ភ្នំពេញ: លោកហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡាបានប្រគល់ប្រាក់ចំនួន ១ ៧៤២ ៩០០ ០០០ រៀល ដល់កីឡាចំនួន ៥ ប្រភេទដែលឈ្នះមេដាយពីព្រឹត្តិការណ៍អន្តរជាតិនានាកន្លងមកនៅសាលប្រជុំទីស្តីការក្រសួង កាលពីរសៀលថ្ងៃព្រហស្បតិ៍ ម្សិលមិញ ដោយមានការចូលរួមពីមន្ត្រីសហព័ន្ធកីឡាជាតិ និងថ្នាក់ដឹកនាំពាក់ព័ន្ធផ្នែកអប់រំកីឡា។
លោកប៉ុន សុខ នាយកមជ្ឈមណ្ឌលជាតិហ្វឹកហ្វឺនកីឡានៃក្រសួងអប់រំ យុវជន និងកីឡា បានផ្តល់សម្ភាសតាមទូរស័ព្ទឲ្យភ្នំពេញ ប៉ុស្តិ៍ កាលពីម្សិលមិញថា៖ «អ្នកឈ្នះមេដាយចំនួន ៥ ប្រភេទកីឡា បានទទួលថវិកាតាមប្រកាសរបស់អន្តរក្រសួងក្រោមវត្តមានរបស់ឯកឧត្តមហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា»។
លោកបានលម្អិតថា៖ «កីឡាទាំង ៥ ប្រភេទនោះមានដូចជាជយលាភីនៃការប្រកួតកីឡា ហ្សូរិនជីកាំប៉ូ ជើងឯកពិភពលោកនៅសហរដ្ឋអាមេរិក ទទួលបានរង្វាន់ទឹកប្រាក់ចំនួន ១២៨ ០០០ ០០០ រៀល។ ទី ២ ជយលាភីប្រកួតកីឡាចំបាប់ជើងឯកអាស៊ីអាគ្នេយ៍ដែលកម្ពុជាធ្វើជាម្ចាស់ផ្ទះនោះ មានប្រាក់រង្វាន់ចំនួន ២៥៤ ៩០០ ០០០ រៀល។ ទី៣ ជយលាភីប្រកួតកីឡាតេក្វាន់ដូ ITF (International Taekwondo Federation) ជើងឯកពិភពលោក នៅប្រទេសកូរ៉េខាងជើង មានប្រាក់រង្វាន់ចំនួន ៨៤៤ ០០០ ០០០ រៀល»។
លោកប៉ុន សុខ បានប្រាប់បន្តថា៖ «ទី ៤ ជយលាភីប្រកួតកីឡានៃបណ្ដាប្រទេសនិយាយភាសាបារាំង នៅប្រទេសកូតឌីវ័រ (ហ្វ្រង់កូហ្វូន) ដែលមានប្រាក់រង្វាន់ចំនួន ១២៨ ០០០ ០០០ រៀល និងទី ៥ ការប្រកួតកីឡាកាយវប្បកម្ម (Body Building) ជើងឯកពិភពលោក នៅប្រទេសម៉ុងហ្គោលីដែលទទួលបានប្រាក់រង្វាន់ចំនួន ៣៨៤ ០០០ ០០០ រៀល»។
លោកតឹក ប៊ុនវី អាយុ ៤២ ឆ្នាំមានទម្ងន់ ៨០ គីឡូក្រាម កម្ពស់ ១,៧៩ ម៉ែត្រ ដែលឈ្នះមេដាយប្រាក់កីឡាកាយវប្បកម្ម បានឲ្យដឹងថា៖ «នេះជាថ្ងៃទទួលបានប្រាក់រង្វាន់ដែលខ្ញុំបានព្យាយាមហ្វឹកហាត់ និងឆ្លងកាត់ការប្រកួតរយៈពេលជិត ១០ ឆ្នាំ»។
អ្វីដែលអស្ចារ្យសម្រាប់ជីវិតរបស់លោកតឹក ប៊ុនវី គឺថា ក្តីស្រមៃរបស់លោកបានក្លាយទៅជាការពិត ដែលបានកើតឡើងនៅថ្ងៃទី ៧ ខែតុលា ឆ្នាំ ២០១៧ នោះឯង ខណៈដែលលោកបានចូលរួមការប្រកួតកម្រិតពិភពលោកនៅប្រទេសម៉ុងហ្គោលី ដោយមានជាង ៤០ ប្រទេសចូលរួម។
លោកទទួលបានចំណាត់ថ្នាក់លេខ ២ មេដាយប្រាក់ ខណៈមិត្តរួមឈាមខ្មែររបស់លោកគឺកីឡាករសំបូរ ណាន និងកីឡាករណុំ សុបិន្ត បានឈ្នះមេដាយមាស៕