ភ្នំពេញៈ គណៈកម្មាធិការជាតិអូឡាំពិកកម្ពុជា (NOCC) ព្រមទាំងសហព័ន្ធកីឡាគុនល្បុក្កតោកម្ពុជា និងក្រុមហ៊ុនផលិតខ្សែភាពយន្ត Cineboxx Film &Televisoin Inc របស់ប្រទេសកាណាដា បានប្រកាសក្នុងសន្និសីទកាសែតនៅទីស្នាក់ការ NOCC កាលពីព្រឹកថ្ងៃពុធ ពីលទ្ធផលកសាងឯកសារភាពយន្ត ស្តីពីគុនល្បុក្កតោមរតកវប្បធម៌ជាតិខ្មែរ ឲ្យមានជីវិតរស់ឡើងវិញបន្ទាប់ពីកប់បាត់យូរឆ្នាំមកនោះ។
ភាពយន្តឯកសារនេះ បានផលិតឡើងដោយលោក Mark Bochser ជាផលិតករភាពយន្ត ដែលមានចំណងជើងថា Surviving Bokator ខណៈដែលអ្នកសម្តែងគឺជាកីឡាករកីឡាការិនី ដែលបានឆ្លងកាត់ហ្វឹកហ្វឺនក្បាច់គុនល្បុក្កតោ និងគុនចម្រុះ MMA ពិត។ ក្នុងនោះដែរតួអង្គសំខាន់ ដែលផ្តល់ការស្រាវជ្រាវសំខាន់ និងបង្ហាញស្នៀតគុន ព្រមទាំងប្រវត្តិរស់ឡើងវិញគឺលោកព្រឹទ្ធាចារ្យក្រមាមាស សាន គឹមស៊ាន។
លោក វ៉ាត់ ចំរើន អគ្គលេខាធិការ NOCC និងជាអនុប្រធានសហព័ន្ធកីឡាគុនល្បុក្កតោកម្ពុជា បានចូលរួម ក្នុងការប្រកាសភាពជាដៃគូរវាង NOCC ជាមួយសហព័ន្ធកីឡាគុនល្បុក្កតោកម្ពុជា និង Cineboxx Film &Televisoin Inc របស់ប្រទេសកាណាដា មុននឹងការដាក់បញ្ចាំង នៅសាលចតុមុខ នាល្ងាចថ្ងៃព្រហស្បតិ៍ ទី ៨ ខែមីនា នេះ។
លោក ចំរើន បានថ្លែងថា៖ «ការប្រកាសភាពជាដៃគូលើកនេះក្នុងគោលបំណងលើកកម្ពស់ការយល់ដឹងជាសកលពីគុនល្បុក្កតោខ្មែរ ដែលជាកីឡាវប្បធម៌បុរាណរបស់ខ្មែរ ដើម្បីឆ្លុះបញ្ចាំង បញ្ហាប្រឈមរបស់ប្រជាជនកម្ពុជាក្នុងការស្តារឡើងវិញ នូវវប្បធម៌ ដែលស្ទើរតែបាត់បង់ ក្នុងរយៈកាលកន្លងមក ពិសេសក្នុងរបបសម័យខ្មែរក្រហម នៅទសវត្សរ៍ ១៩៧០»។
លោកបានបន្ថែមថា៖ «ក្រៅពីភាពយន្តឯកសារគុនល្បុក្កតោនេះយើងក៏បានសហការជាមួយប្រទេសឥណ្ឌា ផលិតឯកសារភាពយន្តកីឡាចំបាប់ ដែលនឹងចាក់បង្ហាញក្នុងពេលឆាប់ៗខាងមុខ ទៅតាមពេលវេលាសមស្របផងដែរ»។
ចំណែក លោក Mark Bochser ជាផលិតករភាពយន្ត បានថ្លែងថា៖«យើងបានចំណាយពេលអស់ជាង ៥ ឆ្នាំ ក្នុងការថតឯកសារ Suriviving Bokotor នេះ គឺជាខ្សែភាពយន្តឯកសារតែមួយ ដែលចាប់យកព្រឹត្តិការណ៍កីឡាភ្ជាប់ជាមួយប្រវត្តិសាស្ត្រ ហើយបូកបញ្ចូលទាំងការប្រកួតប្រជែងគុនល្បុក្កតោ លំដាប់អន្តរជាតិ លើកដំបូងផងដែរ ដើម្បីឲ្យខ្សែភាពយន្តនេះ ក្លាយជាកំណត់ត្រាប្រវត្តិសាស្ត្ររបស់ជាតិផងដែរ និងផ្តល់ប្រយោជន៍យ៉ាងធំធេង ដល់គណៈកម្មាធិការជាតិអូឡាំពិកកម្ពុជា ជាដៃគូ»៕