ភ្នំពេញ: ឃីម ឌីម៉ា អ្នកប្រដាល់កងអាវុធហត្ថរាជធានីភ្នំពេញ និងជាកីឡាករជម្រើសជាតិប្រដាល់គុនខ្មែរ បានស្តារកិតិ្តយសរបស់ខ្លួនមកវិញ តាមរយៈការឈ្នះកីឡាករថៃ Phlay Noy កាលពីព្រឹកថ្ងៃអាទិត្យ ទី ១៨ ខែមីនា ឆ្នាំ ២០១៨ នៅសង្វៀនអាស៊ីអាគ្នេយ៍។
ក្នុងការប្រកួតកាលពីថ្ងៃសៅរ៍វិញ មឿន សុខហ៊ុច បានយកឈ្នះកីឡាករថៃ Sen Khom ទាំងលំបាក ក្នុងការប្រកួតសន្សំពិន្ទុខ្សែក្រវាត់ខារ៉ាបាវទម្ងន់ ៦៥ គីឡូក្រាម ស្របពេលដែលកីឡាករជឹម ចិត្ត្រា ដែលជាគូខ្សែក្រវាត់ដូចគ្នា បានតស៊ូជាមួយជើងខ្លាំង Kreang Krai បានតែ ១ ទឹកប៉ុណ្ណោះមុននឹងសន្លប់ធំ។
ឃីម ឌីម៉ា បន្ទាប់ពីឈ្នះមេដាយមាសនៅព្រឹត្តិការណ៍ស៊ីហ្គេមកន្លងមក បានប្រកួតចាញ់កីឡាករថៃចំនួន ២ លើកនៅសង្វៀន CNC មុននឹងឈានដល់ការប្រកួតកាលពីថ្ងៃសៅរ៍។ ការវិលទៅប្រកួតជាមួយកីឡាករ Phlay Noy នៅសង្វៀនអាស៊ីអាគ្នេយ៍ ទំនងដូចជាការរៀបចំមួយដើម្បីផ្តល់ការងាយឲ្យ ឌីម៉ា ពីព្រោះកីឡាករថៃ Play Noy ហាក់បីដូចបន្ធូរដៃឲ្យខ្លះដោយបាត់ស្នៀតទាត់ និងស្នៀតជង្គង់ដែលរូបគេធ្លាប់វាយល្អកន្លងមកនោះ។
ក្នុងការប្រកួតពេញ ៥ ទឹក ឃីម ឌីម៉ា មានប្រៀបតិចៗសឹងតែគ្រប់ទឹក ប៉ុន្តែសម្រាប់អ្នកទស្សនាដែលធ្លាប់ឃើញការប្រកួត និងក្បាច់គុនរបស់ Phlay Noy អាចមើលឃើញពីការប្រកួតមិនអស់ពីសមត្ថភាពឬពុះកញ្ជ្រោលរបស់កីឡាករថៃរូបនេះ ពោលគឺបាត់ស្នៀតទាត់ និជង្គង់របស់គេ។
ទោះបីយ៉ាងណា ការប្រកួតបានធ្វើឲ្យអ្នកទស្សនាជក់ចិត្តគួរសម ស្របពេលដែលឃីម ឌីម៉ា នៅតែមានការគាំទ្រខ្លាំងពីទស្សនិកជន ក្រោយពីរូបគេបានឈ្នះមេដាយមាសស៊ីហ្គេមជូនជាតិ។
លោកហេង ប៊ុនឃីម គ្រូបង្វឹក និងជាឪពុកបង្កើតបានឆ្លើយនឹងសំណួរភ្នំពេញ ប៉ុស្តិ៍ ថា៖ «មូលហេតុកីឡាករថៃ Phlay Noy មិនអាចប្រើស្នៀតទាត់ និងជង្គង់បានគឺដោយសារខ្លាចកែង ឌីម៉ា និងមិនហ៊ានចាប់ឱបឡើងជង្គង់»។
លោកបន្តថា៖ «Phlay Noy បើចូលវាយសម្រុកខ្លាំងនឹងឆាប់សន្លប់ ហើយបើវាយទប់ៗប៉ុណ្ណឹងអាចចាញ់ត្រឹមពិន្ទុរបស់ឌីម៉ា។ ខ្ញុំមើលមិនឃើញពីការវាយបន្ធូរដៃរបស់ Phlay Noy ប៉ុន្តែ រូបគេមិនហ៊ានចូលតែម្តង»។
លោកថៃ អ៊ូ ប្រតិភូនាំកីឡាករថៃមកប្រកួត បានទទួលស្គាល់ថា៖ « Phlay Noy វាយលើកនេះមិនសូវបានល្អដូចលើកមុនៗទេ។ រូបគេមានបញ្ហាសុខភាពខ្លះៗដែលមិនសូវស្រួលខ្លួន និងបញ្ហាបញ្ចុះទម្ងន់មកត្រឹម ៦៣,៥ គីឡូក្រាម»។
ដោយឡែក មឿន សុខហ៊ុច ហាក់បីដូចជាឈ្នះដោយសំណាង ខណៈដែលការប្រកួតចំនួន ៥ ទឹកពេញជាមួយកីឡាករថៃ Sen Khom កីឡាករកម្ពុជារូបនេះបានចាញ់ប្រៀបផ្នែកកម្លាំង និងបានដួលជាញឹកញាប់។ លទ្ធផលផ្លូវការពីសំណាក់ចៅក្រមទាំង ៥ ត្រូវបានគណៈកម្មការប្រកាសឲ្យសុខហ៊ុច ឈ្នះ ៣ ទល់ ២ ដើម្បីទទួលបាន ៣ ពិន្ទុបន្ថែម និងមានឱកាសបានឡើងទៅកក់កៅអីវគ្គផ្តាច់ព្រ័ត្រជាមួយកីឡាករថៃ ដោយសារតែកីឡាករកម្ពុជា ក្នុងពូល ដែលមានជឹម ចិត្ត្រា កីឡាករមាស ច័ន្ទមាន, ង៉ែត្រ រដ្ឋា និងគឹម វាសនា មានពិន្ទុនៅពីក្រោមសុខហ៊ុច ទាំងអស់។
គិតត្រឹមសប្តាហ៍នេះ គេអាចកំណត់សមាសភាពអ្នកប្រដាល់ដែលមានពិន្ទុកក់កៅអីនៅវគ្គផ្តាច់ព្រ័ត្របានស្រេចទៅហើយ ដោយនៅពូល B ក្នុងចំណោមកីឡាករថៃ ៤ នាក់ Kreang Krai មានពិន្ទុខ្ពស់ជាងគេដើម្បីឡើងទៅជួបមឿន សុខហ៊ុច និងដើម្បីប្រជែងយកប្រាក់រង្វាន់ប្រាក់ ៥០០០ ដុល្លារ និងខ្សែក្រវាត់តែម្តងនៅថ្ងៃទី ២៤ ខែមេសា ឆ្នាំ ២០១៨ នៅសង្វៀនអាស៊ីអាគ្នេយ៍៕