ្ហានេះ ប៉ុន្តែមិនទទួលបានចម្លើយតបទេគិតត្រឹមថ្ងៃទី៩ ខែឧសភានេះ។
លោក ហុង វណ្ណៈ អ្នកស្រាវជ្រាវផ្នែកសេដក្ឋិច្ចនៅរាជ្យបណ្ឌិត្យសភាកម្ពុជានិយាយថា ជាទូទៅលំហូរសាច់ប្រាក់ចូលទៅក្នុងប្រទេសមួយត្រូវមានកិច្ចព្រមព្រៀងរវាងប្រទេសទាំងពីរ។
លោកថា ប្រសិនបើភាគីអូស្ត្រាលីរកឃើញថាប្រាក់នោះមានជាប់ពាក់ព័ន្ធទៅនឹងអំពើខុសច្បាប់ ពួកគេគួរតែទប់ស្កាត់មិនឲ្យចូលអូស្ត្រាលីតាំងពីដំបូង។
លោកថ្លែងដូច្នេះថា៖ «ប្រជាពលរដ្ឋកម្ពុជាយើងខ្លះក៏អាចវិនិយោគនៅអូស្ត្រាលីបានដែរ ប៉ុន្តែរបាយការណ៍នេះអះអាងថា វាជាលុយកខ្វក់ ជាប់ពាក់ព័ន្ធរឿងពុករលួយ ឬជួញដូរគ្រឿងញៀន។ វាហាក់បីដូចជាជះទឹកកខ្វក់មកលើកម្ពុជា»។
លោកក៏បានចោទសួរទៅលើស្ថានភាពជាក់ស្ដែងនៃច្បាប់ស្ដីពីការវិនិយោគទុនពីបរទេសនៅអូស្ត្រាលី។
លោកនិយាយថា៖ «បើអីចឹង តើគេអាចទៅវិនិយោគក្នុងប្រទេសនោះយ៉ាងម៉េចបាន? ពលរដ្ឋកម្ពុជាក៏មិនខុសពីប្រទេសផ្សេងដែរ គួរតែអាចវិនិយោគនៅអូស្ត្រាលីបាន។ យើងមិនអាចទៅស្វែងរកប្រភពលុយគ្រប់យ៉ាងនោះទេ»។
លោកយល់ថា ពលរដ្ឋកម្ពុជាដែលចង់ប្ដូរទីលំនៅអចិន្ត្រៃយ៍ទៅអូស្ត្រាលី ឬវិនិយោគនៅទីនោះ ឬបញ្ជូនកូនឲ្យទៅរៀន គួរតែអាចធ្វើបាន ព្រោះប្រាក់របស់ពួកគេអាចបានពីប្រភពស្របច្បាប់ផ្សេងៗដូចជាការធ្វើជំនួញជួញដូរ ឬលក់ដីធ្លីជាដើម។
លោកបន្តថា៖ «ខ្ញុំជឿថា គ្រួសារខ្លះអាចមានលុយ១លានដុល្លារដើម្បីប្ដូរទីលំនៅ ឬបញ្ជូនកូនឲ្យទៅរៀននៅអូស្ត្រាលីបាន»។
យ៉ាងណាក៏ដោយ លោកបញ្ជាក់ថា លោកមិននិយាយការពារបុគ្គលដែលប្រព្រឹត្តអំពើខុសច្បាប់ហើយយកលុយទៅវិនិយោគនៅ អូស្ត្រាលីទេ។ លោកគ្រាន់តែចង់ឃើញអូស្ត្រាលីបែងចែកឲ្យបានច្បាស់ថាលុយមកពីប្រភពបែបណាដែលមិនអាចយកទៅវិនិយោគនៅទីនោះ បាន។ ប្រសិនបើមានការចោទប្រកាន់លើប្រភពលុយណាមួយ ត្រូវតែមានភស្តុតាងច្បាស់លាស់៕