.jpg)
កីឡាករកម្ពុជាឃីម ឌីម៉ា (ឆ្វេង) ប្រកួតជាមួយនឹងកីឡាករថៃ Keo Kangvan កាលពីថ្ងៃអាទិត្យ។ យឺន ពន្លក
ភ្នំពេញ: ក្រោយពីឈ្នះមេដាយមាសពីព្រឹត្តិការណ៍ស៊ីហ្គេមឆ្នាំ ២០១៧ ឃីម ឌីម៉ា អ្នកប្រដាល់មានដើមកំណើតមកពីខេត្តបន្ទាយមានជ័យ បានឡើងប្រកួតបានចំនួន ៤ លើកជាលក្ខណៈមិត្តភាពអន្តរជាតិដោយចាញ់ ១ លើក និងឈ្នះ ៣ លើក។
ក្នុងនោះ ជ័យជម្នះ ២ លើកកន្លងមកត្រូវបានគេរិះគន់ថា វាយមិនបានល្អ គ្មានភាពទាក់ទាញ់ និងមានថាមពលមិនល្អដូចលើកមុន។
សម្រាប់ជ័យជម្នះនៃការប្រកួតចុងក្រោយនៅព្រឹកថ្ងៃអាទិត្យ ទី ១១ ខែកុម្ភៈ ឆ្នាំ ២០១៨ នៅសង្វៀនអាស៊ីអាគ្នេយ៍ម្សិលមិញ ឃីម ឌីម៉ា ប្រកួតបានល្អ ដោយវាយប្រកបដោយថាមពលបានល្អ និងបានផ្តួលជើងខ្លាំងរបស់ថៃ Keo Kangvan ឲ្យសន្លប់ត្រឹមទឹកទី ២។
ជាមួយគ្នានេះដែរ កីឡាករអ៊ុំ ចំរើន មកពីក្លិបតាឡីដំរីមានរិទ្ធ បានផ្តួលកីឡាករមកពីប្រទេសបារាំង Aminn ឲ្យខូចជើងត្រឹមទឹកទី ១ ប៉ុណ្ណោះ។
ការប្រកួតជាមួយជើងខ្លាំងថៃ Keo Kangvan នេះ គឺជាលើកទី ៣ ហើយ ប៉ុន្តែ ២ លើកកន្លងមក ឈ្នះទាំងលំបាកភ្នែក ពិសេសការប្រកួតកាលពីថ្ងៃទី ៧ ខែមករា ឆ្នាំ ២០១៨ នៅក្នុងកម្មវិធីប្រដាល់គុនខ្មែរអន្តរជាតិលើកទី ១ នៅក្នុងពហុកីឡដ្ឋានជាតិអូឡាំពិកកម្ពុជា ដោយឃីម ឌីម៉ា បានឈ្នះដោយគណៈកម្មការយឹតយោងប៉ុណ្ណោះ ខណៈដែលស្នៀតទាត់របស់ Keo Kangvan មានប្រៀបជាង។
ជ័យជម្នះរបស់ឃីម ឌីម៉ា កាលពីថ្ងៃម្សិលមិញ បានបញ្ចប់ទាំងភាពទាក់ទាញ ខណៈដែលរូបគេបានប្រើប្រាស់កណ្តាប់ដៃឆ្វេងដើម្បីវាយឲ្យដៃគូសន្លប់នៅត្រឹមទឹកទី ២។ នៅទឹកទី ១ ការប្រកួតហាក់បីដូចជាមានភាពប្រហាក់ប្រហែលគ្នា ដោយចេញក្បាច់ទាត់កណ្តាប់ដៃប្តូរគ្នាយ៉ាងជក់ចិត្ត ដែលបានធ្វើឲ្យអ្នកទស្សនាកោតសរសើរអមដោយសំឡេងទះដៃគាំទ្រយ៉ាងរំពង។
លោកហេង ប៊ុនឃីម ជាគ្រូបង្វឹក និងជាឪពុកបង្កើត បាននិយាយថា៖ «ឌីម៉ា វាយបានល្អបន្ទាប់ពីគេហ្វឹកហាត់ត្រៀមបានល្អតាំងពីមុនប្រកួត។ ខ្ញុំបានអប់រំណែនាំឲ្យខិតខំហ្វឹកហាត់ដើម្បីប្រកួតទទួលបានលទ្ធផលល្អ ពីព្រោះយើងជាម្ចាស់មេដាយមាសស៊ីហ្គេម ប្រកួតចាញ់គេគឺមិនស័ក្តិសមនឹងកិតិ្តយសឡើយ ពិសេសយើងប្រកួតចាញ់ប្រៀបគេហើយ ទាញយកមកឲ្យឈ្នះនេះគឺថោកទាបណាស់ដែលខ្ញុំជាគ្រូបង្វឹក ក៏ដូចជាឪពុកមិនចង់ឃើញឡើយ»៕
