ភ្នំពេញ: ការប្រកួតជម្រុះរកបេក្ខជនស្តេចអុកឆ្នាំ ២០១៨ នៅមណ្ឌលសៀមរាប បានរកឃើញអ្នកឈ្នះចំនួន ៣ នាក់ ហើយកាលពីល្ងាចថ្ងៃអាទិត្យ ទី ១៨ ខែមីនា ឆ្នាំ ២០១៨ ក្នុងនោះរកឃើញបេក្ខជនស្តេចអុកចំនួន ៣ នាក់នៅមណ្ឌលសៀមរាប ក្រោយពីការប្រកួតជម្រុះតាមរូបមន្តពេញមួយថ្ងៃរួចមក។
លោក ឈាវ បូរ៉ា ជាអគ្គលេខាធិការសហព័ន្ធកីឡាអុកចត្រង្គកម្ពុជា និងជាម្ចាស់ស្តេចអុក ២ សម័យកាល បានប្រាប់ភ្នំពេញ ប៉ុស្តិ៍ ថា៖ «មណ្ឌលសៀមរាបមានខេត្ត ៥ រួមមានសៀមរាប បន្ទាយមានជ័យ ឧត្តរមានជ័យ កំពង់ធំ និងព្រះវិហារ»។
លោកបានប្រាប់បន្តថា៖ «ប៉ុន្តែវត្តមានប្រកួតជាក់ស្តែងមានតែ ២ ខេត្តប៉ុណ្ណោះ ដែលមកប្រកួតប្រជែងគឺខេត្តសៀមរាប មានចំនួន ២១ នាក់ និងខេត្តបន្ទាយមានជ័យចំនួន ៤ នាក់ ខណៈខេត្ត ៣ ទៀតមិនហ៊ានដាក់បេក្ខជនមកប្រកួតនោះទេ»។
លោកឈាវ បូរ៉ា បានបន្តថា៖ «ការប្រកួតប្រជែងវគ្គជម្រុះតាមរូបមន្តវិលជុំ ដែលបានឯកភាពគ្នានោះ ត្រូវជ្រើសយកបេក្ខភាពចំនួន ៣ នាក់ ចាប់ពីលេខ ១ ដល់លេខ ៣ ក្នុងនោះ បេក្ខជនជាប់ចំណាត់ថ្នាក់សុទ្ធតែថ្មី»។
លទ្ធផលផ្លូវការពីគណៈកម្មការប្រកួតកាលពីថ្ងៃ អាទិត្យ ២ កើត ខែចេត្រ នព្វស័ក ព.ស ២៥៦១ ត្រូវនឹងថ្ងៃទី ១៨ ខែមីនា ឆ្នាំ ២០១៨ នៅសម្រាប់មណ្ឌលសៀមរាប ចំណាត់ថ្នាក់លេខ ១ បានទៅលើកីឡាករជា ស៊ីដេត មកពីខេត្តបន្ទាយមានជ័យ។ ចំណាត់ថ្នាក់លេខ ២ បានទៅលើកីឡាករ ជៀក ផល្លី មកពីខេត្តសៀមរាប និងចំណាត់ថ្នាក់លេខ ៣ បានទៅលើកីឡាករ អេង សេងហៀក មកពីខេត្តសៀមរាប។
លោកគ្រួច ចន្ថារិទ្ធ គណៈកម្មការបច្ចេកទេសប្រកួត បានឲ្យដឹងថា៖ «ក្រោយការជ្រើសរើសទាំង ៧ មណ្ឌលទូទាំងប្រទេស ដែលមានមួយមណ្ឌល កីឡាករសរុប ២៤ នាក់នេះ នឹងត្រូវទៅជួបប្រកួតគ្នាថ្នាក់ជាតិនៅគណៈកម្មាធិការជាតិអូឡាំពិកកម្ពុជា ក្នុងពេលខាងមុខ ដើម្បីចម្រាញ់យក ៨ នាក់ទៅប្រកួតជម្រុះវគ្គ ៣ បន្តនៅមហាសង្គ្រាន្ត ខេត្តសៀមរាប មុខប្រសាទអង្គរនាថ្ងៃចូលឆ្នាំ ដើម្បីរកជើងខ្លាំងស្តេចអុកប្រចាំឆ្នាំ ២០១៨ តែម្តង»៕