Search form

Login - Register | FOLLOW US ON

Logo of Phnom Penh Post newspaper Phnom Penh Post - ភាពសោកសៅ និង​ជូរចត់​កើតឡើង​ក្នុង​វគ្គ ​១/២ ​ផ្តាច់ព្រ័ត្រ

ឧទ្ធម្ភាគចក្រ​ប៉ូលិស​មួយ​គ្រឿង​ហោះហើរ​លើ​ទីលាន​អំឡុង​ការ​ប្រកួត​វគ្គ​១/២​ផ្តាច់ព្រ័ត្រ។
ឧទ្ធម្ភាគចក្រ​ប៉ូលិស​មួយ​គ្រឿង​ហោះហើរ​លើ​ទីលាន​អំឡុង​ការ​ប្រកួត​វគ្គ​១/២​ផ្តាច់ព្រ័ត្រ។ AFP

ភាពសោកសៅ និង​ជូរចត់​កើតឡើង​ក្នុង​វគ្គ ​១/២ ​ផ្តាច់ព្រ័ត្រ

លោក Esteban Becker គ្រូបង្វឹក​នៃ​ក្រុម​បាល់ទាត់​ជម្រើស​ជាតិ​ហ្គីណេអេក្វាទ័រ បាន​សារភាព​ថា លោក​មាន​ការ​សោកសៅ ខណៈ​ដែល​តារា​ឆ្នើម​អន្តរជាតិ​ហ្គាណា Andre Ayew បាន​រង​នូវ​ភាព​ជូរចត់​ជុំវិញ​អំពើ​ហិង្សា និង​ការ​ជ្រួលច្របល់​ដែល​បាន​ក្លាយ​ជា​ស្រមោលខ្មៅ​ក្នុង​ការ​ប្រកួត​វគ្គ​ពាក់កណ្តាល​ផ្តាច់ព្រ័ត្រ​នៃ​ព្រឹត្តិការណ៍ Africa Cup of Nations កាលពី​ថ្ងៃ​ព្រហស្បតិ៍​។

ប៉ូលិស​បាន​ប្រើប្រាស់​ឧស្ម័ន​បង្ហូរ​ទឹកភ្នែក​ដើម្បី​បង្ក្រាប​អ្នក​គាំទ្រ​ក្រុម​ម្ចាស់ផ្ទះ​ដែល​បាន​បាញ់​កាំជ្រួច និង​ចោល​ដប​ទឹកបរិសុទ្ធ​ទៅលើ​អ្នកគាំទ្រ​របស់​ហ្គាណា ក៏​ដូចជា​ទៅលើ​ទីលាន​ក្នុង​កីឡដ្ឋាន Estadio de Malabo ដែល​ផ្ទុក​អ្នកទស្សនា​បាន​១៥០០០​នាក់​។

ការ​ប្រកួត​នេះ ដែល​ក្រុម​ហ្គាណា បាន​ទទួល​ជ័យជម្នះ ៣-០ នោះ ត្រូវ​បាន​បញ្ឈប់​នៅ​នាទី ទី​៨២ និង​ត្រូវ​បាន​ផ្អាក​រហូត​ដល់​ច្រើន​ជាង​៣៥​នាទី ខណៈ​ដែល​កីឡាករ​នៃ​ក្រុម​ទាំង​ពីរ​បាន​រត់​រក​កន្លែង​មាន​សុវត្ថិភាព​នៅ​កណ្តាល​នៃ​ទីលាន​ប្រកួត​។ អ្នក​គាំទ្រ​របស់​ហ្គាណា បាន​រត់​ចេញ​កន្លែង​មាន​ជម្លោះ​នោះ​ដើម្បី​គេច​ផុត​ពី​ការ​វាយប្រហារ​នៅ​ពី​ក្រោយ​ទីលាន​ម្ខាង​នៃ​ទីលាន​ប្រកួត​។

ដោយឡែក ឧទ្ធម្ភាគចក្រ​ប៉ូលិស​មួយ​គ្រឿង​សំកាំង​ពី​លើ​ក្បាល ខណៈ​ដែល​មន្ត្រី​រៀបចំ​ការ​ប្រកួត​បាន​សម្រេចចិត្ត​ថា តើ​ត្រូវ​លុបចោល​ការ​ប្រកួត​នេះ ឬ​យ៉ាង​ណា​? នៅ​ទីបំផុត​ការ​ប្រកួត​វគ្គ​ពាក់កណ្តាល​ផ្តាច់ព្រ័ត្រ​នេះ​បាន​ចាប់ផ្តើម​ម្តង​ទៀត ប៉ុន្តែ លោក​អាជ្ញាកណ្តាល​សញ្ជាតិ​ហ្គាបុង Eric Otogo បាន​អនុញ្ញាត​ឲ្យ​លេង​ត្រឹម​ប៉ុន្មាន​នាទី​ប៉ុណ្ណោះ នៅ​មុន​ពេល​បញ្ចប់​ការ​ប្រកួត​មួយ​ដែល​មាន​ប្រៀប​តែ​លើ​ក្រុម​ម្ខាង​។

គ្រូបង្វឹក​សញ្ជាតិ​អាហ្សង់ទីន Becker ថ្លែង​ថា៖ «អ្វី​ដែល​ធ្វើឲ្យ​ខ្ញុំ​ខ្វល់ខ្វាយ​នោះ​គឺ​អ្វី​ដែល​បាន​កើតឡើង​ជាមួយ​នឹង​អ្នកគាំទ្រ ខ្ញុំ​ពិតជា​សោកសៅ​ណាស់​»​។

ជាមួយ​គ្នា​នេះ ខ្សែប្រយុទ្ធ​អន្តរជាតិ​ហ្គីណេអេក្វាទ័រ បាន​បន្ថែម​ថា៖​ «ខ្ញុំ​ពិតជា​ខកចិត្ត​ចំពោះ​សមាជិក​ក្រុម​ទាំងអស់​។ ខ្ញុំ​មិន​ដែល​លេង​ក្នុង​ការ​ប្រកួត​ដែល​ស្ថិត​ក្នុង​បរិយាកាស​បែប​នេះ​ឡើយ​»​។

ជ័យជម្នះ​នេះ​នឹង​ធ្វើឲ្យ​ក្រុម​ជម្រើស​ជាតិ​ហ្គាណា​ឈាន​ទៅ​ជួប​ក្រុម​កូតឌីវ័រ​ក្នុង​វគ្គ​ផ្តាច់ព្រ័ត្រ​នា​ថ្ងៃ​អាទិត្យ​នេះ​ដែល​នឹង​ចាប់ផ្តើម​នៅ​ម៉ោង​២​ទៀបភ្លឺ៕ IS

0

Comments

Please, login or register to post a comment