ភ្នំពេញៈ ព្រឹត្តិការណ៍រត់ពាក់កណ្តាលម៉ារ៉ាតុងអន្តរជាតិ នៅខេត្តព្រះសីហនុ លើកទី ៧ ដែលបានប្រព្រឹត្តទៅកាលពីថ្ងៃអាទិត្យ មានអត្តពលិកចំនួនជាង ២ ពាន់នាក់មកពី ២៨ ប្រទេសបានមកជួបជុំគ្នា នៅឆ្នេរអូឈើទាលក្នុងខេត្តព្រះសីហនុ ដើម្បីចូលរួមប្រកួតប្រជែង លើ ៣ វិញ្ញាសា មានរត់ពាក់កណ្តាលម៉ារ៉ាតុងចម្ងាយ ២១ គីឡូម៉ែត្រ រត់ចម្ងាយ ១០ គីឡូម៉ែត្រ និងរត់បែបកម្សាន្ត ៣ គីឡូម៉ែត្រ ហើយចំនួននេះ បានកើនឡើងតិចតួច បើប្រៀបធៀបទៅនឹងឆ្នាំមុន។
លោក សែម ផល្លា អ្នកគ្រប់គ្រងកម្ម-វិធីរត់ពាក់កណ្តាលម៉ារ៉ាតុង បាននិយាយថា៖ «ចំនួនអត្តពលិកចូលរួមឆ្នាំនេះ មានការកើនឡើងតិចតួចបំផុត បើធៀបនឹងឆ្នាំមុន ដែលមានប្រមាណជាង ២ ពាន់នាក់។ ការកើនឡើងតិចតួចនៅឆ្នាំនេះ ដោយសារខេត្តព្រះសីហនុ មិនសូវសម្បូរជើងយន្តហោះហើរត្រង់ ពីបរទេស ហើយការដំឡើងថ្លៃឈ្នួលសណ្ឋាគារ ផ្ទះសំណាក់ និងម្ហូបអាហាររបស់វិស័យឯកជន ក៏ជាកត្តារួមចំណែកធ្វើឲ្យអ្នកចូលរួមថយចុះផងដែរ»។
ជាមួយគ្នានេះ លោក សែម ផល្លា បានអំពាវនាវដល់ម្ចាស់សណ្ឋាគារ ផ្ទះសំណាក់ និងភោជនីយដ្ឋាននៃវិស័យឯកជនក្នុងខេត្តព្រះសីហនុ មេត្តាចូលរួមសហការតាមរយៈការផ្តល់តម្លៃសេវាកម្មសមរម្យជូនអតិថិជន ដើម្បីទាក់ទាញមហាជន នៅឆ្នាំក្រោយ។ លោកបានបន្ថែមថា រឿងមួយទៀតគឺប្រជាពលរដ្ឋខ្មែរមួយចំនួនងាកទៅចូលរួមក្នុងព្រឹត្តិការណ៍បុណ្យទន្លេ ដែលប្រារព្ធនៅខេត្តកណ្តាល ចុងសប្តាហ៍ដូចគ្នា។
លោក វ៉ាត់ ចំរើន អគ្គលេខាធិការ NOCC និងជាអនុរដ្ឋលេខាធិការក្រសួងទេសចរណ៍ មានប្រសាសន៍ថា៖ «ព្រឹត្តិការណ៍ពាក់កណ្តាលម៉ារ៉ាតុងអន្តរជាតិនេះ រៀបចំឡើងក្នុងគោលបំណង ដើម្បីទាក់ទាញភ្ញៀវទេសចរជាតិ និងអន្តរជាតិ ឲ្យមកទស្សនាតំបន់ទេសចរណ៍នៅខេត្តព្រះសីហនុ និងដើម្បីផ្សព្វផ្សាយឲ្យប្រជាពលរដ្ឋយល់ដឹងពីការថែទាំឆ្នេរសមុទ្រ និងបរិស្ថានជុំវិញតំបន់ទេសចរណ៍ឆ្នេរដ៏ស្រស់ស្អាតរបស់ខេត្តព្រះសីហនុមួយនេះ ហើយថវិកាបានមកពីព្រឹត្តិការណ៍នេះ ត្រូវប្រមូលជាមូលធិនិសម្រាប់ជួយមន្ទីរពេទ្យគន្ធបុប្ផា និងអង្គការសប្បុរសធម៌នានាជារៀងរាល់ឆ្នាំ»។
ចំណែកលទ្ធផលជ័យជម្នះ និងប្រាក់រង្វាន់វិញ លោក វ៉ាត់ ចំរើន បញ្ជាក់ថា ខ្លឹមសារប្រកួតគឺមិនសម្រួចទៅលើជ័យជម្នះ ឬប្រាក់រង្វាន់ជយលាភីនោះទេ គឺជាការផ្តោតទៅលើកីឡា និងទេសចរណ៍ និងបញ្ហាជួយសង្គមតែប៉ុណ្ណោះ ខណៈអ្នកចូលរួមទាំងជាតិ និងអន្តរជាតិ សុទ្ធតែបរិច្ចាគប្រាក់ផ្ទាល់ខ្លួន។
ទោះជាយ៉ាងណា លោក ចំរើន បានកោតសរសើរដល់អត្តពលិកមកពីបរទេសដែលជិះយន្តហោះមកដល់ភ្នំពេញហើយបន្តជិះរថយន្ត ទៅចូលរួមនៅខេត្តព្រះសីហនុ គឺជាកាយវិការស្រឡាញ់កីឡារត់ម៉ារ៉ាតុង និងបញ្ហាជួយសង្គម៕