ភ្នំពេញៈ គ្រូបង្វឹកជនជាតិប៉ាគីស្ថានទាំង ២ នាក់របស់សហព័ន្ធកីឡាហុកគីកម្ពុជា កំពុងមមាញឹកបង្វឹកក្រុមយុវជនអាយុក្រោម ១៨ ឆ្នាំ ទាំងផ្នែកបុរស និងនារី នៅលើទីលានចំនួន ៣ ដើម្បីត្រៀមការប្រកួតអន្តរជាតិធំចំនួន ២ គឺក្រុមបុរស ប្រកួតនៅថៃ នាខែមេសា និងក្រុមនារី ប្រកួតនៅសិង្ហបុរី ខែមិថុនា ឆ្នាំ ២០១៨។
លោក Rana Asif Maqsood គ្រូបង្វឹកជម្រើសជាតិហុកគីកម្ពុជា បានប្រាប់កាលពីម្សិលមិញថា៖ «ក្រុមយុវជនបុរស កំពុងហាត់នៅទីលានទួលគោក ទីលានស្ទឹងមានជ័យ និងទីលានផ្សារគគីរ នៅស្រុកកៀនស្វាយ ដើម្បីត្រៀមទៅប្រកួតជម្រុះវគ្គអនុគ្រោះ នៅក្រុងបាងកក ប្រទេសថៃ នាថ្ងៃទី ២៥ ដល់ទី ២៩ ខែមេសា ដើម្បីទទួលបានសិទ្ធទៅប្រកួតអូឡាំពិកហុកគីផ្នែកយុវជន នៅប្រទេសអាហ្សង់ទីន»។
សព្វថ្ងៃនេះ ការហ្វឹកហាត់កីឡាហុកគី មានកីឡាករ ៣០ នាក់ ប៉ុន្តែការត្រៀមទៅប្រកួតជម្រុះនេះ សហព័ន្ធកីឡាហុកគីកម្ពុជា សម្រិតសម្រាំងយកតែ ១២ នាក់ទេ ដើម្បីត្រៀមប្រកួតប្រជែងជាមួយប្រទេសក្នុងទ្វីបអាស៊ីចំនួន ១៤ មានកម្ពុជា ថៃ ឥណ្ឌូនេស៊ី ចិនហុងកុង ចិនតៃប៉ិ ប្រុយណេ មីយ៉ាន់ម៉ា និងសិង្ហបុរី ជាដើម។
មុនចេញទៅប្រកួតដណ្តើមយកកៅអី នៅអូឡាំពិកនេះ ក្រុមហុកគីកម្ពុជា នឹងចេញទៅហាត់បន្ថែមនៅថៃ ចាប់ពីថ្ងៃទី ៥ ខែមេសាទៅ ហើយថ្លៃធ្វើដំណើរ ដោយរថយន្ត ការហូបចុក និងស្នាក់នៅថៃ ទទួលបានការឧបត្ថម្ភទាំងស្រុងពីលោក Dato Sri Chaia Pak Siriwat ប្រធានសហព័ន្ធកីឡាហុកគីថៃ និងជាប្រធានសហព័ន្ធកីឡាហុកគីអាស៊ី។
ទោះជាយ៉ាងណាកម្រិតបច្ចេកទេសរបស់កីឡាករហុកគីកម្ពុជា មានកម្រិតទាប ព្រោះទើបចូលហាត់ មិនដល់មួយឆ្នាំផង។
លោក A Faqahmed គ្រូជំនួយមកពីប្រទេសប៉ាគីស្ថាន បាននិយាយថា៖ «ក្រុមបុរសយើង មិនទាន់មានសមត្ថភាពឈ្នះគេទេ ព្រោះនេះជាលើកដំបូង ដែលយើងហ្វឹកហាត់ ដើម្បីចេញទៅប្រកួតលក្ខណៈអន្តរជាតិ យកបទពិសោធ ដោយយើងទទួលបានការឧបត្ថម្ភពីសហព័ន្ធកីឡាហុកគីអាស៊ី»។
លោក A Faqahmed បន្ថែមថា៖ «ចំពោះក្រុមនារី ដែលគ្រោងទៅប្រកួតក្នុងព្រឹត្តិការណ៍ឈ្មោះថា សហព័ន្ធកីឡាហុកគីស្ត្រីពិភពលោក ដែលនឹងធ្វើឡើងពីថ្ងៃទី ២៣ ខែមិថុនា ដល់ខែកក្កដា នៅសិង្ហបុរីវិញ គឺមានសមត្ថភាពល្អ ក្នុងការប្រជែងជាមួយប្រទេសចំនួន ១៣ ក្នុងព្រឹត្តិការណ៍នេះ ក្នុងនោះមានប្រុយណេ ចិនតៃប៉ិ ចិនហុងកុង ម៉ាឡេស៊ី ឥណ្ឌូនេស៊ី អ៊ូសបេគីស្ថាន និងប៉ាគីស្ថាន ជាដើម»។
គួរបញ្ជាក់ថា ក្រុមហុកគីនារីកម្ពុជា ដែលធ្លាប់ឈរលេខរៀង ៧១ ក្នុងចំណោម ១៣០ ប្រទេស គឺបច្ចុប្បន្ន ឡើងមកឈរនៅលេខរៀង ៦។ ចំណែកនៅទ្វីបអាស៊ី គឺក្រុមហុកគីនារីកម្ពុជា ឈរនៅលេខ ១២ ក្នុងចំណោម ៣០ ប្រទេស ឯហុកគីនារី ក្នុងសាលវិញ គឺក្រុមកម្ពុជា ឈរនៅលេខទី ៨ ក្នុងចំណោម ៣៦ ប្រទេស។
លោក វ៉ាត់ ចំរើន អគ្គលេខាធិការ NOCC និងជាប្រធានសហព័ន្ធកីឡាហុកគីកម្ពុជា បានប្រាប់ថា៖ «ហុកគី ជាប្រភេទកីឡាអូឡាំពិក លេងជាក្រុម អ៊ីចឹងពិតជាលំបាកដណ្តើមយកមេដាយណាស់។ ទោះជាយ៉ាងណា ការខិតខំរបស់លោក Rana Asif Maqsood និងមានការជួយពីលោក Dato Sri Chaia Pak Siriwat នោះ យើងចេះតែដំណើរការបានជាជំហានៗ មានការរីកចម្រើនជាលំដាប់ ប៉ុន្តែមិនទាន់សង្ឃឹមថា អាចដណ្តើមបានមេដាយនៅឡើយទេ»៕