Search form

Login - Register | FOLLOW US ON

Logo of Phnom Penh Post newspaper Phnom Penh Post - សកម្មជន​អារ៉ែង​សប្បាយ​ពេល​សមត្ថកិច្ច​ចាប់

សកម្មជន​អារ៉ែង​សប្បាយ​ពេល​សមត្ថកិច្ច​ចាប់

សកម្មជន​អារ៉ែង​វ័យក្មេង បាន​អួត​ប្រាប់ មន្រ្តី​អង្គការ និង​សកម្មជន​មកពី ៥ ប្រទេស អំពី​យុទ្ធសាស្ត្រ​របស់​ពួកគេ​ក្នុង​ការ​តស៊ូ​មតិ បញ្ឈប់​គម្រោង​សង់​ទំនប់​វារីអគ្គិសនី​នៅ​អារ៉ែង ក្នុង​ខេត្ត​កោះកុង​រហូត​ទទួល​បាន​ជោគជ័យ ដែល​ក្នុង​នោះ​ពួកគេ​មាន​ចេតនា​ចង់​ឲ្យ​អាជ្ញាធរ​វាយ ឬ​ចាប់​ខ្លួន​ពួកគេ ដើម្បី​ឲ្យ​បណ្តាញ​ផ្សព្វផ្សាយ​នានា​ចាប់​អារម្មណ៍​ហើយ​ធ្វើការ​ផ្សព្វផ្សាយ​។

សកម្មជន​អារ៉ែង​ពីរ​រូប បាន​ធ្វើឲ្យ​មន្រ្តី​អង្គការ​ក្រៅរដ្ឋាភិបាល អ្នកសារព័ត៌មាន និង​សកម្មជន​នៅ​ប្រទេស​កម្ពុជា​វៀតណាម ឡាវ ថៃ និង​មីយ៉ាន់ម៉ា មាន​ការ​ភ្ញាក់ផ្អើល និង​កោតសរសើរ​ចំពោះ​យុទ្ធសាស្រ្ត​ធ្វើ​យុទ្ធនាការ​តស៊ូ​មតិ​របស់​ពួកគេ ដើម្បី​ប្រឆាំង​ទៅ​នឹង​គម្រោង​សាងសង់​ទំនប់​វារីអគ្គិសនី​អារ៉ែង របស់​ក្រុមហ៊ុន​ចិន​ស៊ីណូហៃដ្យូ។

យុវជន ឌឹម គុណឌី អាយុ​១៩ ឆ្នាំ បាន​ថ្លែង​នៅក្នុង​សិក្ខាសាលា​រយៈពេល​ពីរ​ថ្ងៃ ដែល​រៀបចំ​ដោយ​អង្គការ OXFAM ក្នុង​រាជធានី​ភ្នំពេញ កាលពី​ថ្ងៃ​ព្រហស្បតិ៍​ថា ជោគជ័យ​ដែល​សហគមន៍​នៅ​អារ៉ែង​ទទួល​បាន​នោះ​គឺ​ដោយសារ​តែ​ពួកគេ​ធ្វើ​រឿង​មួយ​តូច​ឲ្យ​ក្លាយ​ទៅ​ជា​រឿង​មួយ​ផ្ទុះ​ធំ និង​ល្បី​រន្ទឺ​ទាំង​ក្នុង និង​ក្រៅ​ប្រទេស​។

គុណឌី បញ្ជាក់​ថា​៖ «អាជ្ញាធរ​ខេត្ត​កោះកុង ចង់​ទៅ​កាន់​តំបន់​អារ៉ែង កាលពី​ខែ​មុន ហើយ​យើង​បាន​ដាក់​ឡាន​បិទ​ផ្លូវ គឺ​ក្នុង​គោលបំណង​ឲ្យ​កម្លាំង​អាជ្ញាធរ​ចាប់​ពួកយើង​។ យើង​បាន​សម្រេច​មែន គឺ​ពួកគេ​ចាប់​ពួកយើង ១១ នាក់។ ហ្នឹង​ហើយ​ជា​ជោគជ័យ​របស់​យើង​»។

លោក​ពន្យល់​ថា ព្រោះ​គ្រាន់តែ​ចាប់ខ្លួន​ភ្លាម បណ្តាញ​សង្គម ហ្វេសប៊ុក​និង​សារព័ត៌មាន បាន​ផ្សាយ​យ៉ាង​ផុសផុល ដែល​ធ្វើឲ្យ​ពលរដ្ឋ​នៅ​កម្ពុជា​និង​ពិភពលោក ដឹង​កាន់តែ​ច្រើន​ឡើងៗ ពី​បញ្ហា​នៅ​អារ៉ែង និង​នៅ​តែ​បន្ត​តាមដាន​រហូត​មក​។

ហេង សំណាង អាយុ​២១​ឆ្នាំ ជា​សកម្មជន​ម្នាក់​ទៀត បាន​ថ្លែង​ថា​៖ «យើង​ជា​សកម្មជន​ព្រៃឈើ​គឺ​មិន​ខ្លាច​អ្វី​ទាំងអស់។ យើង​បន់​ឲ្យ​តែ​គេ​ចាប់​យើង វ៉ៃ​យើង គឺ​យើង​ជោគជ័យ​ហើយ​។ ពេល​គេ​ចាប់​យើង គេ​ថា​អាជ្ញាធរ​អាក្រក់ និង​យល់​ថា គម្រោង​សាងសង់​ទំនប់​វារីអគ្គិសនី​ហ្នឹង​បង្ក្រាប​ដោយ​ភាព​ឃោរឃៅ និង​កាន់តែ​ចូលរួម ជួយ​តំបន់​អារ៉ែង»។

សកម្មជន​ទាំង​ពីរ​នាក់ បន្ត​ថា កិច្ចខិតខំ​បន្ត​ទៀត របស់​ពួកគេ គឺ​ពង្រឹង​សហគមន៍​តាំង​ស្មារតី​បង្កើន​ចំណេះដឹង​ច្បាប់ ភាសា​អង់គ្លេស និង​ចេះ​ប្រើ​អ៊ីនធឺណិត ដើម្បី​ផ្សព្វផ្សាយ​ឲ្យ​ពិភពលោក​ដឹង​កាន់តែ​ច្រើន ពី​យុទ្ធនាការ​ដើម្បី​ធ្វើ​យ៉ាង​ម៉េច​ឲ្យ​ទទួល​បាន​ការ​គាំទ្រ​កាន់តែ​ច្រើន​ថែម​ទៀត​។

បន្ទាប់ពី​ជំនួប​បិទទ្វារ នៅ​រដ្ឋសភា​ជាមួយ​លោកនាយករដ្ឋមន្ត្រី ហ៊ុន សែន​កាលពី​សប្តាហ៍​មុន​លោក​សម រង្ស៊ី មេបក្ស​ប្រឆាំង​បាន​ប្រាប់​ក្រុម​អ្នកកាសែត​ថា លោក​ហ៊ុន សែន បាន​ប្រាប់​លោក​ថា ទំនប់​វារីអគ្គិសនីអារ៉ែង នឹង​មិន​ត្រូវ​សាងសង់​នៅក្នុង​អាណត្តិ​នេះ​ទេ។

ព័ត៌មាន​នៃ​ការ​ផ្អាក​គម្រោង​សង់​ទំនប់​អារ៉ែង​នេះ គឺ​បាន​កើតឡើង​បន្ទាប់ពី​អាជ្ញាធរ​ខេត្ត​កោះកុង បាន​ឃាត់​ខ្លួន​សកម្មជន​ដែល​ប្រឆាំង​នឹង​គម្រោង​សង់​ទំនប់​នេះ​ចំនួន​១១​នាក់៕

0

Comments

Please, login or register to post a comment