ភ្នំពេញ: ការប្រកួតជម្រុះរកបេក្ខជនស្តេចអុកឆ្នាំ ២០១៨ នៅមណ្ឌលកំពង់ស្ពឺ បានរកឃើញអ្នកឈ្នះចំនួន ៣ នាក់ហើយកាលពីល្ងាចថ្ងៃអាទិត្យ ទី ២៥ ខែកុម្ភៈឆ្នាំ ២០១៨ ក្នុងនោះស្តេចអុកចត្រង្គប្រចាំឆ្នាំ ២០១៧ ហេង សៅឌី ទទួលបានចំណាត់ថ្នាក់លេខ ២ ប្រចាំមណ្ឌលនោះ។
លោក ឈាវ បូរ៉ា ជាអគ្គលេខាធិការសហព័ន្ធកីឡាអុកចត្រង្គកម្ពុជា និងជាម្ចាស់ស្តេចអុក ២ សម័យកាល បានប្រាប់ភ្នំពេញ ប៉ុស្តិ៍ ថា៖ «មណ្ឌលកំពង់ស្ពឺមានខេត្តចំនួន ៤ ចូលរួមប្រកួតគឺមកពីកំពង់ស្ពឺចំនួន ២ នាក់ មកពីខេត្តកណ្តាលចំនួន ១០ នាក់ មកពីខេត្តតាកែវចំនួន ១ នាក់ និងមកពីខេត្តកំពង់ឆ្នាំងចំនួន ២ នាក់»។
លោកឈាវ បូរ៉ា បានបន្តថា៖ «ការប្រកួតប្រជែងវគ្គជម្រុះតាមរូបមន្តវិលជុំ ដែលបានឯកភាពគ្នានោះ ជ្រើសរើសបានបេក្ខភាពចំនួន ៣ នាក់ចាប់ពីលេខ ១ ដល់លេខ ៣ ក្នុងនោះជើងឯកស្តេចអុកចត្រង្គគ្រងឆ្នាំ ២០១៧ ជាប់ត្រឹមចំណាត់ថ្នាក់លេខ ២ បន្ទាប់ពីចាញ់កីឡាករស៊ីវ សិន មកពីខេត្តតាកែវ»។
ក្នុងការប្រកួតមណ្ឌលកំពង់ស្ពី ដែលមានបេក្ខជនចូលរួមប្រកួតប្រជែងចំនួន ១៥ នាក់នោះ ចំណាត់ថ្នាក់លេខ ១ បានទៅលើកីឡាករស៊ីវ សិន មកពីខេត្តតាកែវ។ ចំណាត់ថ្នាក់លេខ ២ បានទៅស្តេចអុកចត្រង្គឆ្នាំ ២០១៧ ហេង សៅឌី មកពីខេត្តកណ្តាល និងចំណាត់ថ្នាក់លេខ ៣ បានទៅកីឡាករមាស សិភត្តិ មកពីខេត្តកណ្តាល។
លោកគ្រួច ចន្ថារិទ្ធ គណៈកម្មការរៀបចំ បានឲ្យដឹងថា៖ «ការប្រកួតនឹងបន្តទៅមណ្ឌលខេត្តកំពង់ចាម មានបេក្ខជន ១២ នាក់ មណ្ឌលខេត្តបាត់ដំបង មានបេក្ខជន មាន ១៦ នាក់ មណ្ឌលខេត្តសៀមរាប មានបេក្ខជន ១៥ នាក់ មណ្ឌលខេត្តក្រចេះ មានបេក្ខជន ៦ នាក់ ហើយចុងក្រោយត្រឡប់មកមណ្ឌលភ្នំពេញវិញ ដែលជាមណ្ឌលចុងក្រោយ មានបេក្ខជន ៦៧ នាក់»។
លោកគ្រួច ចន្ថារិទ្ធ បានបញ្ជាក់ថា៖ «រូបមន្តប្រកួត ត្រូវធ្វើដូចគ្នាទាំងអស់គ្រប់មណ្ឌល ប៉ុន្តែមានការសំណូមពរដល់សហភាពសហព័ន្ធយុវជនកម្ពុជា ឲ្យជ្រើសរើសយកបេក្ខជនចំនួន ៦ នាក់នៅមណ្ឌលភ្នំពេញ ព្រោះមណ្ឌលភ្នំពេញ មានបេក្ខភាពចូលរួម ៦៧ នាក់ និងប្រជុំសុទ្ធតែជើងខ្លាំង»៕