ភ្នំពេញ: ការប្រកួតប្រដាល់មិត្តភាពអន្តរជាតិកម្ពុជា-ថៃនៃសង្វៀនអាស៊ីអាគ្នេយ៍កាលពីល្ងាចថ្ងៃសៅរ៍ និងព្រឹកថ្ងៃអាទិត្យទី ៣ និងទី ៤ ខែកុម្ភៈ ឆ្នាំ ២០១៨ ចំនួន ៣ គូ សុទ្ធតែបរាជ័យក្រោមស្នៀតកីឡាករថៃទាំងអស់។
កីឡាករមាស ច័ន្ទមាន មកពីក្រសួងការពារជាតិ បានចាញ់យ៉ាងគ្រាំគ្រាក្រោមស្នៀតជង្គង់របស់កីឡាករថៃ Phat Ka ខណៈកីឡាករយ៉េន ឌីណា មកពីសមាគមប្រដាល់ក្រសួងកសិកម្ម បានបន្តបរាជ័យទៀតក្រោមស្នាដៃកីឡាករថៃ Phat Khanthong ក្នុងទម្ងន់ ៦៣,៥ គីឡូក្រាមដូចគ្នា។
ដោយឡែកកាលពីព្រឹកថ្ងៃអាទិត្យ កីឡាករឃីម បូរ៉ា មកពីក្លិបរស្មីភូមិគាបខេត្តបន្ទាយមានជ័យ ត្រូវបានកីឡាករ Phat Ngenting ទាត់ឲ្យខូចជើងក្រោម និងសុំចុះចាញ់ក្នុងទឹកទី ៣។ ចំណុចគួរឲ្យកត់សម្គាល់នូវសមាសភាពអ្នកប្រដាល់ចំនួន ៣ នាក់ដែលចាញ់នេះ ហាក់បីដូចបង្ហាញនូវភាពកម្សោយជាងពេលប្រកួតមុនៗ ខណៈកម្លាំងប្រកួតមិនសូវទាក់ទាញ និងគ្មានបច្ចេកទេស គ្មានស្នៀតអ្វីតតាំងជាមួយគូប្រកួតបានល្អនោះឡើយ។
កីឡាករមាស ច័ន្ទមាន ប្រកួតចាញ់លើកនេះ បានទទួលរងនូវការរិះគន់យ៉ាងខ្លាំង ដោយសារការប្រកួតពេញ ៥ ទឹក រូបគេវាយបានល្អតែទឹកទី ១ ចំណែក ៤ ទឹកចុងក្រោយ មានស្ថានភាពដូចបាវសាក់ ក្រោយពីកីឡាករថៃ Phat Ka បានចូលចាប់វាយក្បាច់ជង្គង់តាមចិត្ត។ ចប់ការប្រកួតមាស ច័ន្ទមាន ចាញ់ Phat Ka ក្នុងពិន្ទុ ៥ ទល់ ០ យ៉ាងអាម៉ាស់ ក្រោមការចំអកពីអ្នកទស្សនា។
បញ្ហាចាញ់នេះលោកតឹក ឡៃ ដែលគ្រូបង្វឹក បាននិយាយថា៖ «ការចាញ់នេះមកពីការហ្វឹកហាត់មិនបានល្អ ហើយស្នៀតជង្គង់របស់កីឡាករថៃល្អផងដែរ។ វាជារឿងល្អដែលច័ន្ទមាន តស៊ូបាន ៥ ទឹកនោះ»។
ដោយឡែក កីឡាករយ៉េន ឌីណា ដែលបានបាត់មុខយូរដោយមូលហេតុចាញ់ញឹកញាប់នោះ ត្រូវបានសង្វៀនអាស៊ីអាគ្នេយ៍ផ្តល់ឱកាសបានឡើងប្រកួតជាលក្ខណៈអន្តរជាតិឡើងវិញជាមួយកីឡាករថៃ Phat Khanthong។ ជាលទ្ធផល យ៉េន ឌីណា នៅតែមិនទាន់មានថាមពល និងស្មារតីប្រយុទ្ធវាយទៅលើគូប្រកួតបានល្អនោះឡើយ៕