ភ្នំពេញៈ ក្រុមលេខ ១ លីកកំពូលកម្ពុជា ឆ្នាំ ២០១៧ បឹងកេត កំពុងតែជួបបញ្ហាប្រឈមទៅលើការប្រមូលផ្តុំ និងបញ្ហាកីឡាករ ដែលធ្វើឲ្យក្រុមនេះ មានការបារម្ភ ក្នុងការប្រកួតជម្រុះ (Play-off Round) ទាំង ២ ជើងជាមួយក្រុមឡាវ Lao Toyota ដើម្បីប្រជែងយកកៅអីឡើងទៅវគ្គ Group Stage នៃពានរង្វាន់ AFC Cup 2018 ដែលនឹងត្រូវធ្វើនៅដើមសប្តាហ៍ក្រោយនេះ។
លោក ហៅ សុជាតិ គ្រូបង្វឹកក្រុមបឹងកេត បានប្រាប់ ភ្នំពេញ ប៉ុស្តិ៍ កាលពីម្សិលមិញថា៖ «គិតមកដល់ពេលនេះ យើងរៀបចំមិនទាន់បានគ្រប់គ្រាន់ទេ ព្រោះដំបូង យើងគិតថា យើងបានទៅប្រកួតនៅ Group Stage ដោយស្វ័យប្រវត្តិ ប៉ុន្តែក្រោយមក យើងបែរជាត្រូវដាក់ឲ្យប្រកួតជម្រុះវិញ អ៊ីចឹងធ្វើឲ្យយើងមានពេលខ្លី ក្នុងការរៀបចំ ដោយសារយើងទើបទទួលដំណឹងពីការប្រកួតជម្រុះជាមួយក្រុមឡាវនេះ មិនទាន់បានមួយសប្តាហ៍ទេ»។
តាមពិត កាលពីដំបូង ក្រុមបឹងកេត ត្រូវដាក់ឲ្យលេងក្នុងវគ្គ Group Stage គឺពូល F ជាមួយក្រុម Cerec Negros របស់ហ្វីលីពីន ក្រុម Home United របស់សិង្ហបុរី និងក្រុម Shan United របស់មីយ៉ាន់ម៉ា ដោយស្វ័យប្រវត្តិ បន្ទាប់ពីសហព័ន្ធកីឡាបាល់ទាត់ទ្វីបអាស៊ី (AFC) បានដកក្រុម Lao Toyota ចេញពីការប្រកួតវគ្គជម្រុះនេះ ដោយចោទថា ក្រុមឡាវមួយនេះ បានជាប់ពាក់ព័ន្ធ នឹងការរៀបចំលទ្ធផលការប្រកួត កន្លងមក។
ប៉ុន្តែក្រុម Lao Toyota បានឈ្នះក្តីនៅឧទ្ធរណ៍ ចំពោះការចោទប្រកាន់នេះ ទើប AFC ដាក់ឲ្យ Lao Toyota ប្រកួតវគ្គ Play-off Round ជាមួយក្រុមបឹងកេត វិញបែបនេះ ដោយធ្វើ ២ ជើង ក្នុងនោះជើងទី ១ នៅថ្ងៃទី ២៩ ខែមករា នៅពហុកីឡដ្ឋានជាតិ និងជើងទី ២ នៅកីឡដ្ឋានជាតិ KM16 ទីក្រុងវៀងចន្ទន៍ នាថ្ងៃទី ២ ខែកុម្ភៈ ខណៈការប្រកួតជម្រុះ កាលពីឆ្នាំ ២០១៧ បឹងកេត និង Lao Toyota បានស្មើគ្នា ១-១ នៅពហុកីឡដ្ឋានជាតិ តែ បឹងកេត បានឈ្នះ Lao Toyota ១-០ ក្នុងជើងទី ២ ក្នុងទឹកដីឡាវ។
ប៉ុន្តែសម្រាប់ការប្រកួតលើកនេះ លោក សុជាតិ បានបន្ថែមថា៖ «នៅពេលនេះយើងបានបាត់ខ្សែការពារដ៏ល្អមួយ គឺ រស់ សំអឿន ហើយយើងក៏កំពុងមានបញ្ហាបារម្ភទៅលើខ្សែប្រយុទ្ធ Paul Esoh Omogba និង Samuel Gbenga ដែរដោយសារយើងបញ្ជូនឈ្មោះពួកគាត់ទៅប្រកួតពានរង្វាន់នេះ មិនទាន់បាន ប៉ុន្តែកីឡាករប្រេស៊ីល Maycon និង កីឡាករជប៉ុន Hikaru Mizuno យើងបានបញ្ចូលឈ្មោះរួចរាល់ហើយ ខណៈព្រឹត្តិការណ៍នេះ គេតម្រូវឲ្យដាក់កីឡាករបរទេសបាន ៤ នាក់»។
គួរបញ្ជាក់ថា លោក ហៅ សុជាតិ ដែលមានត្រឹមអាជ្ញាប័ណ្ណកម្រិត B នោះ មិនអាចដឹកនាំក្រុមបឹងកេត ក្នុងការប្រកួតពានរង្វាន់ AFC Cup 2018 នេះបានទេ ពីព្រោះ ព្រឹត្តិការណ៍នេះ AFC តម្រូវឲ្យគ្រូបង្វឹកមានអាជ្ញាប័ណ្ណកម្រិត A។ យ៉ាងណាក៏ដោយ នៅពេលនេះ លោក ហៅ សុជាតិ នៅតែជាអ្នកបង្វឹកក្រុមបឹងកេត ដោយផ្ទាល់ដដែល គឺមិនទាន់មានគ្រូបង្វឹកថ្មី មកជំនួសគាត់ទេ។
នៅពេលសួរពីទំនុកចិត្ត និងក្តីសង្ឃឹមសម្រាប់ការប្រកួតនេះ លោក សុជាតិ បានឆ្លើយថា៖ «ចំពោះខ្ញុំ វាជាក្តីបារម្ភមួយ សម្រាប់ការប្រកួតនឹងក្រុម Lao Toyota លើកនេះ ដោយសារយើងមានពេលខ្លី ក្នុងការរៀបចំ និងពាក់ព័ន្ធលើបញ្ហាកីឡាទៀត ហើយម្យ៉ាងទៀត យើងនៅមិនទាន់ដឹងថា ក្រុមឡាវ មានការប្រែប្រួលយ៉ាងម៉េចនោះទេ សម្រាប់ការត្រៀមខ្លួន រដូវកាល ឆ្នាំ ២០១៨ នេះ»៕