បើ​ទោះ​ជា​ស្ថិត​នៅ​ក្នុង​ភូមិ​ដាច់​ស្រយាល​ក្ដី ក៏​ពុទ្ធ​បរិស័ទ​ធ្វើ​ដំណើរ​ពី​ភ្នំពេញ និង​តំបន់​នានា​នាំ​គ្នា​ស្កាត់​មក​ធ្វើ​បុណ្យ​នៅ​អារាម​ដ៏​ខ្សត់​ខ្សោយ​នៃ ខេត្ត​កំពង់ឆ្នាំង។ អ្វី​ដែល​គួរ​ឲ្យ​ចាប់​អារម្មណ៍​គឺ​នៅ​ពេល​ព្រះសង្ឃ​និមន្ដ​មក​សូត្រ​ធម៌​ក្នុង​ឱកាស​ថ្ងៃ​កាន់​បិណ្ឌ​ក្នុង​វត្ដ​នេះ​ភាគ​ច្រើន​មាន​ព្រះ​ជន​វ័យ​មិន​លើស​ពី ១៣ វស្សា​ទេ។ ថ្វី​ដ្បិត​តែ​ព្រះសង្ឃ​ដែល​និមន្ដ​មក​កាន់​សាលា​ឆាន់​នេះ​មាន​ព្រះ​ជន្ម​សុទ្ធ​តែ​ក្មេង​ខ្ចី​យ៉ាង​ណា​ក៏​ដោយ ក៏​ពុទ្ធ​បរិស័ទ​បាន​ផ្ដល់​ការ​គោរព​ខ្ពង់​ខ្ពស់​ជា​ពិសេស​ការ​ក្រោក​ឈរ​សំពះ​គារវៈ​នៅ​ពេល​ព្រះសង្ឃ​និមន្ដ​ចូល​សាលា​ឆាន់។