.jpg)
ក្រុមកណ្តុរសអេហ្វស៊ី (ក្រហម) និងក្រុម Panda FC បានថតជុំគ្នាជាមួយតំណាងអ្នកស្ពនស័រ។ រូប សហការី
ភ្នំពេញៈ ក្រុមកណ្តុរសអេហ្វស៊ី ដែលទើបទទួលបានចំណាត់ថ្នាក់លេខ ១ ប្រចាំនៅមណ្ឌលខេត្តព្រៃវែង នៃការប្រកួតកីឡាហ្វុតសាលដណ្តើមពានរង្វាន់ស្ពនស័រ ឆ្នាំ ២០១៧ (Sponsor Futsal Cup) បានអះអាងថា ពួកគេមានសមត្ថភាពគ្រប់គ្រាន់ ក្នុងការប្រជែងនៅជុំផ្តាច់ព្រ័ត្រ ពិសេសជាមួយក្រុមខ្លាំងទាំង ២ ប្រចាំនៅមណ្ឌលភ្នំពេញ ដោយសារតែក្រុមកណ្តុរស ក៏មានមូលដ្ឋាននៅភ្នំពេញ ដែរ។
លោក អ៊ូ រតនា ប្រធានក្លិបកណ្តុរសអេហ្វស៊ី បានប្រាប់កាលពីម្សិលមិញថា៖ «វាមិនមែនជារឿងងាយស្រួលនោះទេ សម្រាប់ការឈ្នះកៅអីប្រចាំនៅមណ្ឌលខេត្តព្រៃវែង គឺយើងប៊ិះនឹងធ្លាក់របស់គេដែរ ដោយសារតែក្រុមចូលរួមនៅមណ្ឌលនេះមានកម្រិតលេងខ្លាំងប្រមាណ ៨ ទៅ ១០ ក្រុមដែរ ប៉ុន្តែយើងមានសំណាង និងសមត្ថភាពរបស់យើងដែរ ទើបយើងទទួលបានលេខ ១»។
តាមរយៈការប្រកួត ២ ថ្ងៃពេញ នៅលើទីលានក្នុងក្លិបកីឡាសុកញ្ញា (អ្នកលឿង) កាលពីថ្ងៃសៅរ៍ និងថ្ងៃអាទិត្យ កន្លងមកនេះ ក្រុមកណ្តុរសអេហ្វស៊ី បានឈ្នះការប្រកួតទាំងអស់ គឺឈ្នះក្រុមស្ទាំងសបវេល ៥-១ ឈ្នះក្រុមសេនាព្រះរាម ១០-១ ក្នុងវគ្គជម្រុះតាមពូល រួចបានបន្តឈ្នះក្រុម Banana FT ៦-២ ក្នុងវគ្គ ៨ ក្រុម ឈ្នះក្រុមការិយាល័យស្រុកព្រះស្តេច ៧-៥ ក្នុងវគ្គពាក់កណ្តាលផ្តាច់ព្រ័ត្រ និងចុងក្រោយ កណ្តុរស បានឈ្នះក្រុម Panda FC ៩-២ ក្នុងវគ្គផ្តាច់ព្រ័ត្រ។
ជាមួយលទ្ធផលនេះ ក្រុមកណ្តុរសអេហ្វស៊ី ទទួលបានប្រាក់រង្វាន់ ២ លានរៀល ឯក្រុមលេខ ២ Panda FC បាន ១,៦ លានរៀល ហើយក្រុមទាំង ២ នេះ គឺជាបេក្ខភាពតំណាងឲ្យមណ្ឌលខេត្តព្រៃវែង ដែលត្រូវឡើងទៅប្រកួតជុំផ្តាច់ព្រ័ត្រ ជាមួយក្រុម Rolling FC ក្រុម Home Sport FC មកពីមណ្ឌលភ្នំពេញ ក្រុម Sisophon FC ក្រុម Family FC របស់មណ្ឌលខេត្តបន្ទាយមានជ័យ ក្រុម Garuda FC និងក្រុម Next Step FC មកពីមណ្ឌលខេត្តសៀមរាប និងក្រុមខ្លាំង ២ ទៀត មកពីមណ្ឌលខេត្តព្រះសីហនុ ដែលមិនទាន់រកឃើញទេ។
ទាក់ទងនឹងការត្រៀមប្រកួតជុំផ្តាច់ព្រ័ត្រនេះ លោក អ៊ូ រតនា បានបញ្ជាក់ថា៖ «យើងពិបាកថាដែរ ព្រោះយើងមិនធ្លាប់ឃើញពីទម្រង់លេងរបស់ក្រុមមកពីមណ្ឌលឆ្ងាយៗនោះទេ ប៉ុន្តែយើងបានដឹងពីកម្រិតលេងរបស់ក្រុមទាំង ២ នៅមណ្ឌលភ្នំពេញ ហើយបើធ្វើការប្រៀបធៀបពីបច្ចេកទេសលេង គឺពួកយើងអាចប្រកួតប្រជែងជាមួយគេបាន ឯលទ្ធផលចុងក្រោយ វាអាចស៊ីសងទៅនឹងសំណាង»។
ចំណែកឯ លោក សឹម សានត្រាន តំណាងភេសជ្ជៈស្ពនស័រ និងជាអ្នកគ្រប់គ្រងការប្រកួតហ្វុតសាលដណ្តើមពានរង្វាន់ស្ពនស័រនេះ ក៏បានសរសើរពីកម្រិតលេងរបស់ក្រុមកណ្តុរសអេហ្វស៊ី និងក្រុម Panda FC ផងដែរ បើទោះបីជាមណ្ឌលខេត្តព្រៃវែងនេះ មានក្រុមចូលរួមប្រកួតជាក់ស្តែងត្រឹម ១៨ ក៏ដោយ។
លោក សឹម សានត្រាន បានប្រាប់កាលពីម្សិលមិញថា៖ «បើទោះបីជាមណ្ឌលខេត្តព្រៃវែង មានចំនួនក្រុមចូលតិចជាងមណ្ឌលផ្សេងៗទៀត ដោយសារការប្រកួតមណ្ឌលនេះ វាជាន់ទៅនឹងការប្រកួតបាល់ទាត់អបអរថ្ងៃ ៧ មករា ប៉ុន្តែការប្រកួតមានភាពស្វិតស្វាញ និងមានអ្នកគាំទ្រច្រើន មិនចាញ់មណ្ឌលផ្សេងៗនោះទេ។ រីឯកម្រិតលេងរបស់ក្រុមកណ្តុរសអេហ្វស៊ី និង Panda FC តំណាងឲ្យមណ្ឌលនេះ គឺខ្លាំង អាចប្រកួតប្រជែងជាមួយក្រុមខ្លាំងៗមកពីមណ្ឌលផ្សេងទៀត ក្នុងជុំផ្តាច់ព្រ័ត្របាន»៕
