ភ្នំពេញៈ ក្រុមហ្វុតសាលប្រចាំនៅមណ្ឌលក្រុងព្រះសីហនុ នឹងត្រូវប្រកួតប្រជែងគ្នា នៅលើទីលាន ក្នុងក្លិបកីឡាជេក (ផ្លូវអូរ ២) នៅថ្ងៃសៅរ៍ និងថ្ងៃអាទិត្យ ចុងសប្តាហ៍នេះ ដើម្បីស្វែងរកក្រុមខ្លាំងចំនួន ២ ឡើងមកប្រកួតជុំផ្តាច់ព្រ័ត្រ ការប្រកួតហ្វុតសាលដណ្តើមពានរង្វាន់ស្ពនស័រ លើកទី ៦ ឆ្នាំ ២០១៧ (Sponsor Futsal Cup 2017) នៅភ្នំពេញ នាថ្ងៃទី ២០ និង ២១ ខែមករា ខាងមុខនេះ។
តាមអ្នកគ្រប់គ្រងការប្រកួត Sponsor Futsal Cup នេះបានឲ្យដឹងថា ការប្រកួតជម្រុះមណ្ឌលក្រុងព្រះសីហនុនេះ មានក្រុមដាក់ពាក្យចូលរួមច្រើន ហើយការកើនឡើងនេះ បានធ្វើឲ្យក្រុមលេខ ២ ឆ្នាំចាស់ តោមាស មិនបានចូលរួមនៅឆ្នាំនេះទេ ព្រោះដាក់ពាក្យក្រោយគេ តែក្រុមលេខ ១ យុវជននគរបាល បានដាក់ពាក្យរួចរាល់ហើយ។
លោកសឹម សានត្រាន តំណាងភេសជ្ជៈស្ពនស័រ និងជាអ្នកគ្រប់គ្រងការប្រកួតនេះ បានប្រាប់កាលពីម្សិលមិញថា៖ «ក្រុមបានដាក់ពាក្យចូលរួមប្រកួត នៅមណ្ឌលនេះមានច្រើន ប៉ុន្តែយើងកំណត់យកតែ ៤០ ក្រុម ហើយក្នុងនោះក្រុមលេខ ២ ឆ្នាំចាស់ តោមាស ក៏មិនបានចូលរួមប្រកួត នៅឆ្នាំនេះដែរ»។
ជាមួយនឹងការទទួលបានក្រុមចូលរួមចំនួន ៤០ គ្រប់តាមការកំណត់នេះ គណៈកម្មការរៀបចំការប្រកួត បានកំណត់យករូបមន្តការប្រកួតមណ្ឌល ក្រុងព្រះសីហនុនេះ ដូចគ្នាទៅនឹងមណ្ឌលភ្នំពេញ កន្លងមកនេះ គឺត្រូវចាប់ឆ្នោតយក ១៦ ក្រុមឲ្យប្រកួតជម្រុះ យកក្រុមឈ្នះ ៨ ឡើងមកប្រកួតក្នុងវគ្គ ៣២ ក្រុម ជាមួយក្រុមចំនួន ២៤ ទៀត ដែលចាប់ឆ្នោត ឡើងមកវគ្គនេះដោយស្វ័យប្រវត្តិ។
បើតាមលោក សឹម សានត្រាន បានឲ្យដឹងថា ពិធីចាប់ឆ្នោត នឹងត្រូវធ្វើឡើងនៅក្លិបកីឡាជេក នៅរសៀលថ្ងៃសុក្រនេះ ហើយចាប់ពីការប្រកួតវគ្គ ៣២ ក្រុមទៅ គឺត្រូវប្រកួតដោយប្រើរូបមន្តចាញ់ធ្លាក់ៗ រហូតដល់ឃើញក្រុមខ្លាំងចំនួន ២ ប្រចាំមណ្ឌលនេះ ត្រៀមឡើងទៅប្រកួតជុំផ្តាច់ព្រ័ត្រជាមួយក្រុមខ្លាំងចំនួន ៨ មកពីមណ្ឌលចំនួន ៤ ទៀតមានភ្នំពេញ ខេត្តបន្ទាយមានជ័យ ខេត្តសៀមរាប និងមណ្ឌលខេត្តព្រៃវែង ដែលបានបញ្ចប់ការប្រកួតជាផ្លូវការហើយ។
លោក សឹម សានត្រាន បានបន្ថែមថា៖ «តាមបទពិសោធនៃការប្រកួតកន្លងមក គឺក្រុមស្ថិតនៅមណ្ឌលព្រះសីហនុនេះ មានកម្រិតលេងបានល្អស្មើទៅនឹងមណ្ឌលផ្សេងៗទៀតដែរ ប៉ុន្តែនៅឆ្នាំនេះ គុណភាពលេងរបស់ក្រុមនៅមណ្ឌលនេះ អាចនឹងមានការរីកចម្រើនជាងមុន ហើយអ្នកគាំទ្រក៏អាចច្រើនជាងមុនដែរ ព្រោះបច្ចុប្បន្ន ក្រុងព្រះសីហនុ មានទីលានប្រកួតច្រើន ហើយចំនួនក្រុមក៏កើនឡើងច្រើន ខុសពីឆ្នាំមុន គឺប្រមូលទាំងអស់ប្រចាំមណ្ឌលព្រះសីហនុនេះ បានតែ ៣៦ ក្រុមទេ»៕