ភ្នំពេញ: ការប្រកួត​ដណ្តើម​ខ្សែក្រវាត់​ភេសជ្ជៈ​ខារ៉ាបាវ​ទម្ងន់ ៦៣,៥ គ.ក្រ​នៃ​សង្វៀន​អាស៊ី​អាគ្នេយ៍ នឹង​ឈាន​ចូលដល់​វគ្គ​ផ្តាច់ព្រ័ត្រ​នៅ​រសៀល​ថ្ងៃសៅរ៍ ទី៥ ខែសីហា ឆ្នាំ ២០១៦ ខាង​មុខនេះ ក្រោយពី​ប្រកួត​ជម្រុះ​សន្សំ​ពិន្ទុ​អស់​ជាង ១០ សប្តាហ៍​កន្លងមក តាម​រូបមន្ត​ក្នុង​មួយពូល​យក​ម្នាក់​ទៅវគ្គ​ផ្តាច់ព្រ័ត្រ ដោយ​គ្មាន​ចំណាត់​ថ្នាក់​លេខ ៣ និងលេខ ៤ ទេ។ ឌុម កែវ​ដា មកពី​មកុដ​រាជសីហ៍​នៃ​ក្រសួង​មហាផ្ទៃ បាន​ឆ្លងកាត់​ការ​ការប្រកួត​ជម្រុះ​តាមពូល​ក្នុង​ខ្សែក្រវាត់​នេះ ដោយ​ឈ្នះ ៤ លើកពី​ការប្រកួត​ទាំង ៤ លើក មានពិន្ទុ​ខ្ពស់​ជាងគេ ដើម្បី​ទទួលបាន​សិទ្ធិ​ឡើងទៅ​ប្រកួត​វគ្គ​ផ្តាច់ព្រ័ត្រ​លើកនេះ។