Search form

Login - Register | FOLLOW US ON

Logo of Phnom Penh Post newspaper Phnom Penh Post - ពិធី​បុណ្យ​ចំបើង​ដំបូង​បង្អស់​ធ្វើ​នៅ ខេត្ត​បន្ទាយ​មាន​ជ័យ

ការ​រៀបចំ​សង់​ប៉ម ផ្ទះ និង​សីមា​ផ្លូវ​វង្វេង ជាដើម ដែល​សុទ្ធ​សឹង​ធ្វើ​ពី​ចំបើង។
ការ​រៀបចំ​សង់​ប៉ម ផ្ទះ និង​សីមា​ផ្លូវ​វង្វេង ជាដើម ដែល​សុទ្ធ​សឹង​ធ្វើ​ពី​ចំបើង។ រូប​ថត Muy Soklen & Kol Sovanvatthana

ពិធី​បុណ្យ​ចំបើង​ដំបូង​បង្អស់​ធ្វើ​នៅ ខេត្ត​បន្ទាយ​មាន​ជ័យ

ពិធី​បុណ្យ​បាន​និង​កំពុង​រៀបចំ​នៅ​លើ​ផ្ទៃ​ដី​ជាង ១០០ ហិកតា ជា​វាល​ស្រែ​ដែល​ធ្លាប់​តែ​បង្ហាញ​ទេសភាព​ពណ៌​បៃតង​ខ្ចី​ដ៏​ធំ​ល្វឹង​ល្វើយ ពេល​នេះ​បាន​ប្រែ​ក្លាយ​ជា​ទស្សនីយ​ភាព​ស្ថាបត្យកម្ម​ច្នៃ​ពី​ចំបើង​ជាច្រើន​ដ៏​ច្រូង​ច្រាង​រំលេច​ខ្លួន​យ៉ាង​ត្រដែត​ទាក់​ទាញ​ក្រសែ​ភ្នែក​អ្នក​ដំណើរ​តាម​ដង​ផ្លូវ​ឲ្យ​សម្លឹង​មើល​ដោយ​ខាន​មិន​បាន។

ចាប់​ពី​រូប​តម្រៀប​លើ​វាល​ស្រែ​ដ៏​ធំ សួន​កសិកម្ម រហូត​ដល់​ផ្ទះ ប៉ម និង​ផ្លូវ​វង្វេង គឺ​ជា​ស្នាដៃ​សិល្បៈ​ផលិត​ពី​ចំបើង​សុទ្ធសាធ​ដោយ​មាន​ការ​ពួត​ដៃ​គ្នា​រវាង​ប្រជាជន​កូរ៉េ​ខាង​ត្បូង និង​ប្រជា​ពលរដ្ឋ​ក្នុង​ស្រុក​ជាមួយ​នឹង​វត្ថុ​បំណង​ផ្សព្វ​ផ្សាយ​អំពី​អត្ថ​ប្រយោជន៍​នៃ​ចំបើង។

ទិដ្ឋភាព​ក្រុម​អ្នក​ស្ម័គ្រ​ចិត្ត​រៀបចំ​សង់​ប៉ម ផ្ទះ និង​សីមា​ផ្លូវ​វង្វេង ជាដើម ដែល​សុទ្ធ​សឹង​ធ្វើ​ពី​ចំបើង។
ទិដ្ឋភាព​ក្រុម​អ្នក​ស្ម័គ្រ​ចិត្ត​រៀបចំ​សង់​ប៉ម ផ្ទះ និង​សីមា​ផ្លូវ​វង្វេង ជាដើម ដែល​សុទ្ធ​សឹង​ធ្វើ​ពី​ចំបើង។ រូប​ថត Muy Soklen & Kol Sovanvatthana

ព្រឹត្ដិ​ការណ៍​ពិធី​បុណ្យ​ចំបើង​ត្រូវ​ប្រារឰ​ឡើង​ចាប់ពី​ថ្ងៃ ទី៦ ដល់ ទី៨ ខែ​កុម្ភៈ ដោយ​មាន​កិច្ច​សហការ​រួម​គ្នា​រវាង​អាជ្ញាធរ ខេត្ដ​បន្ទាយ​មាន​ជ័យ ក្នុង​ទឹក​ដី​ភូមិសាស្ដ្រ ស្រុក​ព្រះ​នេត្រ​ព្រះ ជាមួយ​នឹង​ភ្នាក់ងារ​កូប្រា ជា​អ្នក​ជំនួស​មុខ​ឲ្យ​ស្ថានទូត​សាធារណរដ្ឋ​កូរ៉េ​ប្រចាំ​កម្ពុជា​ដែល​គ្រប់​គ្រង​ក្រុមហ៊ុន​វិនិយោគ​របស់​កូរ៉េ​ទាំង​អស់​នៅ​កម្ពុជា។

លោក អ៊ុំ រាត្រី អភិបាល​រង ខេត្ដ​បន្ទាយ​មាន​ជ័យ បាន​ថ្លែង​ថា ជាមួយ​នឹង​កិច្ច​សហការ​នេះ គោល​បំណង​សំខាន់​ចង់​ឲ្យ​ភ្ញៀវ​ទេសចរ ជា​ពិសេស ប្រជា​ពលរដ្ឋ​កម្ពុជា​យល់​ច្បាស់​ពី​សារ​ប្រយោជន៍​នៃ​ចំបើង។

លោក​បាន​ឲ្យ​ដឹង​ថា៖ «កន្លង​មក បងប្អូន​ប្រជា​ពលរដ្ឋ​តែងតែ​ដុត​ចំបើង​ចោល​ក្រោយ​ពី​ធ្វើ​ការ​ច្រូត​កាត់​រួច។ យើង​អាច​ប្រើ​វា​រចនា​ជា​សួន និង​ផ្ទះ​ជាដើម»។

ទិដ្ឋភាព​ក្រុម​អ្នក​ស្ម័គ្រ​ចិត្ត​រៀបចំ​សង់​ប៉ម ផ្ទះ និង​សីមា​ផ្លូវ​វង្វេង ជាដើម ដែល​សុទ្ធ​សឹង​ធ្វើ​ពី​ចំបើង។
ទិដ្ឋភាព​ក្រុម​អ្នក​ស្ម័គ្រ​ចិត្ត​រៀបចំ​សង់​ប៉ម ផ្ទះ និង​សីមា​ផ្លូវ​វង្វេង ជាដើម ដែល​សុទ្ធ​សឹង​ធ្វើ​ពី​ចំបើង។ រូប​ថត Muy Soklen & Kol Sovanvatthana

ចំពោះ​ការ​រចនា​សមិទ្ធផល​ពី​ចំបើង​នេះ ត្រូវ​បាន​ធ្វើ​ឡើង​ដោយ​ក្រុម​អ្នក​ច្នៃ​ប្រឌិត​មក​ពី ប្រទេស​កូរ៉េ មាន​អ្នក​ជំនាញ​ខាង​ផ្នែក​សិល្បៈ និង​និស្សិត​ស្ម័គ្រ​ចិត្ដ ព្រម​ទាំង​ប្រជា​ពលរដ្ឋ​ក្នុង ខេត្ដ​បន្ទាយ​មាន​ជ័យ ដែល​ពួក​គេ​ចូល​រួម​សហការ​ច្នៃ​ប្រឌិត​វត្ថុ​ដែល​ឥត​ប្រយោជន៍​ទៅ​ជា​សិល្បៈ​ដែល​មាន​តម្លៃ។ ម្យ៉ាង​វិញ​ទៀត ចំបើង​ត្រូវ​បាន​ប្រមូល​ពី​ក្នុង​តំបន់ ស្រុក​ព្រះ​នេត្រ​ព្រះ តែ​ម្ដង។

លោក​អភិបាល​រង​ខេត្ដ បាន​បន្ដ​ថា៖ «ពួកគេ​ធ្វើ​ផ្ទះ​ពី​ចំបើង សួន​កសិកម្ម​ពី​ចំបើង រូប​សំពៅ​ពី​ចំបើង​ដែរ។ ពួកគាត់​ធ្វើ​ប៉ម​ខ្ពស់​សម្រាប់​ការពារ​ទឹក​ជន់​លិច ហើយ​ពួក​គាត់​ធ្វើ​សីមា (ផ្លូវ​វង្វេង) សម្រាប់​ការ​កម្សាន្ដ​របស់​ភ្ញៀវ​ទេសចរ។ នៅ​មាន​រូប​មនុស្ស ៦ ធំៗ និង​រូបភាព​ក្រាល​ពីលើ​ផ្ទៃ​ដី​ស្រែ​តែ​ម្ដង​ដែល​ផលិត​ពី​ចំបើង​ទាំង​អស់»។

ដោយ​សារ​ពិធី​បុណ្យ​ចំបើង​នេះ​ត្រូវ​បាន​ប្រារឰ​ជា​លើក​ដំបូង លោក អ៊ុំ រាត្រី បាន​ថ្លែង​ប្រាប់​ប្រកប​ដោយ​ជំនឿ​ចិត្ដ​ចំពោះ​ការ​ចូល​រួម​របស់​ប្រជា​ពលរដ្ឋ និង​ភ្ញៀវ​ទេសចរ​អន្ដរជាតិ​ថា៖ «មិន​ថា​តែ​ប្រជា​ពលរដ្ឋ​ក្នុង​តំបន់​នេះ​ទេ សូម្បី​តែ​បង​ប្អូន​ពលរដ្ឋ​មក​ពី ខេត្ដ​សៀមរាប និង​តំបន់​ផ្សេងៗ​នឹង​មក​ទស្សនា​ច្រើន​ដោយ​សារ​តែ​ពួក​គេ​ចង់​ឃើញ​នូវ​ការ​បង្ហាញ​សមិទ្ធផល​ចំបើង​ក្នុង​សណ្ឋាន​ប្លែកៗ»។

ទិដ្ឋភាព​ក្រុម​អ្នក​ស្ម័គ្រ​ចិត្ត​រៀបចំ​សង់​ប៉ម ផ្ទះ និង​សីមា​ផ្លូវ​វង្វេង ជាដើម ដែល​សុទ្ធ​សឹង​ធ្វើ​ពី​ចំបើង។
ទិដ្ឋភាព​ក្រុម​អ្នក​ស្ម័គ្រ​ចិត្ត​រៀបចំ​សង់​ប៉ម ផ្ទះ និង​សីមា​ផ្លូវ​វង្វេង ជាដើម ដែល​សុទ្ធ​សឹង​ធ្វើ​ពី​ចំបើង។ រូប​ថត Muy Soklen & Kol Sovanvatthana

លោក​បាន​លើក​ឡើង​ពី​ចំណាប់​អារម្មណ៍​ត្រួសៗ​របស់​អ្នក​ដំណើរ​ថា រហូត​មក​ដល់​ពេល​នេះ ប្រជា​ពលរដ្ឋ​ដែល​ធ្វើ​ដំណើរ​ឆ្លង​កាត់​តែង​តែ​ចោល​ក្រសែ​ភ្នែក​មើល​ភូមិ​ចំបើង។

លោក អ៊ុំ រាត្រី បាន​អះអាង​ថា៖ «នេះ​គឺជា​ឆ្នាំ​ទី​មួយ ហើយ​ប្រសិន​បើ​ការ​រៀបចំ​នេះ​ទទួល​បាន​ជោគជ័យ នោះ​អាជ្ញាធរ​ខេត្ដ និង​ភ្នាក់ងារ​កូប្រា ជា​ដៃ​គូ​នឹង​បង្កើត​កម្មវិធី​បែបនេះ​រៀង​រាល់​ឆ្នាំ​តែ​ម្ដង»។

ពិធី​បើក​សម្ពោធ​ឲ្យ​ចូល​ទស្សនា​ជា​ផ្លូវ​ការ​នឹង​ត្រូវ​ប្រព្រឹត្ដ​ទៅ​នៅ​ថ្ងៃ ទី៦ ចាប់​ពី​ម៉ោង ៣ រសៀល​តទៅ​នៅ​ក្នុង ភូមិ​ភ្នំ​លៀប​ខាង​លិច ឃុំ​ភ្នំលៀប ស្រុក​ព្រះ​នេត្រ​ព្រះ ខេត្ដ​បន្ទាយ​មាន​ជ័យ៕

0

Comments

Please, login or register to post a comment