Search form

Login - Register | FOLLOW US ON

Logo of Phnom Penh Post newspaper Phnom Penh Post - ការ​បំពេញ​ការងារ​ដោយ​ឆន្ទៈ​ធ្វើ​ឲ្យ រាជ សុ​ផែន រក​ឃើញ​ភាព​ល្បី​

លោក រាជ សុផែន ក្នុង​ពេល​បំពេញ​ការងារ​ជា​ប្រធានវិនិច្ឆ័យនៅ​លើ​សង្វៀន​SEATV កន្លង​មក​ដែល​ជា​កន្លែងលោក​បាន​សាង​ភាព​ល្បី​។​ រូប​ថត យឺន ពន្លក
លោក រាជ សុផែន ក្នុង​ពេល​បំពេញ​ការងារ​ជា​ប្រធានវិនិច្ឆ័យនៅ​លើ​សង្វៀន​SEATV កន្លង​មក​ដែល​ជា​កន្លែងលោក​បាន​សាង​ភាព​ល្បី​។​ រូប​ថត យឺន ពន្លក

ការ​បំពេញ​ការងារ​ដោយ​ឆន្ទៈ​ធ្វើ​ឲ្យ រាជ សុ​ផែន រក​ឃើញ​ភាព​ល្បី​

លោក រាជ សុ​ផែន សមាជិក​ប្រតិបត្តិ​អស់​រយៈពេល​ ៣ ​អាណត្តិ​មក​​ហើយ ហើយ​​​បច្ចុប្បន្ន​លោក​ជា​ប្រធាន​អនុគណៈកម្មការ​ផ្សព្វផ្សាយ​អប់រំ និង​ជា​ប្រធាន​វិនិច្ឆ័យ​ក្នុងការ​ប្រកួត​ប្រដាល់​នៅ​លើ​សង្វៀន​អាស៊ី​អាគ្នេយ៍ របស់​សហព័ន្ធ​កីឡា​ប្រដាល់​កម្ពុជា​ ដែល​កំពុង​តែ​មាន​​ប្រជាប្រិយ​ភាពខ្លាំង និង​ទទួល​បាន​ការ​គាំទ្រ​ពី​មជ្ឈដ្ឋាន​ច្រើន ខណៈ​​ម្ចាស់​សង្វៀន​នេះ​បាន​ផ្តល់​​សិទ្ធិ​ពេញ​លេញ​ឲ្យ​លោក​​បាន​អនុវត្ត​ច្បាប់​យ៉ាង​ម៉ឺង​មាត់ និង​​សម្រេច​សេចក្តី​​បាន​​ត្រឹម​ត្រូវ និង​យុត្តិធម៌ តាម​ឆន្ទៈ​ផ្ទាល់​របស់​លោក​នោះ។

មុនពេល​​លោក រាជ សុ​ផែន ផ្លាស់​មកកាន់​សង្វៀន​ SEATV នេះក្នុង​ដើម​ឆ្នាំ​ ២០១៣ ​​លោក​ក៏​ជា​ប្រធាន​វិនិច្ឆ័យ​មួយ​រូប​ប្រចាំ​នៅ​សង្វៀន​ ស៊ីធីអិន ​ដែរ ប៉ុន្តែ​លោក​គ្មាន​ឱកាស​បង្ហាញ​សមត្ថភាព​ពិត​នោះទេ គឺ​លោក​បាន​ត្រឹម​ធ្វើតាម​ជំនោរ​នៃ​អ្នក​គ្រប់គ្រង ដោយ​លោក​ត្រូវ​បាន​ទទួល​រង​នូវ​សម្ពាធ​ខ្លះៗ ដែល​រំខាន​ដល់​ការ​សម្រេច​សេចក្តី​ឲ្យ​សុ​ក្រឹត និង​យុត្តិធម៌ ហេតុ​នេះ​អ្វីៗ​ដែលជា​ជំនាញ​បច្ចេកទេស​​ផ្ទាល់​របស់​លោក ត្រូវ​កប់​បាត់ និង​​​បិទបាំង ដោយ​ភាព​អយុត្តិធម៌​មួយចំនួន​ផងដែរ។

ក្នុងឋានៈ​ជា​អ្នក​វិនិច្ឆ័យ​ជម្រះក្តី​លើ​ពិន្ទុ​ចៅក្រម​ទាំង​​ ៥ ​នាក់​នោះ លោក​ក៏​ធ្លាប់​ទទួល​រង​នូវ​ការ​បញ្ឈរ​ជើង​ពី​ការងារ​រយៈពេល​ ១ ​ខែ​កន្លះ​ផងដែរ ដោយ​លោក​អះ​អាង​ថា៖​ «ការ​សម្រេច​សេចក្តី​តាម​បច្ចេក​ទេស និង​សុក្រឹត​យុត្តិធម៌ ជាការ​លំបាក​មួយ គឺ​មិន​អាច​ស្រប​គំនិត​អ្នក​គាំទ្រ​ពីរ​​ភាគី​នោះទេ ហើយ​ម្យ៉ាង​វិញ​ទៀត​ វា​មិន​ស្រប​ទៅ​នឹង​​ការ​ចង់​បាន​របស់​អ្នក​គ្រប់គ្រង​កម្មវិធី​នេះ​តែ​ម្តង»។

Content image - Phnom Penh Post

លោក រាជ សុ​ផែន បច្ចុប្បន្ន​មាន​អាយុ​ ៥៨ ​ឆ្នាំ កម្ពស់​ ១,៧០ ម៉ែត្រ និង​មាន​ឋានៈ​ជា​វរសេនីយ៍​ឯក​ (ស័ក្តិ​៥) មាន​មុខងារ​ជា​មេបញ្ជា​ការ​សឹក​រង​ខេត្ត​កណ្តាល ដោយ​មាន​ស្រុក​កំណើត​នៅ​ខេត្ត​ ពោធិ៍សាត់ ហើយ​ធំ​ដឹងក្តី​បាន​ចូល​រៀន​នៅ​ខេត្ត​បាត់ដំបង ដែល​ជា​តំបន់​មួយ​មាន​សក្តានុពល​ប្រដាល់​ពេញនិយម​​ជាងគេ​នៅ​ប្រទេស​កម្ពុជា ហើយ​លោក​ក៏បាន​ចាប់ ផ្តើម​ចូល​ហ្វឹកហាត់ និង​ប្រកួត​ជា​គូ​រាយ​រង​ធម្មតា​ក្នុង​អំឡុង​ឆ្នាំ​ ១៩៦៩ ​​ជា​លើក​ដំបូង សម្រាប់​ជីវិត​ជា​កីឡាករ​ប្រដាល់​។​

នៅក្នុង​ជំនួប​​ជាមួយ​«​កម្ពុជា​ចុង​សប្តាហ៍​) លោក រាជ សុ​ផែន បាន​រៀប​រាប់ថា នៅក្នុង​របប​ប៉ុលពត​លោក​ជា​កងចល័ត ដែល​ធ្វើការ​ធ្ងន់​ដូច​គេ​ដូច​ឯង​​ដែរ នៅ​ភ្នំ​សំពៅ ខេត្ត​បាត់ដំបង​។ លុះ​ក្រោយ​ឆ្នាំ​ ១៩៧៩ លោក​បាន​ចូល​បម្រើ​ក្នុង​កងទ័ព​ប្រឡូក​ក្នុង​សង្គ្រាម​នៅ​តំបន់​ព្រៃភ្នំ​ទទួល​រង​ការ​លំបាក​ខ្លាំង​បំផុត​។

នៅ​ឆ្នាំ​១៩៩១ និង​ឆ្នាំ​១៩៩៨ លោក រាជ សុ​ផែន មានឱកាស​បានមក​នៅ​ភូមិភាគ​ ៣ ​បន្ទាប់​មក​នៅ​ភូមិភាគ​ពិសេស ដោយ​​សារ​លោក​មាន​ឱកាស​បាន​បង្កើត​ក្លិប​ប្រដាល់​មួយ​ឈ្មោះ​ថា​ «រិទ្ធ​សក្តិ​កីឡា» និង​ធ្លាប់​បាន​ដឹកនាំ​កីឡា​ករ​មក​ចូល​រួម​ការ​​ប្រកួត​ជើង​ឯក​ថ្នាក់​ជាតិ​ជា​រៀង​រាល់​ឆ្នាំ​ចាប់​តាំង​ពី​ឆ្នាំ​ ១៩៩១ ដល់​១៩៩៥។

នៅ​ឆ្នាំ​១៩៩៦ លោក​បាន​បង្កើត​ក្លិប​ប្រដាល់​នៅ​ភូមិភាគ​ពិសេស​ឈ្មោះថា ហនុមាន​មាន​រិទ្ធ ដែល​ហាត់​នៅ​បន្ទាយ​សឹក​រង ខេត្ត​កណ្តាល​តែម្តង។

នៅ​ឆ្នាំ​២០០០ រាជ សុ​ផែន ត្រូវបាន​សហព័ន្ធ​កីឡា​ប្រដាល់​កម្ពុជា ផ្តល់​ការងារ​ឲ្យ​ធ្វើជា​ចៅ​ក្រម​អាជ្ញា​កណ្តាល ហើយ​ឆ្នាំ​២០០៥ លោក​ត្រូវ​បាន​ជ្រើស​តាំង​ជាប់​ជា​សមាជិក​ប្រតិបត្តិ និង​មាន​តួនាទី​ជា​ប្រធាន​អនុ​គណៈកម្មការ​វិន័យ​ក្នុង​រយៈពេល​​ ៨ ​ឆ្នាំ​ជាប់ៗ​គ្នា គឺ​២​អាណត្តិ លុះ​ដល់​អាណត្តិ​ទី​៥ ឆ្នាំ​២០១៣ មក​ដល់​បច្ចុប្បន្ន​លោក​​ត្រូវ​បាន​ជ្រើស​តាំង​ជា​ប្រធាន​​អនុគណៈកម្ម​ការ​ផ្សព្វផ្សាយ​អប់រំ និង​ជា​ប្រធាន​វិនិច្ឆ័យ​ប្រចាំ​ប៉ុស្តិ៍​ទូរទស្សន៍​​អាស៊ីអាគ្នេយ៍​។​

លោក រាជ សុ​ផែន បាន​ប្រាប់ថា​៖​«​ការងារ​ធ្វើជា​ប្រធាន​វិនិច្ឆ័យ មានការ​លំបាក​ខ្លះ និង​ងាយ​ស្រួល​ច្រើន ពីព្រោះ​យើង​យល់ដឹង​ច្បាស់​ពី​ច្បាប់ និង​លក្ខខណ្ឌ​នៃ​ការ​ប្រកួត ប៉ុន្តែ​ដើម្បី​ឲ្យ​ការងារ​នេះ​មាន​ភាព​រលូន និង​តម្លា​ភាពល្អ​នោះ លុះ​ត្រា​តែ​យើង​មិន​ទទួល​រង​សម្ពាធ គឺមាន​ភាព​ឯករាជ្យ​​ក្នុងការ​សម្រេច​ក្តី​»​។

នៅពេល​សួរថា ហេតុអ្វី​លោក​ចំណាយ​ពេល​លើ​វិស័យ​កីឡា​ប្រដាល់​អស់​រយៈពេល​ជិត​ ១៥ ​ឆ្នាំ ប៉ុន្តែ​លោក​ទើប​ទទួល​បាន​ការ​គាំទ្រ​​ខ្លាំង និង​ក្លាយជា​​ថ្នាក់​ដឹក​នាំ​ក្នុង​រយៈពេល​ចុង​ក្រោយ​នេះ? លោក សុផែន បាន​ប្រាប់​ថា៖ «គឺ​ដូច​ខ្ញុំ​ជម្រាប​ពី​ខាងដើម​អ៊ីចឹង ការងារ​​បច្ចេកទេស​ត្រូវ​ការ​ដាច់​ខាត​នូវ​ភាព​ឯករាជ្យ ប៉ុន្តែ​កន្លង​មក​ខ្ញុំ​ធ្លាប់​ធ្វើ​ការងារ​នៅ​សង្វៀន​មុនៗ​មាន​​នយោបាយ​គ្រប់គ្រង​ដឹកនាំ​ខុសៗ​ពី​គ្នា»។

លោក​បាន​​បន្តថា អ្វីដែល​អ្នក​គ្រប់គ្រង​ចង់​បាន ហើយ​យើង​ធ្វើ​មិន​បាន​ជាដើ​ម​​ហេតុ​ធ្វើ​ឲ្យ​យើង​គ្មាន​សិទ្ធិ​សម្រេច​ដោយ​ពេញ​លេញ គឺអាច​និយាយ​ថា៖ «ម្ចាស់​គ្រប់​គ្រង​កម្មវិធី និង​ការ​និយម​តាម​បក្ខពួក ឬ​ខ្សែ​នោះ ជា​ឧបសគ្គ​ចម្បង ហេតុនេះ​ខ្ញុំ​ក៏​ធ្លាប់​ទទួល​រង​ការ​ដាក់​វិន័យ​មួយ​ខែ​កន្លះ​ផងដែរ ដូច្នេះ​​ពេលខ្លះ​យើង​ក៏​មិន​សម្រេច​តាម​ឆន្ទៈ​យើង​ជា​លក្ខណៈ​បច្ចេក​ទេស​ឲ្យ​បាន​ ១០០ ​ភាគរយ​នោះ​ដែរ​ ពោល​គឺ​យើង​​គ្មាន​ឱកាស​ពេញ​លេញ​នោះ​ទេ»។

លោក រាជ សុ​ផែន បាន​បន្តថា៖ «បើ​លម្អិត​ទៅលើ​បច្ចេកទេស​វិនិច្ឆ័យ​ឲ្យ​ប្រាកដ​វិញ​គឺថា មុខងារ​របស់​ប្រធាន​វិនិច្ឆ័យ​ពិនិត្យ​មើល​ទាំង​អស់ ក្នុងនោះ​សកម្មភាព​ផ្តល់​ពិន្ទុ​របស់​ចៅក្រម​ទាំង​ ៥ និង​សើរើ​កែប្រែ​លទ្ធផល​ទាំង​នោះ​ឡើង​វិញ​ភ្លាមៗ​មុន​ប្រកាស​លទ្ធផល​នៅ​ពេល​ដែល​មើល​ឃើញ​ថា ចៅក្រម​ដាក់ពិន្ទុ​លម្អៀង ដោយ​ពិភាក្សា​ជាមួយ​ស្នងការ​ប្រកួត ទោះបី​លទ្ធផល​នោះ​ ៥ ​ទល់​ ០,៤ ​ទល់​ ១ និង​ ៣ ​ទល់​ ២ ​ក៏ដោយ​»។​

គួររំឭកថា សង្វៀន​នៅ​ប៉ុស្តិ៍​លេខ​៥ ដែល​បង្កើត​កម្មវិធី​ប្រដាល់​មុនគេ តែ​ត្រូវ​ក្ស័យធន​ព្រោះ​អស់​អ្នក​ទស្សនា ចំណែក​សង្វៀន​ស៊ី​ធី​អិន ដែល​ធ្លាប់​មាន​ការប្រកួត​ប្រចាំ​សប្តាហ៍​ច្រើន​បំផុត ត្រូវបាន​ខ្សត់​អ្នក​ទស្សនា ហើយ​អ្នក​ឧបត្ថម្ភ​គាំទ្រ​ត្រូវ​បាន​ដកខ្លួន​ជា​បន្ត​បន្ទាប់​នោះ គឺ​សុទ្ធ​តែ​ជា​ដើម​ហេតុ​នៃ​ការជម្រះ​ក្តី​របស់​ចៅក្រម និង​ការវិនិច្ឆ័យ​ជាប់​សង្ស័យ​ទៅនឹង​អំពើ​ពុក​រលួយ​និយម​បក្ខពួក និង​មាន​ឈ្មួញ​លូកដៃ​ទិញ​កីឡាករ​ខ្លាំង​ឲ្យ​ប្រកួត​ចាញ់​អ្នក​ខ្សោយ។

ផ្ទុយទៅវិញ​សង្វៀន​ SEATV ដែល​ទើប​បង្កើតឡើង​ក្រោយ​គេ តែ​បែរ​ជាមាន​អ្នក​ទស្សនា​ច្រើន​បំផុត​នោះ ត្រូវបាន​លោក រាជ សុផែន អះអាងថា​៖ «​សង្វៀន ​SEATV បានផ្តល់​សិទ្ធិ​ពេញ​លេញ​ក្នុងការ​សម្រេច​សេចក្តី ដើម្បី​ទទួល​យក​បាន​ដោយ​យុត្តិធម៌ ហើយ​ថ្នាក់​ដឹក​នាំ​របស់​សហព័ន្ធ​កីឡា​ប្រដាល់​កម្ពុជា​គឺ​លោក តែម ម៉ឺន បានផ្តល់​ឲ្យ​ខ្ញុំ​នូវ​ការគោរព​គោល​ការណ៍​ច្បាប់​ជាធំ ជា​ហេតុ​នាំ​ឲ្យ​មានការ​គាំទ្រ​ខ្លាំង​ពី​អ្នក​ទស្សនា និង​ធ្វើ​ឲ្យ​ខ្ញុំ​ទទួល​បាន​កេរ្តិ៍ឈ្មោះ​ល្អ គឺ​សប្បាយ​ចិត្ត​ខ្លាំង​ណាស់​»​។

ចំណែក​លោក តែម ម៉ឺន ប្រធាន​សហព័ន្ធ​កីឡាប្រដាល់​កម្ពុជា បាន​ថ្លែងឲ្យ​ដឹង​ថា៖«​លោក រាជ សុផែន​មាន​សមត្ថភាព​ក្នុងការ​ដឹកនាំ និង​អាច​គ្រប់គ្រង​បច្ចេកទេស​ប្រកួត​បានល្អ​។ អ្វីដែល​គាត់​ទទួលបាន​ការគាំទ្រ​ខ្លាំង គឺ​នយោបាយ​ដឹកនាំ​របស់ខ្ញុំ​បានដាក់​ចៅក្រម​ក្មេងៗ ដែល​ទើបតែ​បណ្តុះបណ្តាល​គឺ​កំណត់​មិន​ឲ្យ​ពួកគេ​ពាក់ព័ន្ធ​និន្នាការ​មនោសញ្ចេតនា ឬ​ស្គាល់​គ្នាច្រើន​នាំ​ឲ្យ​លម្អៀង​អ្វី​នោះឡើយ ព្រោះ​យើង​ចង់​កសាង​ចៅក្រម​អាជ្ញាកណ្តាល និង​ធនធាន​មនុស្ស​វ័យក្មេងក្នុង​វិស័យ​កីឡា​ប្រដាល់​ ដើម្បី​អភិវឌ្ឍ និង​ជំរុញ​ការកាត់ក្តី​ឲ្យ​កាន់តែ​សុ​ក្រឹត​»៕

0

Comments

Please, login or register to post a comment