Search form

Login - Register | FOLLOW US ON

Logo of Phnom Penh Post newspaper Phnom Penh Post - ក្រុម​តេក្វាន់ដូ ITF ទៅ​ប្រកួត​ជើងឯក​ពិភពលោក​នៅ​កូរ៉េ

Content image - Phnom Penh Post
ប៉ាល់ ជីវ័ន (ស្តាំ) បាន​ប្រកួត​សម​ក្នុង​ពេល​ហ្វឹកហាត់​ជាមួយ​មិត្ត​រួម​ក្រុម កន្លង​មក​។ ស្រេង ម៉េងស្រ៊ុន

ក្រុម​តេក្វាន់ដូ ITF ទៅ​ប្រកួត​ជើងឯក​ពិភពលោក​នៅ​កូរ៉េ

ភ្នំពេញៈ ក្រុម​អត្តពលិក​កីឡា​តេក្វាន់ដូ ITF ចំនួន ១៤ នាក់ រួមទាំង​គ្រូបង្វឹក​ចំនួន ៤ នាក់​ទៀត ក្រោមការ​ដឹកនាំ​របស់​លោក កែវ រ៉េមី ប្រធាន​សហព័ន្ធ​កីឡា​តេក្វាន់ដូ ITF កម្ពុជា នឹង​ធ្វើ​ដំណើរ​ទៅ​កាន់​ទីក្រុង​ព្យុងយ៉ាង​ប្រទេស​កូរ៉េខាងជើង នៅ​ព្រឹក​ថ្ងៃ​ព្រហស្បតិ៍​នេះ ដើម្បី​ចូលរួម​ការប្រកួត​កីឡា​តេក្វាន់ដូ ITF ជើងឯក​ពិភពលោក​នៅ​ទីនោះ ដែល​នឹង​ចាប់ផ្តើម​ពី​ថ្ងៃ​ទី ១៥ ដល់​ថ្ងៃ​ទី ២១ ខែ​កញ្ញា។

នៅក្នុង​ការប្រកួត​ជើងឯក​ពិភពលោក​នេះ អត្តពលិក​ទាំង ១៤ នាក់​របស់​កម្ពុជា រួមមាន​កីឡាករ ប៉ាល់ ជីវ័ន, ហ៊ វិចិត្រ, បុត្រ សេរីគង្គា, អោក សំនាង, ឃឿន ប៊ុនឡុង, សៀង អេង​ហ៊ុយ, ឃឿន ប៊ុនលាង, នេត្រ ហាក់លី, ទ្រី វរលក្ខណ៍, ជា ច័ន្ទឡា, តាំង សៀសុង, តាត់ ឧត្តម កីឡាការិនី រស់ ស្រីនិច និង រោយ មុល្លិកា នឹងត្រូវ​ប្រកួត​ប្រជែង​នៅ​លើ​វិញ្ញាសា​ចំនួន ២។

នៅក្នុង​នោះ មានការ​សម្តែង​មេគុន​នារី​កម្រិត ១ ដាន់​របស់ រស់ ស្រីនិច, ហ៊ វិចិត្រ និង​កីឡាករ ទ្រី វរលក្ខណ៍ កម្រិត ២ ដាន់​របស់ សៀង អេងហ៊ុយ កម្រិត ៣ ដាន់​របស់ តាំង សៀសុង កម្រិត ៤ ដាន់​របស់ ប៉ាល់ ជីវ័ន ប្រកួត​វាយ​បំបែក​ក្តារ​ឯកត្តជន​របស់ នេត្រ ហាក់លី និង​កីឡាការិនី រស់ ស្រីនិច វាយ​បំបែក​ក្តារ​ជា​ក្រុម​បុរស (៦ នាក់) និង​សម្តែង​ស្នៀត​ការពារ​ខ្លួន​បុរស ១ ទល់ ៣ នាក់។

ចំណែក​វិញ្ញាសា​ប្រយុទ្ធ​មាន​ក្នុង​ទម្ងន់​ក្រោម ៤៥ គីឡូក្រាម​របស់ រោយ មុល្លិកា ទម្ងន់ ៧៥ គ.ក្រ​ឡើង​របស់ រស់ ស្រីនិច ទម្ងន់​ក្រោម ៥០ គ.ក្រ​របស់​កីឡាករ បុត្រ សេរីគង្គា និង តាត់ ឧត្តម ទម្ងន់​ក្រោម ៦៤ គ.ក្រ​របស់ ឃឿន ប៊ុនឡុង និង តាំង សៀសុង ទម្ងន់​ក្រោម ៥៧ គ.ក្រ​របស់ ហ៊ វិចិត្រ ទម្ងន់​ក្រោម ៧១ គ.ក្រ​របស់ អោក សំនាង និង ឃឿន ប៊ុនឡុង ទម្ងន់​ក្រោម ៨៥ គ.ក្រ​របស់ សៀង អេងហ៊ុយ ទម្ងន់ ៨៥ គ.ក្រ​ឡើង​របស់ ជា ច័ន្ទ​ឡា និងការ​ប្រយុទ្ធ​ជា​ក្រុម (៦ នាក់)។

លោក កែវ រ៉េមី ហាក់​មាន​ទំនុកចិត្ត​ខ្ពស់​ថា ក្រុម​តេក្វាន់ដូ ITF របស់​លោក នឹង​ដណ្តើម​បាន​មេដាយ​ពីការ​ប្រកួត​ជើងឯក​ពិភពលោក​នេះ ហើយ​នៅ​ក្នុង​ពិធី​សំណេះ​សំណាល​ជាមួយ​កីឡាករ​កន្លង​មក លោក​បាន​ជំរុញ​ឲ្យ​អត្តពលិក​ចេញ​ទៅ​ប្រកួត​លើក​នេះ កុំបាក់​ទឹកចិត្ត និង​តក់ស្លុត ទោះ​ប៉ះ​ម្ចាស់​ក្បាច់គុន ឬជើង​ខ្លាំង គឺ​ត្រូវ​តាំងចិត្ត​យក​ឈ្នះ​ឲ្យ​បាន ដើម្បី​កិត្តិយស​ខ្លួនឯង និង​ប្រទេសជាតិ។

ទោះយ៉ាង​ណា កីឡាករ ប៉ាល់ ជីវ័ន ដែល​ត្រូវ​ប្រកួត​រហូតដល់ ៥ វិញ្ញាសា និង​ជា​គ្រូបង្វឹក​ក្រុម​ជម្រើសជាតិ​ផង​នោះ បាន​ប្រាប់​កាល​ពី​ម្សិលមិញ​ថា៖ «យើង​បាន​ត្រៀម​ខ្លួន​រួចរាល់​អស់​ហើយ ហើយ​បើតាម​ការពិនិត្យ និង​វាយតម្លៃ​របស់​ឯកឧត្តម​ប្រធាន គាត់​សង្ឃឹម​ថា យើង​អាច​ដណ្តើម​បាន​មេដាយ​ក្នុង​កម្រិត​ណាមួយ ប៉ុន្តែ​ពួក​ខ្ញុំជា​កីឡាករ សង្ឃឹម​ត្រឹម ៥០ ភាគរយ​សិន​បាន​ហើយ»។

ប៉ាល់ ជីវ័ន ដែល​ធ្លាប់​ឈ្នះ​បាន​មេដាយ​សំរឹទ្ធ ពីការ​ប្រកួត​ជើងឯក​ពិភពលោក​នេះ បាន​បន្ថែម​ថា៖ «ការប្រកួត​លើក​នេះ គឺ​ប្រទេស ១ អាច​ដាក់​អត្តពលិក​របស់​ខ្លួន ២ នាក់ ក្នុង ១ វិញ្ញាសា គឺ​ខុស​ពី​លើក​មុន ដែល​តម្រូវ​ឲ្យ​ដាក់​បានតែ​ម្នាក់​ក្នុង ១ វិញ្ញាសា អ៊ីចឹង​ការប្រកួត​ប្រជែង ពិតជា​មាន​ភាព​តានតឹង​ខ្លាំង​ណាស់ ព្រោះ​ការប្រកួត​លើក​នេះ​អាច​មាន​ប្រទេស​ចូលរួម​ពី ៦០ ទៅ ៧០ ប្រទេស​ឯណោះ»។

យ៉ាងណា​ក៏ដោយ នៅ​ក្នុង​ចំណោម​វិញ្ញាសា​ទាំង ៥ ដែល​រូបគេ​ត្រូវ​ប្រកួត ប៉ាល់ ជីវ័ន ហាក់​មានការ​ជឿជាក់​ខ្លាំង​ទៅ​លើការ​សម្តែង​មេគុន​កម្រិត ៤ ដាន់​របស់​គេ និង​សម្តែង​ស្នៀត​ការពារ​ខ្លួន ១ នាក់​ទល់ ៣ នាក់​ជាមួយ​កីឡាករ ទ្រី វរលក្ខណ៍, នេត្រ ហាក់​លី និង ហ៊ វិចិត្រ។

ជីវ័ន បាន​បញ្ជាក់​ថា៖ «ខ្ញុំ​ធ្លាប់​ឈ្នះ​មេដាយ​មាស​លើ​វិញ្ញាសា​ទាំង ២ នេះ ក្នុងការ​ប្រកួត​ជើងឯក​អាស៊ីអាគ្នេយ៍ កន្លង​មក ដោយសារ​ខ្ញុំ និង​មិត្ត​រួម​ក្រុម​របស់​ខ្ញុំ ធ្វើ​បាន​ល្អ ដូច្នេះ​ខ្ញុំមាន​ការ​ជឿជាក់​ច្រើន​លើ​វិញ្ញាសា​នេះ»៕

0

Comments

Please, login or register to post a comment