បើ​ទោះ​បី​ជា​ស្រាបៀរ​សម័យ​ទំនើប​ជាច្រើន​ប្រភេទ​បាន​វាយ​លុក​ចូល​ដល់​ភូមិ​ភាគ​ឦសាន​ក៏​ដោយ ក៏​ជន​ជាតិ​ដើម​ភាគ​តិច នៅ​តែ​និយម​ស្រា​បឺត ឬ​ស្រា​ពាង ដែល​ជា​ស្រា​ប្រពៃណី​របស់​ដូន​តា​ពួក​គេ មាន​អាយុ​កាល​រាប់​ពាន់​ឆ្នាំ​មក​ហើយ។ មិន​មែន​តែ​ជន​ជាតិ​ភាគ​តិច​ទេ សូម្បី​តែ​ភ្ញៀវ​ទេសចរ​ជាតិ និង​អន្តរជាតិ ដែល​ទៅ​លេង​នៅ​ភូមិ​ភាគ​ឦសាន ក៏​តែង​តែ​មាន​បំណង​ចង់​ភ្លក្ស​រសជាតិ​ស្រា​បឺត​នេះ​ផង​ដែរ។ លើស​ពី​នេះ​ទៀត ពិធី​ផ្លូវ​ការ​ផ្សេងៗ​របស់​ជន​ជាតិ​ភាគ​តិច គេ​ក៏​តែង​តែ​យក​ស្រា​បឺត​នេះ មក​ទទួល​ភ្ញៀវ​ដែរ។ ដូច​ជា​កាល​ពី​ពេល​ថ្មីៗ​នេះ ឯក​អគ្គរដ្ឋ​ទូត​សហគមន៍​អឺរ៉ុប លោក ហ្វ្រង់ស័រ កូតាំង ក៏​បាន​ទទួល​ទាន​ស្រា​បឺត​នេះ​ដែរ នៅ​ក្នុង​ពិធី​ផ្លូវ​ការ​មួយ​នៅ ខេត្ត​រតនគិរី។