ភ្នំពេញ: ការប្រកួតជម្រុះសន្សំពិន្ទុខ្សែក្រវាត់ Barrley Black ទម្ងន់ ៦៣,៥ គីឡូក្រាមលក្ខណៈអន្តរជាតិនៃសង្វៀនអាស៊ីអាគ្នេយ៍ នឹងឈានចូលសប្តាហ៍ទី ៣ ជុំទី ២ នៅល្ងាចថ្ងៃអាទិត្យ ទី ២៥ ខែកុម្ភៈ ឆ្នាំ ២០១៨ ខណៈ ២ សប្តាហ៍កន្លងមក កីឡាករកម្ពុជាចាញ់ប្រៀបកីឡាករថៃ ដោយក្នុងចំណោម ៤ គូ ថៃឈ្នះ ៣ គូ ខ្មែឈ្នះតែ ១ គូបុណ្ណោះ។
សប្តាហ៍នេះវ៉េង សុភ័ក្ត្រ ត្រូវប៉ះថៃ Den Phic-hhith ហើយឌុម កែវដា ត្រូវជួបជាមួយជើងខ្លាំងថៃកីឡាករ Loom Leng ដែលគេមើលឃើញថា ជាការប្រកួតមួយដ៏តឹងតែង និងគួរឲ្យព្រួយបារម្ភ។
កីឡាករថៃក្នុងអំឡុងប្រកួតខ្សែក្រវាត់ Barrley Black ទម្ងន់ ៦៣,៥ គីឡូក្រាមលើកនេះ សុទ្ធតែមានសមត្ថភាពល្អបច្ចេកទេសនិងកម្លាំងរឹងមាំ ដែលធ្វើឲ្យកីឡាករកម្ពុជាលំបាកស្វែងរកជ័យជម្នះបាន ៣ ពិន្ទុណាស់។ ក្នុងចំណោមកីឡាករកម្ពុជាចំនួន ៤ នាក់ មានតែផាន់ គ្រាន់ ម្នាក់គត់ឈ្នះបាន ៣ ពិន្ទុ ខណៈកីឡាករកម្ពុជា ៣ នាក់ទៀត មាន ឌុម កែវដា, មាស ច័ន្ទមាន និងវ៉េង សុភ័ក្ត្រ សុទ្ធតែចាញ់ថៃទាំងអស់ មានតែ ១ ពិន្ទុម្នាក់ប៉ុណ្ណោះ។
តាមប្រវត្តិប្រកួតកន្លងមករវាងឌុម កែវដា ជាមួយជើងខ្លាំងថៃ Loom Leng ធ្លាប់ប៉ះគ្នាចំនួន ៣ លើកក្នុងនោះ Loom Leng ធ្លាប់ផ្តួលឌុម កែវដា ឲ្យសន្លប់ ក្នុងទឹកទី ២ មួយលើក ប៉ុន្តែឌុម កែវដា ធ្លាប់សងសឹកឈ្នះវិញចំនួន ២ លើក ប៉ុន្តែ Loom Leng ជាម្ចាស់ខ្សែក្រវាត់ ១ ប្រចាំអាស៊ីអាគ្នេយ៍នេះតែម្តង។ ហេតុនេះ ការប្រកួតលើកនេះ គឺជាការជួបគ្នាជាលើកទី ៤។
ឌុម កែវដា មកពីក្លិបមកុដរាជសីហ៍នៃក្រសួងមហាផ្ទៃ ហ្វឹកហាត់ និងត្រៀមប្រកួតបានល្អ តាំងចិត្តប្រកួតខ្ពស់ ប៉ុន្តែមិនហ៊ានអះអាងថា អាចបន្តឈ្នះទៅលើកីឡាករថៃ Loom Leng នោះទេពីព្រោះហាក់បីដូចខ្លាចញញើតដៃគូ។
កីឡាកររូបនេះបាននិយាយថា៖ «កីឡាករថៃ Loom Leng រឹងមាំមិនងាយផ្តួលបានទេ ហើយខ្ញុំប្រឹងប្រកួតអស់ពីលទ្ធភាពក៏មិនអាចផ្តួលគេឲ្យសន្លប់បានឡើយ គឺយ៉ាងច្រើនឈ្នះពិន្ទុប៉ុណ្ណោះ។
កែវដា បានបន្ថែមថា៖ «ក្នុងការប្រកួតលើកនេះ ខ្ញុំមានទំនុកចិត្តត្រឹម ៦០ ភាគរយប៉ុណ្ណោះ ព្រមទាំងមានក្តីបារម្ភផង ពីព្រោះ កីឡាករថៃ Loom Leng ជាម្ចាស់ខ្សែក្រវាត់ម្នាក់នៅអាស៊ីអាគ្នេយ៍នេះ ហើយកីឡាករកម្ពុជាមួយចំនួនភាគច្រើនសុទ្ធតែធ្លាប់ចាញ់»។
លោកឈិន ក្វាន់ចៃ គ្រូបង្វឹក បាននិយាយថា៖ «ឌុម កែវដា មានតែស្នៀតកែង និងជង្គង់ប៉ុណ្ណោះ ដែលអាចយកឈ្នះកីឡាករថៃ Loom Leng បាន ក្រៅពីនេះ Loom Leng មានស្នៀតទាត់ល្អ វាយឆ្ងាយល្អ និងឱបឡើងជង្គង់ក៏ល្អជាងផងដែរ។ ប៉ុន្តែ កែវដា អាចនឹងឈ្នះដោយប្រើប្រាស់កែង»។
វ៉េង សុភ័ក្ត្រ មកពីក្លិបកងទ័ពឆ័ត្រយោង ៩១១ ត្រូវប៉ះជាមួយថៃ Den Phichhith ខណៈដែលកីឡាករថៃរូបនេះ កាលពីជុំទី ១ បានប្រកួតឈ្នះឌុម កែវដា ដោយពិន្ទុ។
រវាងវ៉េង សុភ័ក្ត្រ និង Den Phichhith មិនធ្លាប់ជួបប្រ-កួតគ្នាទេ ប៉ុន្តែសមត្ថភាព និងវិជ្ជាគុនវិញល្អម្យ៉ាងម្នាក់ ហើយទឹកចិត្តប្រកួតខ្លាំងមោះមុតដូចគ្នា។ លោកហង្ស សឿន គ្រូបង្វឹករបស់ វ៉េង សុភ័ក្ត្រ មិនហ៊ានទស្សន៍ទាយឬ ព្យាករលទ្ធផលមុនប្រកួតដែរ។
លោកមានប្រសាសន៍ថា៖ «ខ្ញុំមានសង្ឃឹមឈ្នះតិចតួចទេ ពីព្រោះកីឡាករថៃគេល្អដែរ»។
ទោះជាយ៉ាងណា លោកបានបញ្ជាក់ថា៖ «ការប្រកួតរឿងចាញ់ ឬឈ្នះមិនទាន់ដឹងទេ ប៉ុន្តែកូនសិស្សខ្ញុំទាំងអស់ដែលឡើងប្រកួតធានាថា វាយអស់ពីសមត្ថភាពគ្មានពាក់ព័ន្ធទៅនឹងការសង្ស័យ វាយមិនអស់ពីសមត្ថភាពនោះឡើយ។
វ៉េង សុភ័ក្ត្រ ជាកីឡាករវ័យក្មេង ទឹកចិត្តប្រកួតខ្លាំង វាយមិនចេះដកថយ ដោយកាលពីជុំទី ១ គេចាញ់ពិន្ទុកីឡាករថៃ Loom Leng ក្រោមពាក្យរិះគន់ថា កាត់ក្តីអយុត្តិធម៌នាំឲ្យរូបគេមានតែ ១ ពិន្ទុ៕