Search form

Login - Register | FOLLOW US ON

Logo of Phnom Penh Post newspaper Phnom Penh Post - រដ្ឋាភិបាល​ស្នើឲ្យ​ក្រុមហ៊ុន​ដឹក​អ្នកដំណើរ​បញ្ចុះ​តម្លៃ​លក់​សំបុត្រ​ជិះ​រថយន្ត

រថយន្ត​ក្រុង​កំពុង​ផ្តល់​សេវា​ដឹក​អ្នក​ដំណើរ​នៅលើ​ដងវិថី​ព្រះមុនីវង្ស​កាលពី​ថ្ងៃ​សុក្រ។
រថយន្ត​ក្រុង​កំពុង​ផ្តល់​សេវា​ដឹក​អ្នក​ដំណើរ​នៅលើ​ដងវិថី​ព្រះមុនីវង្ស​កាលពី​ថ្ងៃ​សុក្រ។ ហេង ជីវ័ន

រដ្ឋាភិបាល​ស្នើឲ្យ​ក្រុមហ៊ុន​ដឹក​អ្នកដំណើរ​បញ្ចុះ​តម្លៃ​លក់​សំបុត្រ​ជិះ​រថយន្ត

ក្រសួង​សាធារណការ និង​ដឹកជញ្ជូន​បាន​ធ្វើការ​អំពាវនាវ​ដល់​ក្រុមហ៊ុន​ដែល​ផ្តល់​សេវា​ដឹកជញ្ជូន​អ្នក​ដំណើរ​ទាំងឡាយ​ធ្វើការ​បញ្ចុះតម្លៃ​សំបុត្រ​ជិះ​រថយន្ត​ដើម្បី​ជា​ការ​ឆ្លើយតប​ទៅ​នឹង​និន្នាការ​នៃ​ការ​ធ្លាក់​ថ្លៃ​ប្រេង​នា​ពេល​បច្ចុប្បន្ន​។

បើ​យោងតាម​សេចក្តី​ប្រកាស​អំពាវនាវ​ចុះ​ថ្ងៃ​ទី​៣០ ខែ​មករា ដែល​ចុះហត្ថលេខា​ដោយ​លោក ឥម នីថារ៉ា អគ្គនាយក​នៃ​ក្រសួង​សាធារណការ និង​ដឹកជញ្ជូន ហើយ​កម្ពុជា​ចុងសប្តាហ៍​ទើប​នឹង​ទទួល​បាន​កាលពី​ថ្ងៃ​សុក្រ​បាន​ឲ្យ​ដឹង​ថា មួយ​រយៈ​កន្លង​មក​នេះ អគ្គនាយកដ្ឋាន​ដឹកជញ្ជូន​សង្កេត​ឃើញ​ថា តម្លៃ​ប្រេងឥន្ធនៈ​នៅលើ​ទីផ្សារ​អន្តរជាតិ​បាន​ធ្លាក់​ថ្លៃ​ចុះ​ទាប មូលហេតុ​នេះ តម្លៃ​ប្រេងឥន្ធនៈ នៅ​ប្រទេស​កម្ពុជា​យើង ក៏​បាន​ធ្លាក់ចុះ​ទាប​ជាង​ពេល​មុន​ដែរ ដែល​តម្លៃ​ប្រេងឥន្ធនៈ​ពី​ពេល​មុន​លក់​ក្នុង​តម្លៃ ៥ ២០០ រៀល​ក្នុង​មួយ​លីត្រ ឥឡូវ​នេះ​មក​នៅ​ត្រឹម ៣៦០០ រៀល​ក្នុង​១​លីត្រ​។

«​ស្ថិត​ក្នុង​ឱកាស​នេះ អគ្គនាយកដ្ឋាន​ដឹកជញ្ជូន ស្នើសុំ​ឲ្យ​ក្រុមហ៊ុន​ដឹកជញ្ជូន​អ្នកដំណើរ​ទាំងអស់​ពិចារណា​កំណត់​តម្លៃ​សំបុត្រ​ជិះរថយន្ត​ឲ្យ​បាន​ទាប​ជាង​មុន​»​។ នេះ​បើ​យោងតាម​សេចក្តី​អំពាវនាវ​។

អគ្គនាយកដ្ឋាន​ដឹកជញ្ជូន​ក៏​បាន​បន្ត​ទៀត​ថា តម្លៃ​សំបុត្រ​ជិះ​រថយន្ត​បាន​ថោក​ជាង​ពេល​មុន ប្រាកដ​ជា​បាន​សម្រួល​ដោះស្រាយ​បន្ទុក​ពិបាក​របស់​ប្រជាពលរដ្ឋ ជាពិសេស​កម្មករ កម្មការិនី ដែល​ធ្វើ​ដំណើរ​ញឹកញាប់​ទៅ​លេង​ស្រុកកំណើត ក៏ដូចជា​បាន​រួមចំណែក​ក្នុង​ការ​ថែរក្សា​សណ្តាប់ធ្នាប់ និង​សុវត្ថិភាព​ចរាចរណ៍​។

« អគ្គនាយកដ្ឋាន​ដឹកជញ្ជូន​សូម​អំពាវនាវ​ដល់​ក្រុមហ៊ុន​ដឹកជញ្ជូន​អ្នក​ដំណើរ​ទាំងអស់ បញ្ចុះ​តម្លៃ​ជិះ​រថយន្ត​ដឹក​អ្នក​ដំណើរ ឲ្យ​បាន​សមស្រប​ទៅ​តាម​តម្លៃ​ប្រេងឥន្ធនៈ ដែល​អាច​ចាត់ទុក​ថា ជា​សកម្មភាព​សប្បុរស រួមចំណែក​សម្រាល​បន្ទុក​របស់​ប្រជាពលរដ្ឋ​ដែល​មាន​ប្រាក់ចំណូល​ទាប​» នេះ​បើ​យោងតាម​សេចក្តី​អំពាវនាវ​។

គួរ​រំឭក​ផង​ដែរ​ថា ក្រសួង​ពាណិជ្ជកម្ម​បាន​ធ្វើ​អន្តរាគមន៍​ចំនួន​បី​លើក​មក​ហើយ​ក្នុង​ការ​ពិភាក្សា​ជាមួយ​នឹង​អ្នក​ផ្គត់ផ្គង់​ប្រេង​ក្នុង​ស្រុក​ដើម្បី​ធ្វើការ​បញ្ចុះ​តម្លៃ​ប្រេង​លក់​រាយ។ បើ​គិត​ត្រឹម​ប៉ុន្មាន​សប្តាហ៍​មុន​នេះ តម្លៃ​ប្រេងសាំង​បាន​បន្ត​ធ្លាក់​ចុះ​ពី ៤០០០ រៀល​ក្នុង​មួយ​លីត្រ​មក​នៅ​៣៩០០​រៀល សម្រាប់​ក្រុមហ៊ុន​សូគីម៉ិច និង​តេលា ហើយ PTT ថ្លៃ​ ៤០៥០ ​រៀល ខណៈ​ក្រុមហ៊ុន​តូតាល់ តម្លៃ ៤០៥០​រៀល និង​កាល់តិច​៤១០០​រៀល ចាប់ពី​ថ្ងៃ​ទី​២១ មករា ខណៈ​ដែល​ប្រេងឆៅ​មាន​តម្លៃ​៤៦ ដុល្លារ​អាមេរិក​ក្នុង​មួយ​បារ៉ែល​នៅលើ​ផ្សារហ៊ុន​ទីក្រុង​ញូវយ៉ក ដោយ​បាន​ធ្លាក់ចុះ​៥៤​ភាគរយ​ពី​ក្នុង​តម្លៃ​ជាង ១០០ ដុល្លារ​អាមេរិក​ក្នុង​មួយ​បារ៉ែល​កាលពី​ខែ​កក្កដា​ឆ្នាំ​មុន​។

តារាង​តម្លៃ​ប្រេងឥន្ធនៈ​លក់រាយ​ក្នុង​ទីក្រុង​ភ្នំពេញ​កាលពី​ថ្ងៃ​សុក្រ។
តារាង​តម្លៃ​ប្រេងឥន្ធនៈ​លក់រាយ​ក្នុង​ទីក្រុង​ភ្នំពេញ​កាលពី​ថ្ងៃ​សុក្រ។ ហេង ជីវ័ន

រដ្ឋាភិបាល​កម្ពុជា​ក៏​កំពុង​ពិចារណា​ពី​បញ្ញត្តិ​ច្បាប់​គ្រប់គ្រង​តម្លៃ ប្រេងឥន្ធនៈ​ក្នុង​កិច្ចខិតខំ​ប្រឹងប្រែង​ក្នុង​ការ​បញ្ចុះ​តម្លៃ​ក្នុង អំឡុង​ពេល​ការ​ធ្លាក់ចុះ​តម្លៃ​ប្រេង​ពិភពលោក​។

លោក ផាន់ ណា អ្នកចាត់ការ​ទូទៅ​របស់​ក្រុមហ៊ុន​ដឹក​អ្នកដំណើរ​ធំ​ជាង​គេ​មួយ​របស់​កម្ពុជា ភ្នំពេញ​សូរិយា​បាន​ថ្លែង​ប្រាប់​កម្ពុជា​ចុងសប្តាហ៍​កាលពី​ថ្ងៃ​សុក្រ​នេះ​ថា លោក​ទើប​តែ​ទទួល​បាន​នូវ​សេចក្តី​អំពាវនាវ​របស់​ក្រសួង ហើយ​លោក​ស្វាគមន៍​ចំពោះ​សំណើ​នេះ​។

លោក​បាន​ថ្លែង​ថា «​ក្រុមហ៊ុន​របស់​ខ្ញុំ​បាន​បន្ត​ធ្វើការ​បញ្ចុះតម្លៃ​សំបុត្រ​ចាប់​តាំងពី​ពីរ​សប្តាហ៍​មុន​មក​ម្ល៉េះ ដោយ​យើង​យល់​ឃើញ​ថា តម្លៃ​ប្រេងសាំង​មាន​ការ​ធ្លាក់​ថ្លៃ​សន្សឹមៗ​»​។

លោក​បាន​ឲ្យ​ដឹង​ទៀត​ថា តម្លៃ​សំបុត្រ​ភ្នំពេញ-ក្រុង​ព្រះសីហុន​គឺ​ក្រុមហ៊ុន​បាន​ធ្វើ​ការ​បញ្ចុះ​ថ្លៃ​ពី​២៥ ០០០​រៀល មក​ត្រឹម ២២ ០០០​រៀល ចំណែក​ផ្លូវ ភ្នំពេញ-ក្រុង​ហូជីមិញ​ក៏​បាន​ធ្វើការ​បញ្ចុះ​ថ្លៃ​ពី​១០​ដុល្លារ​ក្នុង​មួយ​សំបុត្រ​មក​ត្រឹម​៩​ដុល្លារ​។

«​ការ​បញ្ចុះ​ថ្លៃ​របស់​យើង​នេះ​គឺ​យើង​បាន​ធ្វើ​គ្រប់​គោលដៅ​ទាំងអស់ តែ​យើង​មិន​អាច​ធ្វើ​ទាំង​គំហុក​នោះ​ទេ ព្រោះ​អី យើង​ក៏​មាន​ការ​ចំណាយ​ប្រតិបតិ្តការ​ខ្ពស់​ដែរ​»​។

លោក​ក៏​បាន​ត្អូញត្អែរ​ផង​ដែរ​ថា បើ​ទោះ​ជា​ក្រុមហ៊ុន​ដឹក​អ្នក​ដំណើរ​ធ្វើការ​បញ្ចុះតម្លៃ​សំបុត្រ​ក៏ដោយ តែ​តម្លៃ​ទំនិញ​ផ្សេងៗ​ទៀត​មិន​បាន​ចុះ​ថ្លៃ​ឡើយ​»​។

«​តាមពិត​ទៅ​បើ​ឲ្យ​តែ​យើង​បញ្ចុះ​តម្លៃ​តែ​ម្ខាង​គឺ​មិន​ត្រឹមត្រូវ​ទេ ដោយសារ​តែ​យើង​នៅ​តែ​ចំណាយ​ខ្ពស់​លើ​ការ​ទិញ​គ្រឿង​បន្លាស់​រាល់ថ្ងៃ ដូច្នេះ​ខាង​រដ្ឋាភិបាល​ក៏​គួរតែ​ស្វែងរក​វិធីសាស្ត្រ​យ៉ាងណា​ក្នុង​ការ​បញ្ចុះ​តម្លៃ​ទំនិញ​ផង​ដែរ​»​។ នេះ​បើ​យោងតាម​ការ​អះអាង​របស់​លោក ផាន់ ណា​។

បើ​យោងតាម​លោក ផាន់ ណា មក​ទល់​នឹង​បច្ចុប្បន្ន​នេះ​កម្ពុជា​មាន​ក្រុមហ៊ុន​ដែល​បម្រើ​សេវា​ដឹក​អ្នក​ដំណើរ​ប្រមាណ​ជា ​២០ ​ក្រុមហ៊ុន​៕

0

Comments

Please, login or register to post a comment

ព័ត៌មានពាក់ព័ន្ធ