.jpg)
ក្រុម Garuda FC និង Next Step FC ថតជុំគ្នាជាមួយតំណាងម្ចាស់ឧបត្ថម្ភ ក្រោយបញ្ចប់ការប្រកួត។ រូប សហការី
ភ្នំពេញៈ ការប្រកួតហ្វុតសាលពានរង្វាន់ស្ពនស័រ (Sponsor Futsal Cup) ឆ្នាំ ២០១៧ ប្រចាំមណ្ឌលខេត្តសៀមរាប បានរកឃើញក្រុមខ្លាំងទាំង ២ ដែលត្រូវឡើងមកប្រកួតនៅជុំផ្តាច់ព្រ័ត្រហើយ ប៉ុន្តែមិនមែនជាក្រុមជើងឯកឆ្នាំចាស់ សៀមរាបអេហ្វស៊ី នោះទេ។
តាមរយៈការប្រកួតប្រជែងរវាងក្រុមចំនួន ៤០ នៅលើទីលានក្នុងក្លិបកីឡាយុវជន កាលពីថ្ងៃសៅរ៍ និងថ្ងៃអាទិត្យ កន្លងមកនេះ ក្រុម Garuda FC និងក្រុម Next Step FC គឺជាបេក្ខភាព ដែលឈ្នះកៅអីទាំង ២ ប្រចាំនៅមណ្ឌលរៀមរាប ប៉ុន្តែសៀមរាបអេហ្វស៊ី ដែល ធ្លាប់ទទួលបានតំណែងជើងឯក ប្រចាំមណ្ឌលសៀមរាប និងបានលេខ ៣ ទូទាំងប្រទេស កាលឆ្នាំ ២០១៦ បានធ្លាក់ចេញពីការប្រកួតនេះត្រឹមវគ្គពាក់កណ្តាលផ្តាច់ព្រ័ត្រ។
ក្រុមសៀមរាបអេហ្វស៊ី បានដាក់ ២ ក្រុម ចូលរួមប្រកួតនៅឆ្នាំនេះ គឺ Siem Reap FC និង Siem Reap FC (A) ដើម្បីរក្សាតំណែងជើងឯករបស់ខ្លួន ប៉ុន្តែតាមការប្រកួតជាក់ស្តែង គឺ Siem Reap FC (A) បានចាញ់ក្រុម Garuda FC ១-០ ក្នុងវគ្គពាក់កណ្តាលផ្តាច់ព្រ័ត្រ។
ការទម្លាក់ជើងឯកឆ្នាំចាស់ សៀមរាបអេហ្វស៊ី បានធ្វើឲ្យក្រុម Garuda FC ក្លាយជាក្រុម ដែលឈ្នះគ្រប់ការប្រកួត មុនពេលពួកគេបន្តយកឈ្នះក្រុម Next Step FC ៤-៣ នៅវគ្គផ្តាច់ព្រ័ត្រ ដើម្បីទទួលបានចំណាត់ថ្នាក់លេខ ១ អមជាមួយប្រាក់រង្វាន់ ២ លានរៀល ឯក្រុមលេខ ២ Next Step FC ក៏ទទួលបានប្រាក់រង្វាន់ ១,៦ លានរៀល ផងដែរ។
បន្ថែមលើនេះក្រុម Garuda FC និងក្រុម Next Step FC បានក្លាយជាបេក្ខភាព ដែលត្រូវឡើងទៅប្រកួតនៅជុំផ្តាច់ព្រ័ត្រ តំណាងឲ្យមណ្ឌលខេត្តសៀមរាប ជាមួយក្រុមខ្លាំងចំនួន ៨ មកពីមណ្ឌលផ្សេងៗទៀត ខណៈ Rooling FC និងក្រុម Home Sport FC ជាក្រុមឈ្នះកៅអីនៅមណ្ឌលភ្នំពេញ ហើយក្រុម Sisophon FC និងក្រុម Family FC ជាក្រុមតំណាងឲ្យមណ្ឌលខេត្តបន្ទាយមានជ័យ ប៉ុន្តែមណ្ឌលខេត្តព្រៃវែង និងមណ្ឌលខេត្តព្រះសីហនុ នៅមិនទាន់រកឃើញក្រុមខ្លាំងនៅឡើយទេ។
ជាមួយនឹងការទទួលបានឱកាសមកឡើងប្រកួតនៅជុំផ្តាច់ព្រ័ត្រនេះ ប្រធានក្រុមនៃក្រុម Next Step FC ប្រាក់ ចាន់នី បានប្រាប់ ភ្នំពេញ ប៉ុស្តិ៍ កាលពីម្សិលមិញថា៖ «សមាជិកក្នុងក្រុម Next Step និង Garuda FC សុទ្ធតែអ្នកស្គាល់គ្នា ព្រោះធ្លាប់លេងជាមួយគ្នាញឹកញាប់ ហើយក្រុមទាំង ២ នេះមានកម្រិតលេងមិនលើសគ្នាប៉ុន្មានទេ ព្រោះកីឡាករភាគច្រើនលេងបានល្អ និងមានបទពិសោធលេងច្រើនដូចគ្នា»។
កីឡាករ ប្រាក់ ចាន់នី បានបន្ថែមថា៖ «យ៉ាងណាក៏ដោយ ក្រុមដែលយើងត្រូវជួបនៅជុំផ្តាច់ព្រ័ត្រ មកពីមណ្ឌលផ្សេងទៀត សុទ្ធតែមានសមត្ថភាពខ្លាំង ពិសេសក្រុមនៅមណ្ឌលភ្នំពេញ ហេតុនេះយើងត្រូវតែបង្កើនការហ្វឹកហាត់បន្ថែមទៀត ព្រោះកន្លងមកសមាជិកក្រុមរបស់យើងមិនសូវបានហាត់ជុំគ្នាទេ ដោយសារមានរវល់រៀងៗខ្លួន ហើយក្រុមយើងក៏មិនសូវមានបទពិសោធលេងនៅតារាងតូចប៉ុន្មានដែរ គឺយើងភាគច្រើនយើងលេងនៅតារាងធំ ក្នុងនោះក្រុមខ្ញុំ ក៏ធ្លាប់បានចូលលេងក្នុងវគ្គជម្រុះពានសម្តេច ហ៊ុន សែន និងលីក ២ ផងដែរ»៕
