.jpg)
ការប្រកួតកីឡាប្រដាល់ក្នុងបុណ្យទន្លេកាលពីឆ្នាំ ២០១៦។ ស្រេង ម៉េងស្រ៊ុន
ភ្នំពេញ: ប្រដាល់គុនខ្មែរ បច្ចុប្បន្នកំពុងមានប្រជាប្រិយខ្លាំងជាងកីឡាប្រភេទដទៃ ក្នុងនោះការប្រកួតប្រចាំចុងសប្តាហ៍តាមសង្វៀនទូរទស្សន៍ឯកជននានាហាក់ដូចជាមានលក្ខណៈផុលផុស និងមានការប្រជែងដណ្តើមកីឡាករខ្លាំងៗដើម្បីឲ្យការប្រកួតតាមការចង់បានរបស់សង្វៀននីមួយរៀងៗខ្លួន។
សេវាប្រកួតព្រមទាំងតម្លៃខ្លួនកាន់តែប្រសើរ នាំឲ្យកីឡាករដែលមានសមត្ថភាពល្អ ពិសេសក្រុមកីឡាករប្រមូលផ្តុំហ្វឹកហាត់ជាក្រុមជម្រើសជាតិ ដែលទទួលរបបឧបត្ថម្ភថវិកាពីរាជរដ្ឋាភិបាលតាមរយៈក្រសួងអប់រំ យុវជន និងកីឡា មិនចាប់អារម្មណ៍ពីការអញ្ជើញឲ្យទៅប្រកួតបុណ្យថ្នាក់ជាតិប្រចាំឆ្នាំរបស់រាជរដ្ឋាភិបាលនោះឡើយ។
ប្រភពពីអ្នករៀបចំកម្មវិធីបុណ្យទន្លេលើកទី ៤ នៅក្រុងតាខ្មៅ ខេត្តកណ្តាលដែលគ្រោងរៀបចំកីឡាចំនួន ៩ ប្រភេទនាដើមខែមីនា ឆ្នាំ ២០១៨ នោះ បានបង្ហើបឲ្យដឹងថា៖ «កីឡាចំនួន ៨ ប្រភេទមានជិះកង់ រត់ប្រណាំង អុកចត្រង្គ ចំបាប់បុរាណ ហែលទឹក បាល់ទាត់ និងបាល់ទះ បានរៀបចំរួចរាល់ហើយ»។
ប្រភពដដែលបានបន្តថា៖ «ប៉ុន្តែ ផលវិបាកនៅតែកីឡាប្រដាល់គុនខ្មែរដែលត្រូវការកីឡាករល្អៗលំដាប់ថ្នាក់ជាតិទៅប្រកួត ដែលមិនទាន់បានរៀបរយនៅឡើយ ពិសេសក្រុមកីឡាគុនខ្មែរជម្រើសជាតិនេះតែម្តង ដោយសារតែកីឡាករមិនចង់ចូលរួមប្រកួត ទោះបីនេះជាកាតព្វកិច្ចក៏ដោយ»។
លោកវ៉ាត់ ចំរើន ប្រធានអនុគណៈកម្មការកីឡានៃបុណ្យទន្លេនៅក្រុងតាខ្មៅនេះ មានប្រសាសន៍ថា៖ «បុណ្យទន្លេជាបុណ្យជាតិដែលទទួលបានច្បាប់អនុញ្ញាតពេញលេញពីរាជរដ្ឋាភិបាល ក្នុងនោះសកម្មភាពប្រកួតកីឡាដើម្បីអបអរសាទរពិធីបុណ្យ និងដាក់ឲ្យប្រជាពលរដ្ឋចូលទស្សនាកម្សាន្តសប្បាយរីករាយដោយសេរី»។
លោកបានបន្តថា៖ «ក្នុងការប្រកួតបុណ្យទន្លេនេះ ពុំមានលទ្ធភាពដាក់ឲ្យមានការប្រកួតកម្រិតអន្តរជាតិនោះទេ ពោលគឺយើងចង់ផ្តល់ឱកាសឲ្យកីឡាករទើបហ្វឹកហាត់ថ្មីៗមកពីក្លិបដែលមិនសូវបានឡើងប្រកួតតាមសង្វៀនឯកជននានា ហើយបន្ថែមលើសពីនេះ យើងចង់ផ្តល់ឲ្យកីឡាករដែលជាប់ជាជម្រើសជាតិនោះបានចូលរួមប្រកួត ដែលជាកាតព្វកិច្ចសម្រាប់បុណ្យជាតិផងដែរ»។
លោកវ៉ាត់ ចំរើន បានបន្តថា៖ «ប៉ុន្តែ តាមក្រុមជំនួយបច្ចេកទេសរៀបចំរបស់ខ្ញុំរាយការណ៍មកថា កីឡាករជម្រើសជាតិរបស់យើង មិនអាចមកប្រកួតបានទេ ដោយភាគច្រើនជាប់ប្រកួតជាមួយសង្វៀនឯកជន តាមប៉ុស្តិ៍ និងទាមទារតម្លៃខ្លួនប្រកួតខ្ពស់ផង ព្រមទាំងមានកីឡាករខ្លះចង់ក្លាយជាតួឯក ឬតារាទៅហើយដែលមិនទៅប្រកួតបាន»។
លោកតែម ម៉ឺន ប្រធានសហព័ន្ធគុនខ្មែរមានប្រសាសន៍ថា៖ «យើងជំរុញលើកទឹកចិត្តឲ្យមានការចូលរួមប្រកួតហើយ ក្នុងនោះរាប់បញ្ចូលទាំងកីឡាករជម្រើសជាតិស្ថិតនៅក្រោមការគ្រប់គ្រងផ្ទាល់របស់សហព័ន្ធគុនខ្មែរ និងមជ្ឈមណ្ឌលជាតិហ្វឹកហ្វឺនកីឡាដែលកំពុងប្រមូលផ្តុំ ហើយយើងនឹងប្រឹងប្រែងឲ្យមានការចូលរួមប្រកួតទៅតាមលក្ខណៈជាក់ស្តែងដែលអាចធ្វើទៅបាន»។
លោកនិន ភិរម្យ អគ្គលេខាធិការរងសហព័ន្ធគុនខ្មែរ បានឲ្យដឹងថា៖ «ក្រុមកីឡាករជម្រើសជាតិពិបាកដាក់ឲ្យប្រកួតក្នុងបុណ្យទន្លេនេះមែន ពីព្រោះភាគច្រើនគេជាប់ប្រកួតខ្សែក្រវាត់តាមប៉ុស្តិ៍ ហើយការប្រកួតបុណ្យទន្លេឆ្នាំនេះ យើងទទួលបានការអនុញ្ញាតឲ្យរៀបចំរយៈពេលខ្លីពេកមិនអាចដកឃ្លាបាន»។
លោកបន្ថែមថា៖ «ក្រុមជម្រើសជាតិដូចជា ឃីម ឌីម៉ា លំបាករកដៃគូប្រកួតណាស់ ហើយដៃគូដែលអាចប្រកួតបានមានមាស ច័ន្ទមាន, ឌុម កែវដា និងផាន់ គ្រាន់ ជាដើម ប៉ុន្តែ ពួកគេសុទ្ធតែជាប់រវល់ប្រកួតឲ្យសង្វៀនផ្សេងៗអស់ហើយ»។
ឃីម ឌីម៉ា ក្រោយពីឈ្នះមេដាយមាសពីស៊ីហ្គេមរួចមក ត្រូវបានគេកត់សម្គាល់ថា បានចាប់ផ្តើមវាយឫក និងហាក់មិនចង់ប្រកួតជាមួយខ្មែរគ្នាឯងថ្នាក់ជាតិនោះទេ។ កាលពីថ្ងៃចន្ទ ឃីម ឌីម៉ា មិនបានឆ្លើយតបទៅនឹងសំណួររបស់ភ្នំពេញ ប៉ុស្តិ៍ ទេខណៈទូរស័ព្ទលើកហើយមិននិយាយ ហើយក៏បិទទៅវិញ។
ម៉ឺន សុភា ដែលជាកីឡាករជម្រើសជាតិ និងគ្រោងដាក់ឲ្យប្រកួតបុណ្យទន្លេ បានប្រាប់ភ្នំពេញ ប៉ុស្តិ៍ ម្សិលមិញថា៖ «ខ្ញុំមិនអាចចូលរួមប្រកួតបានទេ ដោយឈឺជើង»។
បើតាមកម្មវិធីប្រកួត ម៉ឺន សុភា ជាប់កិច្ចសន្យាជាមួយសង្វៀនបាយ័នទុកប្រកួតដណ្តើមខ្សែក្រវាត់មិនអនុញ្ញាតឲ្យប្រកួតក្រៅសង្វៀននេះបានទេ៕
