ភ្នំពេញ: កីឡាចំនួន ៩ ប្រភេទដែលដាក់ឲ្យប្រកួតក្នុងព្រឹត្តិការណ៍បុណ្យទន្លេលើកទី ៤ នៅក្រុងតាខ្មៅ ខេត្តកណ្តាល ឆ្នាំ ២០១៨ នេះបានបញ្ចប់ទៅរលូនកាលពីថ្ងៃអាទិត្យ និងមានសកម្មភាពទាក់ទាញល្អជាងឆ្នាំកន្លងមក ក្នុងនោះការប្រកួតបានផ្តោតទៅលើការអបអរសាទរពិធីបុណ្យទន្លេ និងការបង្ក ភាពសប្បាយរីករាយជូនមហាជនទស្សនា។
ប៉ុន្តែ កីឡា ២ ប្រភេទដែលរួមមានប្រដាល់គុនខ្មែរ និងអុកចត្រង្គ បានសម្រួចទៅរកលទ្ធផលផ្លូវការតាមបច្ចេកទេស។
ក្នុងនោះដែរ កីឡារត់កម្សាន្ត ៣ គីឡូម៉ែត្រ ៥ គីឡូម៉ែត្រ ដែលមានអ្នករត់ប្រមាណ ៣៥០០ នាក់ ជិះកង់កម្សាន្ត ១០ គីឡូម៉ែត្រ ឆ្លងស្ពានតាខ្មៅមានអ្នកជិះកង់ប្រមាណ ២៥០០ នាក់ និងប្រណាំងកង់ ៣៥ គីឡូម៉ែត្រ កីឡាប្រណាំងទូកប្រពៃណីខ្នាតវែង កីឡាបាល់ទាត់មិត្តភាពកម្ពុជា និងវៀតណាម កីឡាបាល់ទះ មិត្តភាពកម្ពុជា និងវៀតណាម ចំបាប់បុរាណខ្មែរ ព្រមទាំងហែលទឹកឆ្លងទន្លេបាសាក់ ១០០០ ម៉ែត្រ មិនបែងចែកចំណាត់ថ្នាក់នោះទេ។
សម្រាប់ការប្រកួតកីឡាអុកចត្រង្គជម្រុះសម្រាប់ឆ្ពោះទៅអង្គរមហាសង្ក្រាន្តឆ្នាំ ២០១៨ នាមណ្ឌលភ្នំពេញ និងប្រដាល់គុនខ្មែរទទួលបានការគាំទ្រខ្លាំងពីមហាជន និងលទ្ធផលចំណាត់ថ្នាក់ច្បាស់លាស់តាមបច្ចេកទេស។ លោកឈាវ បូរ៉ា អគ្គលេខាធិការសហព័ន្ធកីឡាអុកចត្រង្គ បានឲ្យដឹងថា៖ «ការប្រកួតជម្រុះអុកចត្រង្គរយៈពេលចំនួន ៣ ថ្ងៃដើម្បីអបអរសាទរបុណ្យទន្លេផងនោះ យើងជ្រើសបានកីឡាករចំនួន ៦ នាក់ មានចំណាត់ថ្នាក់ ដើម្បីទៅប្រកួតថ្នាក់ជាតិក្នុងការប្រកួតប្រជែងមានបេក្ខជនចំនួន ៦៧ នាក់មកពីរាជធានីភ្នំពេញតែមួយ»។
តាមរបាយការណ៍ពីគណៈកម្មការប្រកួត លោកគ្រួច ចន្ថារិទ្ធ បានឲ្យដឹងថា៖ «បេក្ខជនឈ្នះចំណាត់ថ្នាក់ទាំង ៦ នាក់នោះ មានចំណាត់ថ្នាក់លេខ ១ កីឡាករសុខ លឹមហេង លេខ ២ ខូវ គឹមសែ លេខ ៣ ឆយ វីរ៉ា លេខ ៤ រស់ រិទ្ធយ៉ា លេខ ៥ ប៊ូ វណ្ណមូលីកា និងចំណាត់ថ្នាក់លេខ ៦ កែវ វឌ្ឍនា ដែលទាំងអស់គ្នានេះមកពីមណ្ឌលភ្នំពេញតែមួយប៉ុណ្ណោះ និងភាគច្រើនសុទ្ធតែជើងខ្លាំងល្បី។
លោកបានបន្ថែមថា៖ «មណ្ឌលរាជធានីភ្នំពេញមានបេក្ខជនដល់ ៦៧ នាក់ ហេតុនេះគណៈកម្មការសម្រេចអនុញ្ញាតឲ្យជ្រើសយកបេក្ខជន ៦ នាក់ ដើម្បីឲ្យមានសមាមាត្រ ខណៈមណ្ឌល ៦ ទៀតយកត្រឹមចំណាត់ថ្នាក់លេខ ៣ ប៉ុណ្ណោះ»។
ចំណែកលទ្ធផលប្រដាល់គុនខ្មែរវិញ រឿង សោភ័ណ្ឌ បានផ្តួលកីឡាករថៃ Thav Oulan ត្រឹមទឹកទី ៣ ដោយកណ្តាប់ដៃ។ ចំពោះលទ្ធផលគូផ្សេងគឺខេម ចាន់ បានយកឈ្នះសង គង់ ដោយពិន្ទុ ខណៈជើងថ្មីលន បញ្ញា បានផ្តួលជើងចាស់លាភ សំណាង ទឹកទី ២ ហើយគឿន សុវណ្ណនឿត ឈ្នះពិន្ទុលី តឿន ស្របពេលសរ សូ បានផ្តួល ប្រាក់ ឌីណា ទឹកទី ៣៕