.jpg)
ឌុម កែវដា (ឆ្វេងទី ៣) ឡើងទទួលរង្វាន់ ក្រោយពីឈ្នះខ្សែក្រវាត់កន្លងមក។ យឺន ពន្លក
ភ្នំពេញ: កីឡាករប្រដាល់ឌុម កែវដា មកពីក្លិបមកុដរាជសីហ៍នៃក្រសួងមហាផ្ទៃ បានសុំផ្អាកការប្រកួតខ្សែក្រវាត់ខារ៉ាបាវទម្ងន់ ៦៣,៥ គីឡូក្រាមរដូវកាលទី ៥ ហើយ ដោយបញ្ហាសុខភាព ខណៈដែលរូបគេត្រូវចូលវះកាត់នៅមន្ទីរពេទ្យដោយសារតែឆ្អឹង និងសាច់កែងដៃ ដុះខុសប្រក្រតីកាលពីដើមសប្តាហ៍ ហើយលោកគ្រូពេទ្យ បានណែនាំឲ្យមិនឲ្យមានការប៉ះទង្គិចទៅលើស្នាមរបួសយ៉ាងហោចណាស់ ៥ សប្តាហ៍។
កីឡាករឌុម កែវដា ជាបេក្ខភាពអ្នកប្រដាល់ឆ្នើមក្នុងពូល A របស់កម្ពុជាដែលមានមិត្តរួមអាជីពចំនួន ៣ នាក់ទៀតគឺវ៉េង សុភ័ត្រ, មាស ច័ន្ទមាន និងផាន់ គ្រាន់ ខណៈពេលវេលាប្រកួតក្នុងអំឡុងខ្សែក្រវាត់នេះ ដែលគ្រោងនឹងបញ្ចប់នៅថ្ងៃទី ២៩ ខែមេសា ឆ្នាំ ២០១៨។
ប៉ុន្តែ កីឡាករឌុម កែវដា ដែលនៅសល់កិច្ចសន្យាប្រកួតចុងក្រោយជាមួយកីឡាករថៃ Kolap Dam នៅថ្ងៃទី ១ ខែមេសា ឆ្នាំ ២០១៨ ត្រូវបង្ខំចិត្តលុបចោលការប្រកួតនេះ។
ដោយសារបញ្ហាសុខភាពនេះហើយ ដែលបានធ្វើឲ្យលទ្ធផលប្រកួតរបស់ឌុម កែវដា មានការធ្លាក់ចុះ និងបានប្រកួតចាញ់កីឡាករថៃចំនួន ២ ប្រកួត ហើយរូបគេក៏បានបោះបង់ការប្រកួតចំនួន ២ លើកទៀត ក្នុងព្រឹត្តិការណ៍ប្រកួតសន្សំខ្សែក្រវាត់មួយនេះ ផងដែរ។
កីឡាករឌុម កែវដា បាននិយាយថា៖ «ខ្ញុំបានចូលមន្ទីរពេទ្យវះកាត់ឆ្អឹងកែងដៃដុះ និងមានសាច់ដុះខាងក្នុងដែលបណ្តាលមកពីរងរបួសកន្លងមក ញឹកញាប់ដោយសារការប្រកួត។ ក្រោយពីការវះកាត់នេះ លោកគ្រូពេទ្យបានប្រាប់ឲ្យសម្រាកយ៉ាងតិច ៥ សប្តាហ៍ ទើបឲ្យមានការប្រកួតឡើងវិញ»។
ឌុម កែវដា បានបន្តថា៖ «បញ្ហាឈឺកែងដៃនេះហើយដែលជាមូលហេតុខ្ញុំប្រកួតចាញ់ថៃចំនួន ៤ ប្រកួតចុងក្រោយ ដោយមិនអាចវាយចេញក្បាច់កែងបាន។ បន្ថែមពីលើនេះ ខ្ញុំមានបញ្ហាចង្កេះ និងធ្លាប់ស្រាំឆ្អឹងជំនីរឆ្វេងដែលទទួលរងការទាត់របស់កីឡាករថៃកន្លងមក ហើយនៅពេលប៉ះទង្គិចធ្ងន់ម្តងៗតែងតែឈឺឡើងវិញ»។
ទោះជាយ៉ាងណា ឌុម កែវដា បានអះអាងថា៖ «ក្រោយសុខភាពបានប្រសើរឡើងវិញ មុខរបរប្រដាល់នេះមិនបោះបង់ចោលទេ វាជាចំណង់ចំណូលចិត្ត និងជារបរដែលខ្ញុំរកប្រាក់ចំណូលបានច្រើនសម្រាប់ផ្គត់ផ្គង់ជីវភាពប្រចាំថ្ងៃបានយ៉ាងប្រសើរ»។
នៅក្នុងអាជីពប្រដាល់រយៈពេលជាង ១០ ឆ្នាំមកទល់ពេលនេះ ឌុម កែវដា ដែលមានកម្ពស់ ១,៦៨ ម៉ែត្រ ប្រកួតបានចំនួន ៩៤ លើក ឈ្នះ ៧២ លើក ចាញ់ ១៩ លើក ស្មើ ៣ លើក ក្នុងនោះធ្លាប់ឈ្នះខ្សែក្រវាត់មកគ្រប់គ្រងបានចំនួន ២ ដែលរួមមានខ្សែក្រវាត់ខារ៉ាបាវទម្ងន់ ៦៣,៥ គីឡូក្រាម ឆ្នាំ ២០១៦ និងខ្សែក្រវាត់គុនខ្មែរអន្តរជាតិ ទម្ងន់ ៦៣,៥ គីឡូក្រាម កាលពីខែមករា ឆ្នាំ ២០១៨។
តាមរយៈសមិទ្ធផលចេញពីកីឡាប្រដាល់នេះ ឌុម កែវដា បានប្រាប់ថា៖ «ខ្ញុំទទួលបានប្រាក់សន្សំយកទៅធ្វើផ្ទះសមល្មមនៅឯស្រុកកំណើតស្ថិតនៅឃុំសំពងជ័យ ស្រុកជើងព្រៃ ខេត្តកំពង់ចាម និងទិញម៉ូតូថ្មី ព្រមទាំងកសាងជីវភាពបានប្រសើរជាងមុន»៕
