.jpg)
សិក្ខាកាម ថតរូបរួមគ្នា ក្រោយបញ្ចប់វគ្គបណ្តុះបណ្តាល។ យឺន ពន្លក
ភ្នំពេញ: វគ្គបណ្តុះបណ្តាល អាជ្ញាកណ្តាលចៅក្រមកីឡាវាយកូនឃ្លីលើតុ ដែលជាគម្រោងចាស់ប្រចាំឆ្នាំ ២០១៧ នោះ បានរំកិលមកប្រារព្វរយៈពេល ២ ថ្ងៃ និងបានបិទបញ្ចប់កាលពីល្ងាចថ្ងៃអាទិត្យ ទី ២១ ខែមករា ឆ្នាំ ២០១៨ នៅទីស្នាក់ការគណៈកម្មាធិការជាតិអូឡាំពិកកម្ពុជា ដោយមានគ្រូឧទ្ទេសជំនាញមកពីប្រទេសហ្វីលីពីន។
ប្រភពច្បាស់ការណ៍បានឲ្យដឹងថា វគ្គសិក្សានេះជាគម្រោងចាស់ក្នុងឆ្នាំ ២០១៧ ប៉ុន្តែ បានរំកិលមកធ្វើនៅឆ្នាំ ២០១៨ ដែលជាថវិកាបានមកពីក្រសួងអប់រំ យុវជន និងកីឡា។
ទោះជាយ៉ាងនេះក្តី វគ្គបណ្តុះបណ្តាលនេះត្រូវបានគេប្រើប្រាស់ថ្ងៃខែឆ្នាំចាស់ ពោលគឺថ្ងៃទី ២៧ ដល់ ២៩ ខែធ្នូ ឆ្នាំ ២០១៧ ដើម្បីឲ្យស្របតាមគម្រោងឆ្នាំ ២០១៧។
លោកប៊ុយ សុភ័ណ្ឌ អគ្គលេខាធិការស្តីទីសហព័ន្ទកីឡាវាយកូនឃ្លីលើតុ បានឲ្យដឹងថា៖ «វគ្គនេះត្រូវបានបញ្ចប់ហើយក្រោយរៀនសូត្រអស់រយៈពេល ២ ថ្ងៃ ដែលមានសិក្ខាកាមចំនួនប្រមាណជាង ២០ នាក់ ជាមួយអ្នកគ្រូឯកទេសពីប្រទេសហ្វីលីពីនគឺកញ្ញា Rachel Ramos»។
លោកបន្តថា ខ្លឹមសារនៃវគ្គនេះដើម្បីពង្រឹងគុណភាពចំណេះដឹង និងច្បាប់វិន័យ ក្នុងគោលដៅចេញទៅធ្វើជាអាជ្ញាកណ្តាល និងចៅក្រមកម្រិតអន្តរជាតិសម្រាប់ព្រឹត្តិការណ៍អន្តរជាតិនានា។
លោកបានបន្ថែមថា៖ «វគ្គបណ្តុះបណ្តាលនេះបានប្រើរយៈពេលពីរថ្ងៃ ប៉ុន្តែ ទទួលបានជោគជ័យជាផ្លែផ្កា ក្រោមការដឹកនាំគ្រូឧទ្ទេសអន្តរជាតិកញ្ញា Rachel Ramos ចៅក្រមកម្រិត Blue Badge (កម្រិតខ្ពស់បំផុត) មានបទពិសោធខ្ពស់របស់សហព័ន្ធកីឡាវាយកូនឃ្លីលើតុអន្តរជាតិ (ITTF)»។
បន្ទាប់ពីសិក្សា ដោយមានការប្រឡងតេស្តសមត្ថភាព វគ្គបណ្តុះបណ្តាលបានរកឃើញអ្នកជាប់មានសមត្ថភាព ៨ នាក់ ក្នុងចំណោមសិក្ខាកាមជាង ២០ នោះ ដែលប្រឡងជាប់ជាចៅក្រមកម្រិតមូលដ្ឋាន ទទួលស្គាល់ពី ITTF។ ចៅក្រមអាជ្ញាកណ្តាលចំនួន ៨ នាក់ដែលទទួលស្គាល់ពីអន្តរជាតិនោះមានលោក សឺង តុលា លោក ឃុន ផាន់និត លោកតេង សំណាង លោក ជា សុជាតិ លោក សារៈ ស៊ូព្រីង លោក ប៊ុន វិសាល លោក ហង្ស រ៉ាណាស្សា និងលោក ស្លឹក ឡយ។
អាជ្ញាកណ្តាល និងចៅក្រមដែលទទួលបានលិខិតបញ្ចក់នេះមានសមត្ថភាពក្លាយខ្លួនជាចៅក្រម និងអាជ្ញាកណ្តាលអន្តរជាតិ ទៅតាមបទដ្ឋានលក្ខខណ្ឌនៃសហព័ន្ធកីឡាកូនឃ្លីលើតុអន្តរជាតិ ក្នុងគោលដៅចូលរួមព្រឹត្តិការណ៍អន្តរជាតិក៏ដូចជា Sea Game 2019 ខាងមុខនេះ។
សហព័ន្ធកីឡាជាតិ ២ ក្នុងចំណោមសហព័ន្ធកីឡាជាតិចំនួន ២១ ដែលទទួលបានប្រាក់ផ្ទាល់ពីក្រសួងអប់រំ យុវជន និងកីឡាប្រចាំឆ្នាំ ២០១៧ គឺសហព័ន្ធទោចក្រយាន និងសហព័ន្ទកីឡាវាយកូនឃ្លីលើតុ បានរំកិលពេលវេលាមកប្រារព្ធនៅឆ្នាំ ២០១៨៕
