ភ្នំពេញ: ការប្រកួតលីកកីឡាបាល់ទាត់របស់អង្គការផ្កាយសមុទ្ររដូវកាលថ្មីឆ្នាំ ២០១៧- ២០១៨ ដែលទទួលបានការឧបត្ថម្ភពីក្រុមហ៊ុនធានារ៉ាប់រងអាយុជីវិត AIA បានឈានដល់សប្តាហ៍ទី ៦ ហើយ បន្ទាប់ពីបើកការប្រកួតជាផ្លូវការតាំងពីថ្ងៃទី ២៦ ខែវិច្ឆិកា ឆ្នាំ ២០១៧ មកម្ល៉េះ។
លោកភី វឌ្ឍនា ដែលជាមន្ត្រីសម្របសម្រួលព័ត៌មាននៃអង្គការផ្កាយសមុទ្រ បានឲ្យដឹងថា៖ «ការប្រកួតនេះជាឆ្នាំទី ១ ដែលក្រុមហ៊ុនធានារ៉ាប់រងឈ្មោះ AIA បានឧបត្ថម្ភលីកកីឡាបាល់ទាត់នេះទាំងស្រុងដល់អង្គការផ្កាយសមុទ្រ បន្ទាប់ពីចុះកិច្ចព្រមព្រៀងឧបត្ថម្ភរយៈពេល ៣ ឆ្នាំជាប់គ្នារហូតដល់ឆ្នាំ ២០១៩»។
លោកបានបន្ថែមថា៖ «កម្មវិធីប្រកួតឆ្នាំ ២០១៨ នេះមានក្រុមចួលរួមចំនួន ១០១ ក្រុម មកពីអង្គការសាលារៀន និងព្រមទាំងសហគមន៍ដែលជាដៃគូរបស់អង្គការផ្កាយសមុទ្រ។ នៅក្នុងនោះដែរ កម្មវិធីប្រកួតនឹងប្រារព្ធធ្វើឡើងនៅរៀងរាល់ថ្ងៃអាទិត្យ នៅទីលានអង្គការផ្កាយសមុទ្រ ស្រុកកណ្តាលស្ទឹង ខេត្តកណ្តាល»។
បើយោងតាមកម្មវិធីប្រកួត យុទ្ធនាការនេះត្រូវបានបែងចែកចេញជា ៦ ប្រភេទអាយុ ដែលនៅក្នុងនោះមាន កុមារាអាយុក្រោម ១៨ ឆ្នាំ មាន ២១ ក្រុម។ កុមារាអាយុក្រោម ១៤ ឆ្នាំ មាន ១៦ ក្រុម កុមារីអាយុក្រោម ១៤ ឆ្នាំ មាន ១៩ ក្រុម។
កុមារាអាយុក្រោម ១០ ឆ្នាំ មាន ១៩ ក្រុម កុមារីអាយុក្រោម ១៨ ឆ្នាំ។ គម្រោងកម្មវិធីប្រកួតនេះត្រូវបានកំណត់នឹងបញ្ចប់នៅចុងខែឧសភា ឆ្នាំ ២០១៨ ខាងមុខ។
កញ្ញា ជួប វិច្ឆិកា នាយិកាអង្គការផ្កាយសមុទ្រ មានប្រសាសន៍ឲ្យដឹងថា៖ «អង្គការផ្កាយសមុទ្របានចាប់ផ្តើមមានវត្តមាននៅព្រះរាជាណាចក្រកម្ពុជាតាំងពីឆ្នាំ ២០០៦ ដែលមានគោលបំណង និងទស្សនវិស័យផ្តោតការយកចិត្តទុកដាក់ដល់ក្មេង ដែលគ្មានលទ្ធភាពចូលសាលារៀន និងគ្មានឱកាសបានលេងកីឡាឲ្យមកប្រមូលផ្តុំ»។
កញ្ញាបានប្រាប់បន្តថា៖ «ការប្រមូលផ្តុំនេះ ធ្វើឡើងក្រោមការគ្រប់គ្រងផ្ទាល់ទទួលខុសត្រូវពីអង្គការ ដោយរ៉ាប់រងលើការអប់រំបណ្តុះបណ្តាល និងលេងកីឡាបាល់ទាត់ ក្នុងការតម្រង់ទិស និងឧបនិស្ស័យដល់ពួកគេសម្រាប់ជាអាជីពក្នុងពេលអនាគត»។
នាយិការូបនេះបានបន្ថែមទៀត៖ «រយៈពេលជាង ១០ ឆ្នាំមកនេះ អង្គការគ្រប់គ្រង និងបណ្តុះបណ្តាលលើកុមារគ្មានទីពឹង កុមារគ្មានលទ្ធភាពចូលសាលារៀន និងលេងកីឡា និងក្មេងគថ្លង់សរុប ៦៨០ នាក់ ក្នុងនោះបានបណ្តុះបណ្តាលឲ្យហ្វឹកហាត់កីឡាបាល់ទាត់បានចំនួន ៣៨០០ នាក់»៕