ភ្នំពេញ: កីឡាករលំដាប់ជើងខ្លាំង ២ នាក់ ឃីម ឌីម៉ា និងផល សោភ័ណ្ឌ ដែលខកខានប្រកួតគ្នាតាំងពីឆ្នាំ ២០១៦ នោះ អាចនឹងប៉ះគ្នានៅល្ងាចថ្ងៃសៅរ៍នៅសង្វៀន CNC ប្រសិនបើគេឈ្នះវគ្គជម្រុះដំបូងក្នុងថ្ងៃតែមួយ ពេលប្រកួតជាមួយថៃរៀងៗខ្លួននោះ ដើម្បីប្រជែងយកប្រាក់លានក្នុងកម្មវិធីប្រកួតម៉ារ៉ាតុងលក្ខណៈអន្តរជាតិកម្ពុជាថៃទម្ងន់ ៦៣,៥ គីឡូក្រាម។
ប្រភពពីមន្ត្រីកាន់កម្មវិធីប្រដាល់របស់សហព័ន្ធគុនខ្មែរ ឃីម ឌីម៉ា ត្រូវបានដាក់ឲ្យប្រកួតជាមួយកីឡាករថៃ Chao Boy ចំណែកឯផល សោភ័ណ្ឌ ដាក់ឲ្យប្រកួតជាមួយកីឡាករថៃ Pon Long ក្នុងទម្ងន់ ៦៣,៥ គីឡូក្រាមដូចគ្នា។
តាមរូបមន្តប្រកួតនេះ កីឡាកររបស់កម្ពុជាទាំង ២ នឹងប្រកួតជាមួយកីឡាករថៃជម្រុះយកអ្នកឈ្នះដូចគ្នាមកប្រកួតគ្នាបន្តភ្លាមៗដើម្បីយកប្រាក់លានរបស់គោជល់ក្នុងពេលតែមួយ។ តាមការព្យាកររបស់អ្នកទស្សនាភាគច្រើនលើសលប់ គេរំពឹងថា អ្នកប្រដាល់កម្ពុជាទាំង ២ ឃីម ឌីម៉ា និងផល សោភ័ណ្ឌ នឹងឆ្លងផុតវគ្គជម្រុះ ដើម្បីជួបប្រកួតគ្នានៅវគ្គផ្តាច់ព្រ័ត្រ។
ឃីម ឌីម៉ា បាននិយាយថា ការប៉ះប្រកួតជាមួយកីឡាករថៃ Chao Boy មិនទាន់ដឹងពីសមត្ថភាពរបស់គេមានកម្រិតយ៉ាងណាទេ ពីព្រោះមិនដែលឃើញការប្រកួតរបស់គេ ប៉ុន្តែ រូបគេសង្ឃឹមថា៖ «តាមរយៈការហ្វឹកហាត់ និងការប្រឹងប្រែងរបស់ខ្ញុំ ខ្ញុំនឹងបានឆ្លងទៅវគ្គផ្តាច់ព្រ័ត្រមិនខាន»។
ឌីម៉ា បានបន្តថា៖ «ការជួបប្រកួតជាមួយកីឡាករថៃ គឺខ្ញុំមានសង្ឃឹមដោយប្រើស្នៀតកែង និងវាយតាមប្រយោលមិនចូលលេងក្បាច់ជង្គង់ទេ ពីព្រោះថៃភាគច្រើនល្អជាងយើង ប៉ុន្តែអន់ស្នៀតកែង»។
បេក្ខភាពរបស់កម្ពុជាម្នាក់ទៀតគឺ ផល សោភ័ណ្ឌ មកពីក្លិបតាឡីមានរិទ្ធិ ត្រូវប៉ះជាមួយកីឡាករថៃ Pon Long ក្នុងទម្ងន់ ៦៣,៥ គីឡូក្រាមដូចគ្នា ហើយបើឈ្នះថៃនោះគឺបានឡើងទៅប្រកួតជាមួយ ឌីម៉ា តែម្តង។
ផល សោភ័ណ្ឌ ក៏មិនដឹងពីសមត្ថភាពកីឡាករថៃនោះយ៉ាងណាដែរ ប៉ុន្តែ មិនមានការព្រួយបារម្ភពីការចាញ់កីឡាករថៃនោះឡើយ តែអ្វីដែលព្រួយបារម្ភនោះគឺពេលប៉ះប្រកួតជាមួយឌីម៉ា។
យោងតាមប្រវត្តិប្រកួតរវាងកីឡាករឃីម ឌីម៉ា និងផល សោភ័ណ្ឌ ពួកគេធ្លាប់ប្រកួតគ្នានៅក្នុងវគ្គផ្តាច់ព្រ័ត្រម្តងនៅឆ្នាំ ២០១៦ នៅសង្វៀនបាយ័នដែលកាលនោះការឈ្នះរបស់ផល សោភ័ណ្ឌ លើឃីម ឌីម៉ា បានធ្វើឲ្យមហាជនភ្ញាក់ផ្អើលយ៉ាងខ្លាំង ដោយសារតែការកាត់ក្តីហាក់គ្មានភាពអយុត្តិធម៌ដល់ ឃីម ឌីម៉ា។
បន្ទាប់មក ឃីម ឌីម៉ា បានអវត្តមាននៅសង្វៀនមួយនេះដល់បច្ចុប្បន្នព្រមទាំងសាងកេរិ៍្តឈ្មោះល្បីនៅសង្វៀនដទៃ និងឆាកអន្តរជាតិវិញ។ លោកហេង ប៊ុនឃីម ជាឪពុកបង្កើត និងជាគ្រូបង្វឹកឃីម ឌីម៉ា បាននិយាយថា៖ «ប្រសិនបើ ឌីម៉ា ឈ្នះថៃឡើងមកប៉ះជាមួយផល សោភ័ណ្ឌនោះ ខ្ញុំគ្មានសង្ឃឹមឈ្នះផល សោភ័ណ្ឌ ទេពីព្រោះអាចចាញ់ផ្នែកកម្លាំងដោយសារការហ្វឹកហាត់មិនបានល្អ»។
លោកហេង ប៊ុនឃីម បានបន្តថា៖ «តាំងពីឈ្នះមេដាយមាសពីស៊ីហ្គេមរួចមក ឌីម៉ា ឡើងប្រកួតជាមួយថៃ ៣ លើក ឈ្នះគេទាំងលំបាក ហើយកម្រិតកម្លាំង និងបច្ចេកទេសវាយរបស់គេគឺខ្សោយជាមុនឆ្ងាយណាស់»។
លោកបានបញ្ជាក់បន្ថែមថា៖ «ចំពោះខ្ញុំផ្ទាល់ ខ្ញុំហ៊ាននិយាយការពិត ការប៉ះ ផល សោភ័ណ្ឌ ឌីម៉ា មិនអាចឈ្នះ ពីព្រោះទី ១ មិនបានហ្វឹកហាត់ផ្ទាល់ជាមួយខ្ញុំពីកម្លាំង និងបច្ចេកទេស ទី ២ ហាត់នៅភ្នំពេញគឺភាគច្រើនហាត់ខ្លួនឯង គ្មានគ្រូ និងទី ៣ មានការងារធ្វើប៉េអឹមច្រើនផង មានពេលហាត់តិចតួចណាស់»។
លោកមាក់ សុខន គ្រូបង្វឹក ផល សុភ័ណ្ឌ និយាយថា៖ «ប្រសិនជាពួកគេប៉ះប្រកួតគ្នានៅវគ្គផ្តាច់ព្រ័ត្រនោះ ខ្ញុំមិនហ៊ានអះអាងថា មានភាគរយឈ្នះនោះទេ ពីព្រោះឃីម ឌីម៉ា គេជាកីឡាករខ្លាំង និងជាម្ចាស់មេដាយមាសស៊ីហ្គេមផង ពោលគឺលំបាកឈ្នះណាស់»៕