.jpg)
កីឡាករមាស ម៉ើ (ឆ្វេង) ក្នុងពេលប្រកួតជាមួយនឹងចាន់ សំអាត កាលពីឆ្នាំ ២០១៥។ ផា លីណា
ភ្នំពេញ: អ្នកប្រយុទ្ធកម្ពុជា មាស ម៉ើ នឹងទទួលបានឱកាសក្នុងការបង្ហាញខ្លួនជាលើកទី ៣ ក្នុងព្រឹត្តិការណ៍ប្រដាល់វាយដាក់ទ្រុងដែលត្រូវបានរៀបចំឡើងដោយអង្គភាពរៀបចំការប្រកួតយុទ្ធគុនចម្រុះ (MMA) ឈានមុខគេប្រចាំទ្វីបអាស៊ី ONE Championship (ONE) នៅពេលដែលរូបគេធ្វើដំណើរទៅប្រកួតនៅលើទឹកដីនៃប្រទេសហ្វីលីពីន នៅចុងខែនេះ។
កីឡាករវ័យ ២៧ ឆ្នាំរូបនេះ នឹងត្រូវធ្វើដំណើរទៅប្រកួតជាមួយនឹងកីឡាករម្ចាស់ផ្ទះពោរពេញដោយបទពិសោធ Edward “The Ferocious” Kelly ក្នុងទម្ងន់ចន្លោះពី ៦៥,៩ ដល់ ៧០,៣ គីឡូក្រាម នាព្រឹត្តិការណ៍ ONE: GLOBAL SUPERHEROES នៅសង្វៀន Mall of Asia Arena ក្នុងទីក្រុងម៉ានីល នៅថ្ងៃសុក្រ ទី ២៦ ខែមករា ខាងមុខ។
មាស ម៉ើ មានកំណត់ត្រាក្នុងយុទ្ធគុនចម្រុះដ៏គួរឲ្យកត់សម្គាល់ ខណៈដែលរូបគេបានកត់ត្រាជ័យជម្នះក្នុងការប្រកួតអាជីពដល់ទៅ ៦ លើក មិនដែលចាញ់ ហើយរូបគេបានធ្វើការបង្ហាញខ្លួនជាលើកទី ១ របស់គេក្នុង ONE Championship កាលពីឆ្នាំ ២០១៤ ដែលនៅពេលនោះរូបគេបានយកឈ្នះលើកីឡាករចាន់ ហេង តាមរយៈការប្រើប្រាស់ស្នៀតក្លេបំពង់ខ្យល់ក្នុងទឹកទី ១។
អតីតម្ចាស់ខ្សែក្រវាត់ KW 2 Champion រូបនេះ បង្ហាញពីការដណ្តើមបានជ័យជម្នះម្តងទៀត ក្នុងការប្រកួតមួយផ្សេងទៀតរបស់ ONE នៅរោងមហោស្រពកោះពេជ្រ តាមរយៈការយកឈ្នះលើកីឡាករចាន់ សំអាត កាលពីឆ្នាំ ២០១៥ ដោយការវាយឲ្យដៃគូសន្លប់ក្នុងទឹកទី ១។
ប៉ុន្តែ ទោះបីមានស្នៀតប្រយុទ្ធទាំងយុទ្ធគុនចម្រុះ និងគុនខ្មែរដ៏គួរឲ្យកត់សម្គាល់ក៏ដោយ ប៉ុន្តែ មាស ម៉ើ នឹងត្រូវជួបការប្រកួតដ៏ស្វិតស្វាញមួយ ព្រោះ Kelly ជាកីឡាករពោរពេញដោយបទពិសោធម្នាក់។
កីឡាកររបស់ហ្វីលីពីនវ័យ ៣៣ ឆ្នាំរូបនេះ ជាជើងខ្លាំងម្នាក់ក្នុងប្រភេទទម្ងន់ ៧០,៣ កីឡូក្រាម ខណៈដែលរូបគេមានទេពកោសល្យទៅលើផ្នែកប្រើប្រាស់ស្នៀតក្លេ និងស្នៀតប្រដាល់។ Kelly មានកំណត់ត្រាឈ្នះដល់ទៅ ៩ លើក និងចាញ់តែ ៤ លើកគត់ ខណៈដែលការប្រកួតរបស់គេភាគច្រើនបានកើតឡើងក្នុងព្រឹត្តិការណ៍របស់ ONE Championship។
ស្របពេលជាមួយគ្នានេះ Geje “Gravity” Eustaquio សញ្ជាតិហ្វីលីពីន នឹងត្រូវប៉ះជាមួយនឹងកីឡាករ Kairat Akhmetov របស់កាហ្សាក់ស្ថាន ក្នុងការប្រកួតគូឯកដើម្បីដណ្តើមខ្សែក្រវាត់ពិភពលោកដែលនៅទំនេររបស់ ONE ក្នុងទម្ងន់ ៦១,២ គីឡូក្រាម។
Eustaquio គឺជាកីឡាករយុទ្ធគុនចម្រុះជើងខ្លាំងម្នាក់ ខណៈដែលក្រៅពីជាអ្នកប្រយុទ្ធក្នុងកីឡាវ៉ូស៊ូ រូបគេក៏មានទេពកោសល្យទៅលើផ្នែកប្រដាល់ផងដែរ ហើយរូបគេមានកំណត់ត្រាឈ្នះដល់ទៅ ៩ លើក និងចាញ់ ៦ លើក។
ដោយឡែក Akhmetov ដែលជាអតីតម្ចាស់ខ្សែក្រវាត់ក្នុងប្រភេទទម្ងន់នេះ គឺជាអ្នកប្រយុទ្ធជើងចាស់ម្នាក់ ខណៈដែលកីឡាករវ័យ ៣០ ឆ្នាំរូបនេះ មានកំណត់ត្រាឈ្នះដល់ទៅ ២៤ លើក និងចាញ់តែ ១ លើកគត់ក្នុងអាជីព MMA ដ៏ជោគជ័យរបស់គេ។
នេះនឹងក្លាយជាការប្រកួតសងសឹកមួយ ខណៈកីឡាករទាំងពីរបានជួបគ្នារួចជាស្រេចកាលពីឆ្នាំ ២០១៧ ដែលនៅពេលនោះកីឡាករ Eustaquio បានចាញ់ Akhmetov ដោយពិន្ទុទាំងប្រផិតប្រផើយ។
ក្នុងការប្រកួតដ៏គួរឲ្យចាប់អារម្មណ៍មួយផ្សេងទៀត តារាឆ្នើមទើបតែរះ Joshua Pacio វ័យ ២២ ឆ្នាំ របស់ហ្វីលីពីន ក៏ត្រៀមផ្តល់ភាពរំភើបដល់អ្នកគាំទ្រដ៏ច្រើនកុះកររបស់ខ្លួនផងដែរ នៅពេលដែលរូបគេធ្វើដំណើរទៅកាន់សង្វៀនដាក់ទ្រុងដើម្បីជួបជាមួយនឹងជើងខ្លាំងថៃ Pongsiri Mitsatit វ័យ ២១ ឆ្នាំ ក្នុងទម្ងន់ ៥៦,៧ គីឡូក្រាម។
ONE បោះជំហានឆ្ពោះទៅកាន់យុទ្ធនាការជាលើកទី ២ ក្នុងឆ្នាំ ២០១៨ បន្ទាប់ពីព្រឹត្តិការណ៍បើកឆាកនៅឥណ្ឌូនេស៊ី៕
