ភ្នំពេញៈ នៅទីបំផុត ក្រុមកីឡាអេឡិចត្រូនិករបស់កម្ពុជា Never Care មិនអាចរក្សាតំណែងជើងឯករបស់ខ្លួន ក្នុងការប្រកួតពានរង្វាន់អន្តរជាតិកម្រិតតំបន់ MATIC (Mission Against Terror International Championship) កាលពីឆ្នាំ២០១៧ បាននោះទេ បន្ទាប់ពីពួកគេបានចាញ់ក្រុម Sync Gaming របស់ម៉ាឡេស៊ី ក្នុងការប្រកួតវគ្គផ្តាច់ព្រ័ត្រ MATIC 2018 នៅលើទឹកដីប្រទេសថៃ កាលពីយប់ម៉ោង ៧ ថ្ងៃអាទិត្យ ម្សិលមិញ។
សម្រាប់ការប្រកួតពានរង្វាន់ MATIC 2018 នេះ ក្រុម Never Care បានឆ្លងផុតការប្រកួតសន្សំពិន្ទុតាមពូលទាំងលំបាក ដោយពួកគេបានត្រឹមចំណាត់ថ្នាក់លេខ ៤ ក្នុងពូលB ដែលមាន ៦ ក្រុម ខណៈក្រុមតំណាងឲ្យកម្ពុជាមួយទៀតគឺ Infinity បានធ្លាក់ក្នុងវគ្គសន្សំពិន្ទុនោះ ដោយបានឈរនៅលេខរៀងទី ៦ចុងក្រោយ ប្រចាំពូលA។
យ៉ាងណាក៏ដោយ សម្រាប់ការប្រកួតវគ្គខ្វែង ៨ក្រុមចុងក្រោយ ក្រុម Never Care របស់កម្ពុជា បានយកឈ្នះក្រុមចិន ៥-០ រួចបានបន្តយកឈ្នះក្រុមសិង្ហបុរី EDP ROG ៥-៣ នៅវគ្គពាក់កណ្តាលផ្តាច់ព្រ័ត្រ ដើម្បីឡើងទៅជួបក្រុម Sync Gaming របស់ម៉ាឡេស៊ី នៅវគ្គផ្តាច់ព្រ័ត្រ។
ប៉ុន្តែតាមរយៈការប្រកួតផ្តាច់ព្រ័ត្រនោះ ក្រុម Never Care បានចាញ់ក្រុម Sync Gaming ក្នុងលទ្ធផល ២-០ ដោយទទួលបានត្រឹមជើងឯករង អមជាមួយប្រាក់រង្វាន់ ៧០០០ដុល្លារ។ រីឯក្រុម Sync Gaming បានក្លាយជាម្ចាស់ជើងឯក ក្នុងឆ្នាំ ២០១៨នេះ អមជាមួយប្រាក់រង្វាន់ ១៥០០០ ដុល្លារ ជាមួយកំណត់ត្រាល្អបំផុត គឺឈ្នះគ្រប់ការប្រកួតទាំងអស់។
នៅក្នុងវគ្គសន្សំពិន្ទុ ក្រុម Sync Gaming បានឈ្នះទាំង ៥ ប្រកួត ដើម្បីឈរនៅលេខ ១ ប្រចាំពូលA មុនពេលពួកគេទម្លាក់ក្រុមម្ចាស់ផ្ទះថៃ Nazarick ៥-១ ក្នុងវគ្គខ្វែង ៨ ក្រុម ឈ្នះក្រុមរួមជាតិ Suicide ៥-៤ ក្នុងវគ្គពាក់កណ្តាលផ្តាច់ព្រ័ត្រ និងឈ្នះក្រុម Never Care របស់កម្ពុជា ក្នុងវគ្គផ្តាច់ព្រ័ត្រនេះ។
ចំណែកក្រុម Suicide បានយកឈ្នះក្រុម EDP ROG ដើម្បីទទួលបានចំណាត់ថ្នាក់លេខ ៣ និងប្រាក់រង្វាន់ ៤០០០ ដុល្លារ ឯក្រុមលេខ ៤ EDP ROG បានប្រាក់រង្វាន់លើកទឹកចិត្តចំនួន ២៥០០ ដុល្លារ ខណៈព្រឹត្តិការណ៍ MATIC 2018 នេះមាន ៦ ប្រទេសចូលរួម ស្មើ ១២ ក្រុម ក្នុងនោះម្ចាស់ផ្ទះថៃ មាន ៣ ក្រុម កម្ពុជា មាន ២ ក្រុម ចិន មាន ២ ក្រុម សិង្ហបុរី មាន ២ ក្រុម ម៉ាឡេស៊ី មាន ២ ក្រុម និងឥណ្ឌូណេស៊ី មាន ១ ក្រុម៕