Search form

Login - Register | FOLLOW US ON

Logo of Phnom Penh Post newspaper Phnom Penh Post - ពាន​ហ៊ុន​សែនវគ្គ​ ១/៤ នឹង​ក្លាយ​ជា​ការ​ប្រកួត​ដ៏​ស្វិត​ស្វាញ

អ្នក​ចាំ​ទី​របស់​ក្រុម​ខេត្ត​កំពត បានលោត​ធាក់​​បាល់​ចេញ​ពី​ជើង​​ខ្សែ​ប្រយុទ្ធ​​នៃ​ក្រុម​បៀល​ប្រាយ ក្នុង​ការប្រកួត​ជម្រុះ​តាម​ពូល​វគ្គ​ ១៦​ ក្រុម។​
អ្នក​ចាំ​ទី​របស់​ក្រុម​ខេត្ត​កំពត បានលោត​ធាក់​​បាល់​ចេញ​ពី​ជើង​​ខ្សែ​ប្រយុទ្ធ​​នៃ​ក្រុម​បៀល​ប្រាយ ក្នុង​ការប្រកួត​ជម្រុះ​តាម​ពូល​វគ្គ​ ១៦​ ក្រុម។​ ស្រេង ម៉េងស៊ុន

ពាន​ហ៊ុន​សែនវគ្គ​ ១/៤ នឹង​ក្លាយ​ជា​ការ​ប្រកួត​ដ៏​ស្វិត​ស្វាញ

ទោះ​បី​ជាការ​ប្រកួត​វគ្គ ១៦ ​ក្រុមពាន​​រង្វាន់​​ហ៊ុនសែន លើក​ទី​ ៩ ឆ្នាំ​២០១៥ ដែល​បាន​បញ្ចប់​កន្លង​មក​នេះ មាន​ការ​ស៊ុត​បាល់​បញ្ចូល​ទី​យ៉ាង​ច្រើន​លើស​លប់​គឺ​មាន​រហូត​ដល់ ២៣-១ ប៉ុន្តែ​ការ​ប្រកួត​វគ្គ​ ១/៤​ ផ្តាច់​ព្រ័ត្រ ដែល​នឹង​ធ្វើ​​នៅ​លើ​ទី​លាន​នៃ​ពហុកីឡដ្ឋាន​ខេត្ត​ស្វាយ​រៀង នា​ថ្ងៃ​សៅរ៍ និង​ថ្ងៃ​អាទិត្យ​នេះ ត្រូវ​បាន​គេ​មើល​ឃើញ​ថា នឹង​ក្លាយ​ជា​ការ​ប្រកួត​ដ៏​ស្វិតស្វាញ​ ព្រោះ​ក្រុម​នីមួយៗ សុទ្ធ​តែ​មាន​​ទំនុក​ចិត្ត​ខ្ពស់។

នៅ​ក្នុង​ការ​ប្រកួត​ទាំង​ ៤ ​គូ នៅ​ក្នុង​វគ្គ​ ៨​ ក្រុម​នេះ វា​មិន​មាន​គូ​មួយ​ណា ដែល​ត្រូវ​បាន​គេ​មើល​ឃើញ​ថា នឹង​ចាញ់ ឬ​ឈ្នះ​​ដោយ​ការ​ស៊ុត​បាល់​បញ្ចូល​ទី​បាន​ច្រើន​នោះ​ទេ ព្រោះ​​ក្រុម​ទាំង​៨ ដែល​បាន​ឈាន​មក​ដល់​​វគ្គ​នេះ​សុទ្ធ​តែ​​ធ្លាប់​ជួប​គ្នា​នៅ​ក្នុង​ការ​ប្រកួត​ក្របខ័ណ្ឌ​មិត្ត​ហ្វូន​ខេមបូឌាន​លីក ឆ្នាំ​ ២០១៤។

ក្រុម​បៀលប្រាយ ត្រៀម​ជម្រះ​បញ្ជី​ចាស់​ជាមួយ​ក្រុម​ ប៉ូលិស ការ​ជួប​គ្នា​របស់​ក្រុម​អគ្គ​ស្នង​ការ​នគរបាល​ជាតិ (ប៉ូលិស) និង​ប្រៀល​ប្រាយយូណាយ​ធីត បាន​ក្លាយ​ជា​ការ​ប្រកួត​សង​សឹក​គ្នា​ដ៏​សំខាន់។ គេ​នៅ​​ចាំ​​បាន​ថា ការ​ប្រកួត​រដូវ​កាល​​ទី ​៨ កាល​ពី​ឆ្នាំ​ ២០១៤ ប៉ូលិស ​បាន​យក​ឈ្នះ​លើ​ក្រុម​បៀល​ប្រាយ ២-០ ដើម្បី​ក្លាយ​ជា​ម្ចាស់​ជើង​ឯក ហើយ​គ្រាប់​បាល់​ជ័យ​ជម្នះ​នោះ​រក​បាន​ដោយ​ខ្សែ​ប្រយទ្ធ នួន បូរី និង អ៊ុល រ៉ាវី។ ប៉ុន្តែ ការ​ប្រកួត​នេះ​កីឡាករ​ដ៏​ឆ្នើម អ៊ុល រ៉ាវី ដែល​មាន​របួស​ជង្គង់​នោះ​មិន​អាច​ចូល​លេង​​បាន​ឡើយ ហើយ នួន បូរី និង ស្រី ឧត្តម ក៏​កំពុង​មាន​​របួស​ជាប់​ខ្លួន​ដែរ។

Content image - Phnom Penh Post

លោក អ៊ុង កនយ៉ានិត​ គ្រូបង្វឹក​ក្រុម​ប៉ូលិស បាន​ប្រាប់​កាល​ពី​ម្សិល​មិញ​ថា៖ ​«បញ្ហា​របួស​របស់​កីឡាករ​ឆ្នើមៗ​ទាំង​ ៣ ​នេះ បាន​ធ្វើ​ឲ្យ​យើង​មាន​ការ​ព្រួយ​បារម្ភ​ផង​ដែរ ព្រោះ​ក្រុម​ទាំង ​២ ​នេះ​​មាន​ទម្រង់​លេង​ល្អ សម្បូរ​ដោយ​កីឡាករ​​ក្មេងៗ និង​មាន​កលល្បិច​នៃ​ការ​ប្រកួត​ល្អ​ដូច​គ្នា ប៉ុន្តែ​ស្ថាន​ភាព​របួស នួន បូរី និង ស្រី ឧត្តម អាច​មាន​សង្ឃឹម​ចូល​លេង​បាន​ប្រហែល​៨០​ភាគ​រយ។ ផ្ទុយ​ទៅ​វិញ បើ​ពួក​គេ​មិន​អាច​ចូល​លេង​បាន យើង​ក៏​​មាន​អ្នក​ជំនួស​ដែរ គឺ​យើង​នឹង​ព្យាយាម​​ការពារ​តំណែង​ជើង​ឯក​របស់​យើង​ឲ្យ​បាន»។

ប៉ុន្តែ​លោកប៊ុនពេជ្រ មុនី អគ្គលេខាធិការ​ក្លិប​បៀល​ប្រាយ​យូណាយ​ធីត បាន​ប្រាប់កាល​​ពី​ម្សិល​មិញ​ថា៖​ «បើ​ទោះ​បី​ជា​យើង​ធ្លាប់​ចាញ់​ប៉ូលិស ប៉ុន្តែ​ក្នុង​នាម​ជា​អ្នក​កីឡាគឺ​យើង​នៅ​តែ​មាន​ឆន្ទៈ​ក្នុង​ការ​ឈ្នះ។ ថ្វី​បើ​យើង​មិន​មាន​សង្ឃឹម​រហូត​ដល់​ ១០០​ ភាគ​រយ ប៉ុន្តែ​ការ​មិន​មាន​របួស​កីឡាករ និងការ​ជាប់​ពិន័យ រួមទាំងការ​​ប្តេជ្ញា​ចិត្ត​ និង​ការ​មាន​ទឹក​ចិត្ត​ក្នុង​ការ​ប្រកួត​របស់​កីឡាករ នឹង​ជួយ​ឲ្យ​យើង​ទទួល​បាន​ជ័យ​ជម្នះ​ក្នុង​ការ​ប្រកួត​នេះ»។

ស្វាយរៀង សង្ឃឹម​ឈ្នះភ្នំពេញ​​ក្រោន ខណៈ​ណាហ្គាវើល ស្ទាក់​ស្ទើរ​ពេល​ជួបជាមួយ​​ បឹង​កេត យ៉ាង​ណា​មិញ ការ​ជួប​គ្នា​របស់​ក្រុម​ស្វាយ​រៀង និង​ភ្នំពេញ​ក្រោន បាន​ក្លាយ​ជា​ការ​ប្រជែង​គ្នា​យ៉ាង​សំខាន់​បំផុត ព្រោះ​ក្រុម​ទាំង​ ២​ នេះ​បាន​ធ្លាក់​ក្នុង​វគ្គ​ ៨​ ក្រុម​ កាល​ពី​ឆ្នាំ​មុន​ដូច​គ្នា ដោយ​កាល​នោះ​ស្វាយ​រៀង បាន​ចាញ់​បឹង​កេត ៥-១ ខណៈ​​ក្រោន​ ចាញ់​បៀល​ប្រាយ ១-០។ ប៉ុន្តែ​​ការ​ជួប​គ្នា​លើក​នេះ​ក្រុម​ទាំង​ ២ ​ហាក់​មាន​ការ​ជឿ​ជាក់​ក្នុង​ការ​ឈ្នះ​ដូច​គ្នា។

Content image - Phnom Penh Post

លោក សំ វ៉ាន់ដេត គ្រូ​បង្វឹក​ស្វាយ​រៀង បាន​ប្រាប់​ពី​ម្សិល​មិញ​ថា៖ ​«ការ​ប្រកួត​​លើក​នេះ​យើង​ត្រៀម​បាន​ល្អ​ណាស់ ព្រោះ​តែ​កីឡាករ សួន វាសនា និង លី សារ័ត្ន កំពុង​មាន​របួស។ យើង​មិន​ចាំ​បាច់​តាម​ដាន​ខ្លាំង​ពេក​ទៅ​លើ​ទម្រង់​លេង​របស់​ខាង​គេ​នោះ​ទេ គឺ​យើង​ខំ​តែ​បង្កើន​កម្រិត​នៃ​ការ​លេង​របស់​យើង​ឲ្យ​បាន​ល្អ​ទៅ វា​គ្រប់​គ្រាន់​ទៅ​ហើយ ហើយ​តាម​រយៈ​ការ​យក​ចិត្ត​ទុក​ដាក់​ពី​ថ្នាក់​ដឹក​នាំ ពិសេស​ការ​បាន​ចេញ​ទៅ​ប្រកួត​នៅ​ក្រៅ​ប្រទេស​បាន​ច្រើន បាន​ធ្វើ​ឲ្យ​ទម្រង់​លេង​របស់​យើង​នៅ​ពេល​នេះ​ល្អ​ប្រសើរ​ជាងពេល​មុន ហេតុ​នេះ​យើង​មាន​សង្ឃឹម​ឈ្នះ​ ភ្នំពេញ​ក្រោន រហូត​ដល់​ ៨០ ​ភាគ​រយ»។

ចំណែក​លោក Sam Schweingruber គ្រូ​បង្វឹក​ភ្នំពេញ​ក្រោន បាន​ប្រាប់​ថា៖​«ការ​ចាញ់​បឹងកេត ១-០ ក្នុង​វគ្គ​ជម្រុះ​តាម​ពូលកន្លង​មក​នេះ​ ដោយ​សារ​យើង​បាន​ដកកីឡាករ​ល្អ​ៗ​ ៤ ​នាក់ ដើម្បី​ត្រៀម​ការ​ប្រកួត​វគ្គ​ ៨​ ក្រុម​នេះ ប៉ុន្តែ​យើង​អាច​ចាញ់​ប្រៀប​ខាង​ក្រុម​ស្វាយរៀង បន្តិច​ត្រង់​ថា គេ​ជា​ម្ចាស់​ផ្ទះ ហើយ​យើង​មិន​ដែល​លេង​នៅ​លើ​ទី​លាន​ថ្មី​នោះ។ ទោះ​បី​ជា​យ៉ាង​ណា បើ​សិន​ជា​យើង​លេង​បាន​ត្រឹម​ត្រូវ​តាម​គម្រោង​ដែល​បាន​រៀបចំ​ យើង​នឹង​ទទួល​បាន​លទ្ធផល​ល្អ និយាយ​រួម​ក្រុម​ទាំង​ ២​ នេះ​​មាន​សង្ឃឹម ៥០​ ទល់​នឹង ​​៥០ ​ដូច​គ្នា ហេតុ​នេះ​ក្រុម​ណា​មាន​កំហុស​តែ​បន្តិច​នោះ ច្បាស់​ជា​ខក​ចិត្ត​ហើយ»។

ដោយ​ឡែក ការ​ប្រឈម​មុខ​ដាក់​គ្នា​រវាង​​ក្រុម​បឹង​កេត និង​ណាហ្គាវើល បាន​ក្លាយ​ជា​ការ​ប្រកួត​បញ្ចប់​ភាព​មន្ទិល កាល​ពី​ឆ្នាំ​២០១៤ ក្នុង​ពេលដែល​ក្រុម​បឹង​កេត ​ត្រូវបាន​សម្រេច​ឲ្យ​ឈ្នះ​​ក្រុម​ណាហ្គាវើល (ណាហ្គាខប) ដើម្បី​ទទួល​បាន​ចំណាត់​ថ្នាក់​លេខ​៣ បន្ទាប់​ពី​​ក្រុម​ទាំង​២​បាន​សម្រេច​ចិត្ត​ដើរ​ចេញ​ពី​ទី​លាន ក្រោម​ការ​កាត់​សេចក្តី​មិនច្បាស់​លាស់​របស់​ក្រុម​អាជ្ញាកណ្តាល ក្នុង​ម៉ោង​បន្ថែមពេល​ពួក​គេ​ស្មើ​គ្នា ក្នុង​លទ្ធ​ផល ២​-២នោះ។

យ៉ាង​ណា​ក៏​ដោយ​ «កម្ពុជា​ចុង​សប្តាហ៍) មិន​អាច​ទាក់​ទង​គ្រូ​បង្វឹក និង​អ្នក​ដឹកនាំ​​ក្រុម ​បឹង​កេត-អង្គរ ដើម្បី​សាក​សួរ​ពី​ការ​ត្រៀម​ខ្លួន​ចំពោះ​ការ​ជួប​ណាហ្គាវើល លើក​នេះ​បាន​ទេ។

ប៉ុន្តែ​លោក មាស ចាន់ណា គ្រូ​បង្គោល​ថ្មី​របស់​ក្រុម​ណាហ្គាវើល បាន​ប្រាប់​កាល​ពី​ម្សិល​មិញ​ថា៖ ​«យើង​រៀបចំ​​ក្រុមបាន​ល្អ​ជាង​ឆ្នាំមុនៗ ហើយ​កីឡាករ​ទាំង​អស់​កំពុង​មាន​ទឹក​ចិត្ត​ខ្លាំង​ក្នុង​ការ​ប្រកួត​។ យើង​មិន​អាច​និយាយ​ថា យើង​នឹង​ទទួល​បាន​លទ្ធ​ផល​បែប​ណា​នោះ​​ទេ ប៉ុន្តែ​យើង​នឹង​ព្យាយាម​ធ្វើ​ឲ្យ Game​ មួយ​នេះល្អ​មើល​បំផុត»។

ចំពោះ​ក្រុម​ត្រាយអាស៊ី ដែល​ត្រូវ​ជួប​ជាមួយ​ក្រុមគ្រង​គ្រង​ដោយ​ជប៉ុន​ដូច​គ្នា Albirex Nigata នោះ​កំពុង​មាន​ការ​ជឿ​ជាក់​យ៉ាង​ខ្លាំង ក្នុង​ការ​គេច​ផុត​ពី​ការធ្លាក់​ក្នុង​វគ្គ​ ៨ ​ក្រុម​នេះ។

លោក ឈូក ពិសិដ្ឋ គ្រូ​បង្គោល​បណ្តោះ​អាសន្ន​របស់​ក្រុម​ត្រាយអាស៊ី បាន​​និយាយ​ថា៖​ «ក្រុម Albirex នៅ​ពេល​នេះ​រៀបចំ​បាន​ល្អ ដោយ​ពួក​គេ​មាន​កីឡាករ​ថ្មី​ និង​កីឡាករ​មាន​ពិសោធ ធ្វើ​ឲ្យ​ទម្រង់​លេង​​បាន​​ខ្លាំង ដែល​យើង​មិន​អាច​មើល​ស្រាល​គេ​បាន​ទេ។ ប៉ុន្តែ​ការ​មាន​ទឹក​ចិត្ត​ខ្ពស់​ក្នុង​ការ​ប្រកួត​របស់​កីឡាករ និង​ការ​រៀបចំ​​បាន​យ៉ាង​ល្អនោះ ត្រាយអាស៊ី មាន​សង្ឃឹម​ខ្ពស់ ក្នុង​ការ​ឆ្លង​ផុត​វគ្គ​៨​ក្រុម​ចុង​ក្រោយ​នេះ»៕

0

Comments

Please, login or register to post a comment