.jpg)
ម៉ន រដ្ឋា (ឆ្វេង) ត្រូវប្រកួតជម្រុះជាមួយ អឹុង បូរ៉ា។ ស្រេង ម៉េងស្រ៊ុន
ភ្នំពេញៈ ការប្រកួតកីឡាប្រដាល់កំពូលជើងឯក TV5 Boxing Knock-Out Series វគ្គទី ១ នៅសង្វៀនប៉ុស្តិ៍លេខ ៥ នឹងចាប់ការប្រកួតជម្រុះរវាងអ្នកឈ្នះទាំង ១៦ នាក់ នៅថ្ងៃសៅរ៍ ខាងមុខនេះ ហើយអ្នកទាំងនេះត្រូវបានជម្រុះចេញពីការប្រកួតជុំទី ១ ដែលមានកីឡាករចំនួន ៣២ នាក់។
ក្នុងចំណោមអ្នកប្រដាល់ទាំង ៣២ នាក់ ទម្ងន់ ៥៧ គ.ក្រដូចគ្នានោះ រូបមន្តប្រកួតរបស់សង្វៀននេះ មិនគិតតាមកម្រិតសមត្ថភាពរបស់កីឡាករចាស់ ថ្មី ខ្លាំង ឬខ្សោយនោះទេ ដោយកីឡាករទាំងអស់អាចមកប្រកួតគ្នាបានទាំងអស់។
ការអនុវត្តរូបមន្តខុសគ្នាបែបនេះហើយ បានជាអ្នកខ្លាំងឈ្នះកីឡាករខ្សោយៗ ឬជើងថ្មីថ្មោងយ៉ាងងាយ ដែលនាំឲ្យការប្រកួតបានក្លាយទៅជាខ្សត់អ្នកទស្សនាជាងនៅសង្វៀនដទៃ។សម្រាប់ជុំទី ២ នេះ អ្នកខ្លាំងចំនួន ១៦ រូប នឹងត្រូវជម្រុះយក ៨ រូបចេញ ហើយបន្តទុក ៤ នាក់ទៀត ទៅប្រកួតជុំទី ៣ មុននឹងបន្តទៀតឆ្ពោះទៅវគ្គផ្តាច់ព្រ័ត្រ។
សម្រាប់ថ្ងៃសៅរ៍នេះ ការប្រកួតជម្រុះមានចំនួន ២ គូនោះគឺកីឡាករប្រដាល់ ម៉ន រដ្ឋា ក្លិបមកពីក្លិបព្រែកឯងកីឡា ត្រូវប្រកួតជាមួយអ្នកប្រដាល់ជើងចាស់ អ៊ឹង បូរ៉ា ក្លិបមកពីក្លិបកុលបុត្រគុនខ្មែរ។ លីញ ភារម្យ ក្លិបភារម្យគុនខ្មែរ ត្រូវជួបអ្នកប្រដាល់ធន់ មករា សមាគមប្រដាល់ក្រសួងការពារជាតិ។ កីឡាករទាំង ៤ រូបនេះអាចចាត់ទុកថាជើងខ្លាំងមានសមត្ថភាពដូចគ្នា បន្ទាប់ពីគេឈ្នះអ្នកខ្សោយៗជើងថ្មីៗកាលពីជុំទី ១។
សម្រាប់ការប្រកួតជុំទី ១ កន្លងមក ម៉ន រដ្ឋា បានឈ្នះសំណាង សម្បត្តិ ក្លិបកងចក្ររាជសីហ៍ នៅមុនស្នូរជួងបញ្ចប់ទឹកទី ៤ ខណៈ អ៊ឹង បូរ៉ា ឈ្នះ វ៉ាន់ឌី ក្លិបពន្លឺវិបុលដារិទ្ធពោធិ៍សែនជ័យនៅទឹកទី ១ ប៉ុណ្ណោះ ដោយក្បាច់ទាត់ផ្កាប់ចាន។ ទោះជាយ៉ាងណា បូរ៉ា មានឈ្មោះល្បីល្បាញ និងមានបទពិសោធច្រើនជាង រដ្ឋា។
លោក ម៉ាង ម៉ន គ្រូបង្វឹកនិយាយថា៖ «ម៉ន រដ្ឋា ធានាវ៉ៃអស់ពីសមត្ថភាព ប៉ុន្តែវាពិតជាលំបាកឈ្នះ អ៊ឹង បូរ៉ា មែន ពីព្រោះគេល្អជាង ជាជើងចាស់ ល្អទាត់ផ្នែកលើ និងជង្គង់ផងដែរ។ លោកបន្តថា៖ «ម៉ន រដ្ឋា ទោះបីចាញ់ ឬឈ្នះគឺត្រឹមពិន្ទុប៉ុណ្ណោះព្រោះយើងហ្វឹកហាត់ និងត្រៀមល្អ»។
ចំពោះការជួបគ្នារវាង ជើងលីញ ភារម្យ និង ធន់ មករា ត្រូវគេមើលឃើញថា ធន់ មករា មានប្រៀបជាងបន្តិចដោយធ្លាប់ឆ្លងកាត់ការប្រកួតលក្ខណៈអន្តរជាតិផងដែរ។ មករា ជាអ្នកប្រដាល់វ័យក្មេង ដែលមានកំណត់ត្រាប្រកួតល្អប្រសើរជាង។
កាលជុំទី ១ មករា បានឈ្នះអ្នកប្រដាល់ចាស់វស្សា លាភ សំណាង ក្លិបកងពលតូចលេខ ៧០ នៅទឹកទី ២។ រីឯ ភារម្យ ក៏មិនអាចមើលស្រាលបានដែរ ដោយក្នុងជុំទី ១ គេបានយកឈ្នះ សេន កុសល ដោយពិន្ទុ៕
