Search form

Login - Register | FOLLOW US ON

Logo of Phnom Penh Post newspaper Phnom Penh Post - កម្ពុជា ៣ នាក់ ប៉ះ​សុទ្ធ​តែ​ជើង​ខ្លាំង​របស់​ថៃ

Content image - Phnom Penh Post
ពៅ ស័ក្តិសិទ្ធិ ត្រូវ​ជួប​ជើង​ខ្លាំង​របស់​ថៃ Kamlai Phit នៅ​សង្វៀន SEATV ថ្ងៃសៅរ៍។ ស្រេង ម៉េងស្រ៊ុន

កម្ពុជា ៣ នាក់ ប៉ះ​សុទ្ធ​តែ​ជើង​ខ្លាំង​របស់​ថៃ

ភ្នំពេញៈ កីឡាករ​កម្ពុជា សរ រាជសីហ៍ ពៅ ស័ក្តិ​សិទិ្ធ និង វ៉ែន សុវណ្ណ ដែល​ត្រូវ​ដាក់​ឲ្យ​ប្រកួត​មិត្តភាព​អន្តរជាតិ នៅ​សង្វៀន SEATV ថ្ងៃ​សៅរ៍ និង​ថ្ងៃ​អាទិត្យ ខាង​មុខនេះ គឺមាន​សមត្ថភាព​ចាញ់​ប្រៀប​អ្នក​ប្រដាល់​ថៃ​ដូចគ្នា ដែល​ត្រូវ​បាន​គេហ៊ាន​ព្យាករ​ថា មិនអាច​ឈ្នះ​ថៃ​បានទេ ប្រសិន​បើ​ពួកគេ​ប្រឹង​ប្រកួត​គ្នា​អស់ពី​សមត្ថភាព​នោះ។

សម្រាប់​ការ​ប្រកួត​នេះ សរ រាជសីហ៍ ត្រូវប៉ះ​ជើង​ខ្លាំង Chhuok Chhai ក្នុង​ទម្ងន់ ៦៩ គីឡូក្រាម នៅ​រសៀល​ថ្ងៃ​សៅរ៍ ហើយ ពៅ ស័ក្តិសិទិ្ធ ត្រូវ​ប្រឈម​ជាមួយ Kamlai Phit ក្នុង​ទម្ងន់ ៧១ គីឡូក្រាម ថ្ងៃ​នោះ​ដែរ។ ចំណែក វ៉ែន សុវណ្ណ ជួប K.Nongsilek ក្នុង​ទម្ងន់ ៦៩ គីឡូក្រាម នៅ​រសៀល​ថ្ងៃ​អាទិត្យ ជាមួយ ង៉ែត្រ រដ្ឋា ដែល​ត្រូវ​ប្រកួត​ក្នុង​ទម្ងន់ ៦៣,៥ គីឡូក្រាម​ជាមួយ​ថៃ Yorth Sayam។

តាម​សមត្ថភាព​ប្រកួត​ជាក់​ស្តែង​កន្លងមក Chhuok Chhai ធ្លាប់​ឈ្នះ​ខ្សែ​ក្រវាត់​នៅ​សង្វៀន​ស៊ីធីអិន ដោយ​គេធ្លាប់​ឈ្នះ ផាន់ គ្រាន់, ឡុង សុភី, ឡុង សុវណ្ណឌឿន, សរ រាជសីហ៍, ឃីម ឌីម៉ា និង​ជើង​ខ្លាំង​ជាច្រើន​ទៀត ហើយ​តាម​កម្រិត​នៃការ​ប្រកួត​នោះ​គឺ សរ រាជសីហ៍ លំបាក​យក​ឈ្នះ​ថៃ​ម្នាក់​នេះ​ណាស់។

ចំណែក ពៅ ស័ក្តិសិទិ្ធ ដែល​ត្រូវ​ជួប KamLai Phit ក៏ស្រដៀង​គ្នា​នេះដែរ ពីព្រោះ​ថៃ​រូបនេះ​ធ្លាប់​ធ្វើ​ឲ្យ​កីឡាករ​ខ្លាំង​របស់​កម្ពុជា​ខ្លាច​ក្បាច់​ជង្គង់​របស់​គេ ពិសេស រឿង សោភ័ណ្ឌ, ឡុង សុភី, កែវ រំចង់, ព្រំ សំណាង, មាស ភិរម្យ និង សុខ ទូច ជាដើម ដែល​ខ្លះ​ចាញ់​ដោយ​ពិន្ទុ និងខ្លះ​ទៀត​សន្លប់​ក្រោម​ទម្ងន់​ជើង​ថៃ​នេះ ប៉ុន្តែ Kamlai Phit ធ្លាប់​ចាញ់ អ៊ុង វិរៈ។

ចំពោះ វ៉ែន សុវណ្ណ ដែល​មាន​ប្រវត្តិ​ប្រកួត​ច្រើន​នោះ ក្នុង​រយៈ​ប៉ុន្មាន​ឆ្នាំ​ចុងក្រោយ​នេះ បាន​ធ្លាក់​នូវ​កម្រិត​វិជ្ជាគុន និង​មាន​កម្លាំង​ខ្សោយ ដោយ​គេកាន់​តែមាន​អាយុ​ច្រើន ហើយ​ក៏មាន​ឱកាស​ប្រកួត​យូរៗ​ម្តង​ផងដែរ ហេតុនេះ វ៉ែន សុវណ្ណ ដែល​ធ្លាប់​ប្រកួត ១៥០ ឈ្នះ ១២០ ចាញ់ ២៥ ស្មើ ៥ ប្រហែល​ជា​ទៅ​មិនរួច​ជាមួយ​កីឡាករ​ដ៏​រឹងមាំ K.Nongsilek របស់​ថៃ ដែល​ធ្លាប់​ប្រកួត​បាន ១០៥ ឈ្នះ ៨៨ ចាញ់ ១៥ និង​ស្មើ ២ ដងនោះ​ទេ។

ជុំវិញ​ការផ្គូផ្គង​កីឡាករ​នេះ លោក ញាន សុធី អ្នក​គ្រប់គ្រង​ការប្រកួត​ចាំ​សង្វៀន SEATV បាន​ប្រាប់​ថា៖ «យើង​មានការ​គិតគូរ​និង​យក​ចិត្ត​ទុកដាក់​ខ្លាំង​ណាស់​ក្នុងការ​ផ្គូផ្គង ព្រោះ​ក្នុង​មួយ​សប្តាហ៍​គូ​អន្តរជាតិ​មាន​ជាង ១០ គូ​សម្រាប់​សង្វៀន​យើង ហេតុនេះ​ការប្រៀប​ធៀប​ឲ្យមាន​សមត្ថភាព​តាម​គោលការណ៍​បច្ចេកទេស​ទាំង ៦ ចំណុច ឬ​ស្មើគ្នា​នោះ លំបាក​រកណាស់ ហើយ​បើយើង​មិនហ៊ាន​ប៉ះ​ប្រកួត​ជាមួយ​អ្នកខ្លាំង​ទេ​កីឡាករ​យើង​ក៏មិន​អាច​ខ្លាំង​ទៅ​បាន​ដែរ។ ប៉ុន្តែ យើង​ក៏មាន​កីឡាករ​លំដាប់​មាន​ប្រៀប​ជាង​ថៃខ្លះ​ដែរ​ដូចជា ឃីម ឌីម៉ា,មាស ច័ន្ទមាន,យុគ យក្ស​ផ្លែ,ព្រំ សំណាង,ង៉ែត្រ រដ្ឋា, ឃីម បូរ៉ា,រឿង សារ័ត្ន ជាដើម ដែល​ត្រូវ​ដាក់​ឲ្យ​ប្រកួត​ជាមួយ​ថៃ ក្នុង​សប្តាហ៍​នេះ»៕

0

Comments

Please, login or register to post a comment