ភ្នំពេញៈ ក្រុមកីឡាប៉េតង់ វ៉ូវីណាម និងកាយសម្ព័ន្ធ សុទ្ធតែបានបង្កើតកំណត់ត្រាដ៏គួរឲ្យភ្ញាក់ផ្អើល ក្នុងវិស័យកីឡានៅកម្ពុជា ក្នុងឆ្នាំ ២០១៧ ព្រោះប្រភេទកីឡាទាំង ៣ នេះ សុទ្ធតែដណ្តើមបានមេដាយមាសកម្រិតពិភពលោក ខណៈកីឡាគុនខ្មែរ បានឈ្នះមេដាយមាស នៅស៊ីហ្គេម ជាប្រវត្តិសាស្ត្រ ហើយតេក្វាន់ដូ WTF បានវិលមករកការឈ្នះបានមេដាយមាសជាថ្មី ក្នុងស៊ីហ្គេម នោះដែរ ស្របពេលកម្ពុជា ឈ្នះបានមេដាយមាស ៣ ប្រាក់ ២ និងសំរឹទ្ធ ១២។
កីឡាប៉េតង់ នៅតែលេចធ្លោ ខ្លាំងលើការឈ្នះមេដាយមាស
ក្រុមអត្តពលិកកីឡាប៉េតង់ នៅតែបង្ហាញពីស្នាដៃយ៉ាងមានមោទនភាពជូនជាតិ ជាងប្រភេទកីឡាផ្សេងៗទៀត ព្រោះនៅឆ្នាំ ២០១៧ ក្រុមប៉េតង់ បានឈ្នះមេដាយមាសទាំងកម្រិតពិភពលោក កម្រិតអាស៊ី និងស៊ីហ្គេម នៅម៉ាឡេស៊ី។
តាមរយៈការប្រកួតកីឡាប៉េតង់ជើងឯកពិភពលោកចំនួន ២ លើក ដែលធ្វើក្នុងឆ្នាំ ២០១៧ វីរនារី កែ ឡេង បានឈ្នះមេដាយមាស ជើងឯកពិភពលោក នៅប្រទេសចិន ខណៈកីឡាការិនី ស្រ៊ាង សុរ៉ាឃីម បានមេដាយសំរឹទ្ធ ហើយវាក៏ជាពេលដែល អ្នកស្រី បានបំបែកកំណត់ត្រាពិសេសមួយ គឺការឈ្នះបានមេដាយមាស ៣ ជំនាន់ជាប់ៗគ្នា លើវិញ្ញាសាវាយយកពិន្ទុ កម្រិតពិភពលោក ផងដែរ។
ចំណែកវីរនារី អ៊ុក ស្រីមុំ បានឈ្នះមេដាយមាសពិភពលោក នៅប្រទេសបែលហ្សិក លើវិញ្ញាសា ១ ទល់ ១ នាក់ ខណៈកីឡាករ ញ៉ែម បូរ៉ា និង ស្រ៊ាង សុរ៉ាឃីម ឈ្នះមេដាយប្រាក់ ១ លើការប្រកួតជាគូ។
ចំណែកការប្រកួតជើងឯកអាស៊ី នៅថៃក្រុមប៉េតង់កម្ពុជា បានឈ្នះមេដាយមាស ៣ លើវិញ្ញាសាជាក្រុមបុរស ក្រុមយុវជន និងវាយយកពិន្ទុយុវជនរបស់ ឃួន លីហ័រ រួមទាំងមេដាយសំរឹទ្ធ ២ ទៀត។
ចំពោះការប្រកួតស៊ីហ្គេម នៅម៉ាឡេស៊ី ឆ្នាំ ២០១៧ កីឡាការិនី កែ ឡេង និង អ៊ុក ស្រីមុំ បាន រួមគ្នាឈ្នះមេដាយមាស លើការវាយគូនារីឲ្យកម្ពុជា បន្ថែមទៅលើការឈ្នះមេដាយប្រាក់ ១ និងសំរឹទ្ធចំនួន ៣ ផ្សេងទៀត លើប្រភេទកីឡាប៉េតង់នេះ។
ក្រុមវ៉ូវីណាម ទទួលបានប្រាក់រង្វាន់ចូល ១ លានដុល្លារ
យ៉ាងណាមិញ ក្រុមកីឡាវ៉ូវីណាមកម្ពុជា ទទួលបានជោគជ័យខ្លាំងបំផុត ក្នុងឆ្នាំ ២០១៧ ដោយដណ្តើមបានមេដាយមាស ៤ ប្រាក់ ៩ និងសំរឹទ្ធ ៨ ពីការប្រកួតកីឡាវ៉ូវីណាមជើងឯកពិភពលោក នៅឥណ្ឌា ហើយលទ្ធផលនេះបានធ្វើឲ្យក្រុមនេះ បានរង្វាន់ពីរាជរដ្ឋាភិបាលច្រើនជាងគេ ក្នុងឆ្នាំ ២០១៧ គឺរហូតដល់ ១ លានដុល្លារ។
កីឡាកាយវប្បកម្មកម្ពុជា ឈ្នះមេដាយមាសពិភពលោក ជាប្រវត្តិសាស្ត្រ លើកទី ១
ដោយឡែក ក្រុមលេងសាច់ដុំនៃប្រភេទកីឡាកាយវប្បកម្ម គឺបានបង្កើតស្នាដៃដ៏ធំរបស់ខ្លួន ក្នុងឆ្នាំ ២០១៧ ដោយពួកគេបានឈ្នះមេដាយមាសពីការប្រកួតជើងឯកពិភពលោក នៅម៉ុងហ្គាលី ជាលើកដំបូង ក្រោយតស៊ូលើវិថីមួយនេះអស់រយៈពេលជាង ១០ ឆ្នាំ ក្នុងនោះកីឡាករ សំបូរ ណាន ឈ្នះបានមេដាយមាស កីឡាករ តឹក ប៊ុនរី បានឈ្នះមេដាយប្រាក់ ហើយកីឡាករ ណុំ សុបិន្ត ឈ្នះបានមេដាយសំរឹទ្ធ។
២.កីឡាតេក្វាន់ដូ នៅតែមានសក្តានុពល ឈ្នះបានមេដាយ
ក្រុមកីឡាតេក្វាន់ដូ (WTF) នៅតែបន្តសាងបានស្នាដៃល្អលើឆាកអន្តរជាតិ ដោយក្នុងនោះម្ចាស់មេដាយមាសកីឡាអាស៊ី និងជាអ្នកឈ្នះកៅអីទៅប្រកួតអូឡាំពិកដោយពេញសិទ្ធិ ស៊ន សៀវម៉ី បានឈ្នះមេដាយមាស ការប្រកួតស៊ីហ្គេម នៅម៉ាឡេស៊ី បន្ថែមទៅលើការឈ្នះមេដាយសំរឹទ្ធ ២ ផ្សេងទៀត។
លើសពីនេះ ខេមរៈសហព័ន្ធកីឡាតេក្វាន់ដូ បានរៀបចំឲ្យមានការប្រកួតកីឡាតេក្វាន់ដូកម្រិតអាស៊ី Asia Kukkiwon Taewondo Hanmadang ជាលើកដំបូង នៅប្រទេសកម្ពុជា ដោយឈ្នះបានមេដាយសរុបរហូតដល់ ១៣៥ គ្រឿង ក្នុងនោះមានមាស ៣៦ ប្រាក់ ៣៥ និងមេដាយសំរឹទ្ធ ៦៤ ដើម្បីឈរនៅលេខ ១ ក្នុងចំណោមប្រទេសចូលរួមចំនួន ៧។
កីឡាគុនខ្មែរ ឈ្នះមេដាយមាស នៅស៊ីហ្គេម ជាប្រវត្តិសាស្ត្រ
សហព័ន្ធកីឡាប្រដាល់គុនខ្មែរ បានចាត់ទុក ២០១៧ ជាឆ្នាំប្រវត្តិសាស្ត្រ ដែលសហព័ន្ធនេះ ត្រូវបានក្រសួងអប់រំ យុវជន និងកីឡា និង NOCC ដាក់ឲ្យប្រភេទកីឡាគុនខ្មែរ ទៅប្រកួតស៊ីហ្គេម នៅម៉ាឡេស៊ី ហើយជាលទ្ធផល ឃីម ឌីម៉ា បានឈ្នះមេដាយមាស ម៉ឺន សុភា បានឈ្នះមេដាយប្រាក់ ហើយ កីឡាករ ឡៅ ចន្ទ្រា និង វ៉ាន វឿន បានឈ្នះមេដាយសំរឹទ្ធ ដូចគ្នា។
ការឈ្នះមេដាយ ជាប្រវត្តិសាស្ត្ររបស់ប្រភេទកីឡាគុនខ្មែរ នៅស៊ីហ្គេមនេះ បានធ្វើឲ្យការប្រកួតប្រដាល់នៅតាមប៉ុស្តិ៍ផ្សេងៗនៅកម្ពុជា កាន់តែទទួលបានការគាំទ្រច្រើន ហើយព្រឹត្តិការណ៍ប្រកួតអន្តរជាតិធំចំនួន ២ គឺការប្រកួត Khmer Thai Fighter និងការប្រកួតគុនខ្មែរអន្តរជាតិ ក៏ត្រូវបានរៀបចំឡើងឲ្យមាន ជាលើកដំបូង នៅកម្ពុជា ក្នុងឆ្នាំ ២០១៧ ដែរ រួមជាមួយព្រឹត្តិការណ៍ប្រកួតអន្តរជាតិ បែបឯកជន ជាច្រើនទៀត។
ផ្ទុយពីនេះកីឡាបាល់ទាត់ ដែលធ្លាប់មានអ្នកគាំទ្រខ្លាំងរយៈពេល ៣ ឆ្នាំចុងក្រោយនេះ បានធ្លាក់ប្រជាប្រិយភាព នៅឆ្នាំ ២០១៧ ហើយការធ្លាក់ចុះនូវចំនួនអ្នកទស្សនានេះ មកពីក្រុមជម្រើសជាតិកម្ពុជា ជួបការបរាជ័យច្រើនពេក ពិសេសការប្រកួតស៊ីហ្គេមនៅម៉ាឡេស៊ី គឺក្រុមកម្ពុជា ចាញ់ទាំង ៥ ប្រកួត។
យ៉ាងណាក៏ដោយ ក្នុងឆ្នាំ ២០១៧ សហព័ន្ធកីឡាបាល់កម្ពុជា បានបង្កើតសាលាទម្រង់ទិសបាល់ទាត់ ២៥ ខេត្ត-ក្រុង ដើម្បីតម្រង់ទិសឆ្ពោះទៅស៊ីហ្គេម ឆ្នាំ ២០២៣ នៅកម្ពុជា៕