.jpg)
សកម្មភាពហ្វឹកហាត់របស់ក្រុមសូហ្វតិន្នីសកម្ពុជា មុនពេលពួកគេចេញទៅប្រកួតនៅថៃលើកនេះ។ ស្រេង ម៉េងស្រ៊ុន
ភ្នំពេញៈ ក្រុមអត្តពលិកកីឡាសូហ្វតិន្នីសកម្ពុជា នឹងត្រូវធ្វើការប្រកួតប្រជែងក្នុងព្រឹត្តិការណ៍ The 7th Thailand Open International Soft Tennis Championship 2018 នៅទីក្រុង Nakhon Ratchasima ប្រទេសថៃ ចាប់ពីថ្ងៃព្រហស្បតិ៍នេះ នឹងគ្រោងបញ្ចប់នៅថ្ងៃទី ២៧ ខែកុម្ភៈ។
សម្រាប់ការប្រកួតនេះ សហព័ន្ធកីឡាសូហ្វតិន្នីសកម្ពុជា ដែលទើបតែប្តូរក្បាលម៉ាស៊ីនដឹកនាំ ក្នុងអាណត្តិទី ២ ថ្មី ឆ្នាំ ២០១៨ ដល់ឆ្នាំ ២០២២ ដោយបានដាក់លោក ស ខេង ឧបនាយករដ្ឋមន្ត្រី និងរដ្ឋមន្ត្រីក្រសួងមហាផ្ទៃ ឲ្យធ្វើជាប្រធានសហព័ន្ធ ជំនួសប្រធានចាស់ លោកឧត្តមសេនីយ៍ឯក ឈឹម ជួន ដែលបានទទួលមរណភាព កាលពីឆ្នាំ ២០១៦ នោះ គឺបានបញ្ជូនអត្តពលិក របស់ខ្លួន ១៨ នាក់ គ្រូបង្វឹក ៤ នាក់ រួមជាមួយមន្ត្រីកីឡា និងប្រធានប្រតិភូ សរុប ២៤ នាក់ ទៅចូលរួមការប្រកួតនេះ។
កីឡាករ ឯក ចំរើន, កាន់ សោភ័ណ, អន សម្បត្តិ, យី សរសារិទ្ធ, សៀង ម៉ៅ, ឌឹម សំសម្បត្តិ, ប៉ិល វ៉ាន់នី, ចន ម៉ាដា, សាយ សុចិត្ត្រា, រិន សុធារី, ឃី ម៉េងជួង, យាន សុខឿន កីឡាការិនី រិន សុធារី, ម៉េត ម៉ារីយ៉ាន, ជិន ស្រីឡូយ, បូរ ទីងហ៊ុយ, ឃនសាត សាន្នីតា និងកញ្ញា ឃនសាត ពេជ្របូណ៌មី គឺជាបេក្ខភាព ដែលបានទទួលស្គាល់ជាផ្លូវការ ពីក្រសួងអប់រំ យុវជន និងកីឡា សម្រាប់ការចូលរួមការប្រកួតនេះ ប៉ុន្តែការចំណាយគ្រប់បែបយ៉ាង ជាបន្ទុករបស់សហព័ន្ធកីឡាសូហ្វតិន្នីសកម្ពុជា ផ្ទាល់ ដែលគ្រោងចំណាយជាង ១ ម៉ឺនដុល្លារ។
ទាក់ទងនឹងការប្រកួតនេះ លោកឧត្តមសេនីយ៍ឯក ជា ប៊ុនហេង អនុប្រធានទី ១ សហព័ន្ធកីឡាសូហ្វតិន្នីសកម្ពុជា និងជាប្រធានប្រតិភូដឹកនាំការប្រកួតនេះ បានប្រាប់ភ្នំពេញ ប៉ុស្តិ៍ មុនពេលចេញដំណើរទៅប្រទេសថៃ កាលពីថ្ងៃអង្គារថា៖« នៅពេលនេះ ក្រុមសូហ្វតិន្នីសរបស់យើង កំពុងឈរនៅចំណាត់ថ្នាក់ពិភពលោកលេខ ៩ ក្នុងចំណោម ៤៥ ប្រទេស ហើយការប្រកួតនេះ យើងត្រូវប្រឹងប្រែងឲ្យអស់ពីសមត្ថភាព ដើម្បីទទួលបានចំណាត់ថ្នាក់ល្អជាងនេះ»។
កីឡាករ កីឡាការិនីទាំង ១៨ នាក់របស់កម្ពុជា ខាងលើនេះ នឹងត្រូវធ្វើការប្រកួតប្រជែង នៅគ្រប់វិញ្ញាសាទាំង ៧ ដែលគេដាក់ឲ្យប្រកួតក្នុងព្រឹត្តិការណ៍ The 7th Thailand Open International Soft Tennis Championship 2018 នេះ ក្នុងនោះមានវិញ្ញាសាប្រកួតជាក្រុមបុរស ដោយកម្ពុជាមាន ២ ក្រុម ប្រកួតជាក្រុមនារី ប្រកួតឯកត្តជនបុរស ឯកត្តជននារីប្រកួតគូ និងប្រកួតវាយគូចម្រុះ (ស្រី ១ ប្រុស ១)។
លោក យី សារិន និងលោក ម៉ាសាតូ អូហ្គីវ៉ារ៉ា ដែលជាគ្រូបង្វឹកក្រុមសូហ្វតិន្នីសកម្ពុជាហាក់មានទំនុកចិត្តខ្ពស់ទៅលើសិស្សរបស់ខ្លួនថា នឹងអាចទទួលបានលទ្ធផលល្អ ក្នុងការប្រកួតនេះ។
លោក សារិន បាននិយាយថា៖ «នេះជាការប្រកួតដ៏សំខាន់បំផុត ដើម្បីយើងអាចឡើងចំណាត់ថ្នាក់ពិភពលោក កាន់តែល្អ ហើយខ្ញុំសង្ឃឹមថា យើងនឹងទទួលបានលទ្ធផលល្អ ព្រោះអត្តពលិករបស់យើង បានព្យាយាមហ្វឹកហាត់ជាប់រហូតមក គឺមិនមែនទើបតែខំប្រឹងហាត់ ត្រៀមការប្រកួតនៅថៃមួយនេះនោះទេ»៕
