ភ្នំពេញ: កីឡាករប្រដាល់ចិត្តធំផង់ សុភាព ដំបូងគ្រោងឲ្យប្រកួតដណ្តើមខ្សែក្រវាត់ខារ៉ាបាវទម្ងន់ ៦៥ គីឡូក្រាម ប៉ុន្តែខកខានដោយសាររក្សាទម្ងន់មិនបាន។ តែ បច្ចុប្បន្ន កីឡាកររូបនេះ ដំឡើងទម្ងន់រហូតដល់ ៦៩ គីឡូក្រាម ហើយគណៈកម្មការផ្គូផ្គងនៃសង្វៀនអាស៊ីអាគ្នេយ៍ សម្រេចដាក់ឲ្យប្រកួតជាមួយជើងខ្លាំងជំនាញជង្គង់គឺកីឡាករថៃ Thav Oulan វិញនៅព្រឹកថ្ងៃអាទិត្យ ទី ១១ ខែមីនា ឆ្នាំ ២០១៨ ក្នុងកម្មវិធីអ្នកប្រយុទ្ធ Boostrong Fighter។
ការប្រកួតនេះត្រូវបានអ្នកតាមដានប្រដាល់មួយចំនួនលើកឡើងថា ផង់ សុភាព ហាក់ដូចជាថ្លើមធំណាស់ ហ៊ានប៉ះជាមួយជើងខ្លាំងថៃ Thav Oulan។
ផង់ សុភាព មកពីក្លិបតាឡីមានរិទ្ធិ ជាអ្នកប្រដាល់ចិត្តធំម្នាក់ជំនាញកែងរូស និងជង្គង់បានល្អ ហើយធ្លាប់ឈ្នះខ្សែឥក្រវាត់នៅសង្វៀនបាយ័នកន្លងមកផងដែរ ប៉ុន្តែនៅសង្វៀនអាស៊ីអាគ្នេយ៍ធ្លាប់បានត្រឹមជើងឯករងប៉ុណ្ណោះ។ ចាប់តាំងពីការឡើងទម្ងន់ដល់ ៦៩ គីឡូក្រាម នេះវានឹងក្លាយជាការប្រកួតជាលើកទី ១ របស់់ សុភាព ខណៈដែលគ្រាកន្លងមក គេប្រកួតត្រឹមទម្ងន់ ៦៥ កីឡូក្រាម។
Thav Oulan ជាជើងខ្លាំងម្នាក់ដែលពិបាកទប់ទល់។ កីឡាករនេះធ្លាប់ឈ្នះខ្សែក្រវាត់នៅអាស៊ីអាគ្នេយ៍ម្តង និងឈ្នះជើងឯករងដោយចាញ់រឿង សោ ភ័ណ្ឌ ដើម្បីបានត្រឹមចំណាត់ថ្នាក់លេខ ២ កាលពីខែមុន នៅស៊ីអិនស៊ី។ កីឡាករថៃរូបនេះមានជំនាញជង្គង់ និងមានមុខរឹងល្អផងដែរ។
តាមការឲ្យដឹងពីគណៈកម្មការផ្គូផ្គង កីឡាករផង់ សុភាព ប្រកួតបានចំនួនចំនួន ៨៨ លើក ឈ្នះ ៦៩ លើក ចាញ់ ១៧ លើក និងស្មើ ២ លើក។ ចំណែកថៃ Thav Oulan ធ្លាប់ប្រកួតបានចំនួន ៩៩ លើក ឈ្នះ ៧៧ លើក ចាញ់ ១៩ លើក និងស្មើ ៣ លើក។
លោកម៉ាក់ សាខន គ្រូបង្វឹកផង់ សុភាព បាននិយាយថា៖ «ផង់ សុភាព ទើបតែឡើងទម្ងន់ ហើយប្រកួតជាមួយជើងខ្លាំងថៃ គឺជាការតឹងតែង ប៉ុន្តែ ខ្ញុំគិតថា ទោះជាលំបាកឈ្នះក៏ត្រូវតែប្រកួត និងមានសង្ឃឹមដែរ»។
លោកបានបន្តថា៖ «ធ្វើជាកីឡាករប្រដាល់ បើមិនប៉ះជើងខ្លាំង យើងមិនរីកចម្រើនទេ»។
លោកថៃ អ៊ូ ប្រតិភូនាំកីឡាករថៃមកប្រកួត បាននិយាយថា៖ «តាមបច្ចេកទេស ខ្ញុំមើលឃើញថា កីឡាករថៃ Thav Oulan មានប្រៀបជាង និងមានភាគរយឈ្នះខ្ពស់ជាង ប៉ុន្តែការប្រកួតទុកចិត្តមិនបានទេ អាចភ្លាត់ស្នៀតចូលកែងបែកបរាជ័យក៏ថាបានដែរ។ ផង់ សុភាព មានស្នៀតកែងរូសល្អ ដែលជាឧបសគ្គធំមួយដែរ។ ខ្ញុំមានសង្ឃឹមថា Thav Oulan មានឱកាសឈ្នះ ៨០ ភាគរយ»។
លោក ញាន សុធី នាយកគ្រប់-គ្រងកម្មវិធី បាននិយាយថា៖ «បើផង់ សុភាព ឈ្នះ Thav Oulan នោះ រូបគេនឹងល្បីល្បាញខ្លាំងណាស់ ហើយការប្រកួតទម្ងន់ធ្ងន់បែបនេះប្រហែសមិនបានទេ បើភ្លាត់ស្នៀត អាខ្លាំងសន្លប់ក៏ថាបានដែរ»៕