.jpg)
កីឡាករ Reda (ឆ្វេង) និង បូរ៉ា ក្នុងការប្រកួតកាលពីថ្ងៃអាទិត្យ។ យឺន ពន្លក
ភ្នំពេញ: ការប្រកួតសងសឹករបស់ឃីម បូរ៉ា មកពីក្លិបរស្មីភូមិគាប ខេត្តបន្ទាយមានជ័យ ជាមួយកីឡាករជើងចាស់ថៃ Reda បានបញ្ចប់ដោយកីឡាករកម្ពុជា បានទទួលរងនូវការបរាជ័យធ្ងន់ធ្ងរជាងមុន ក្រោយពីអាជ្ញាកណ្តាលរាប់រូបគេនៅទឹកទី ៣ ចំនួន ២ លើក មុននឹងចាញ់ដោយពិន្ទុទាំងគ្រាំគ្រាខ្លួន។
ជាមួយគ្នានេះដែរ ផង់ សុភាព មកពីក្លិបតាឡីមានរិទ្ធ បានប្រកួតគ្នាចំនួន ៥ ទឹកជាមួយកីឡាករចំណូលថ្មីរបស់ថៃ Sen Khom មុននឹងទទួលបានលទ្ធផលស្មើ ទោះបី ២ ទឹកចុងក្រោយ កីឡាករថៃមានប្រៀបផ្នែកក្បាច់ទាត់ជាង ក៏ដោយ។
ក្រោយពីការប្រកួតចំនួន ៥ ទឹកពេញ ឃីម បូរ៉ា បានចាញ់ទាំងគ្រាំគ្រា ក្រោយពីទទួលរងនូវការឈឺចាប់សឹងគ្រប់កន្លែង ដោយសារស្នៀតទាត់វាយជង្គង់ និងកែងរបស់កីឡាករថៃចាស់វស្សា Reda ដែលបានវាយចូលគោលដៅបានល្អ និងធ្ងន់ៗ ដែលជាមូលហេតុទទួលបានជ័យជម្នះ។ ក្នុងការប្រកួតចំនួន ៥ ទឹក ឃីម បូរ៉ា បានវាយទប់ទល់ល្អបានតែមួយទឹកប៉ុណ្ណោះគឺទឹកទី ១ និងវាយការពារដើម្បីបង្គ្រប់ទឹកនៅទឹកចុងក្រោយ ក៏ដូចជាគេចពីការសន្លប់។
ចំណុចសំខាន់ដែលធ្វើឲ្យឃីម បូរ៉ា ចុកចាប់គ្រាំគ្រានោះគឺនៅក្នុងទឹកទី ៣ ដែលកីឡាករថៃ Reda បានទាត់ជើងក្រោមឲ្យបូរ៉ា ខូចជើង និងបន្ថែមដោយស្នៀតកែងដួលដេកលើសង្វៀន ហើយអាជ្ញាកណ្តាលលោកឡុង ស៊ីលីន រាប់ចំនួន ២ លើក ទើបបន្តការប្រកួតបានទាំងលំបាក។
ទោះជាប្រឈមទៅនឹងឧបសគ្គលំបាកយ៉ាងណា ឃីម បូរ៉ា នៅតែប្រឹងវាយកែងមុខកាណូតសងទៅកីឡាករថៃវិញបានយ៉ាងល្អ ប៉ុន្តែមិនអាចធ្វើឲ្យកីឡាករថៃរូបនេះចុះខ្សោយបានឡើយ មុននឹងចាញ់ដោយពិន្ទុទាំងគ្រាំគ្រា។
សម្រាប់គូអន្តរជាតិមួយគូទៀត ផង់ សុភាព របស់កម្ពុជា និងកីឡាករថៃ Sen Khom ជាការប្រកួតមួយដ៏ជក់ចិត្តបំផុត មុននឹងបញ្ចប់ក្នុងលទ្ធផលស្មើ។ ក្នុង ៣ ទឹកដំបូង កីឡាករថៃហាក់បីដូចមិនទាន់បញ្ចេញស្នៀតនៅឡើយទេ ដោយវាយរបៀបដកថយមួយៗ ដែលហាក់បីដូចទុកឱកាសឲ្យកីឡាករផង់ សុភាព ដេញវាយសម្រុកមានប្រៀបបន្តិចបន្តួច។
ការប្រកួតឈានដល់ទឹកទី ៤ និងទឹកទី ៥ កីឡាករថៃ Sen Khom ចាប់ផ្តើមវាយសម្រុកខ្លាំងឡើងវិញ ដោយស្នៀតទាត់ និងជង្គង់វាយចូលគោលដៅបានល្អ មានពិន្ទុនាំមុខផង់ សុភាពវិញ ដែលធ្វើឲ្យចៅក្រោមលំបាកក្នុងការសម្រេចសេចក្តី។ ទោះជាយ៉ាងណា ក្រោយពីការប្រកួត ៥ ទឹក គណៈកម្មការវិនិច្ឆ័យ បានសម្រេចឲ្យគូនេះស្មើគ្នា ខណៈដែលភាគីថៃសម្តែងការមិនពេញចិត្ត។
គណៈកម្មការផ្គូផ្គង លោកញាន សុធី បាននិយាយថា ៖ «Sen Khom នឹងត្រៀមសម្រាប់ការប្រកួតដណ្តើមខ្សែក្រវាត់នៅខែក្រោយជាមួយកីឡាករកម្ពុជា»៕
